ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្ដីស្រឡាញ់អាចបង្ហាញចេញបានរាល់ថ្ងៃជាមួយមនុស្សជាទីស្រឡាញ់គ្រប់រូប មិនមែនត្រឹមតែការបង្ហាញនៅថ្ងៃទី១៤ កុម្ភៈ ទេ ហើយការស្រឡាញ់ទៀតសោតមិនមែនជាការបង្ហាញដោយការលះបង់អ្វីគ្រប់យ៉ាងទៅកាន់ដៃគូស្នេហាឡើយ។
ឯកឧត្ដម ឆាត សុឆេត មន្ត្រីជាន់ខ្ពស់ក្រសួងធម្មការ និងសាសនា លើកឡើងថា បច្ចុប្បន្ននេះ Valentine’s Day ឬហៅថា ថ្ងៃនៃសេចក្ដីស្រឡាញ់ បានកំពុងចាក់ឬសយ៉ាងជ្រៅក្នុងដួងចិត្តរបស់ប្រជាជនកម្ពុជា ជាពិសេសនៅក្នុងស្រទាប់យុវវ័យ។ ជាងនេះទៀតសោត នាថ្ងៃទី១៤ ខែកុម្ភៈ រៀងរាល់ឆ្នាំ តែងតែឃើញមានការទិញផ្កា វត្ថុអនុស្សាវរីយ៍ ឬអំណោយ ជូនមនុស្សជាទីស្រឡាញ់ ហើយយុវវ័យខ្លះអាចផុងខ្លួនធ្វើរឿងមិនគម្បីដើម្បីបញ្ជាក់ពីក្ដីស្រឡាញ់ចំពោះដៃគូរទៀតផង។
ដើម្បីចូលរួមផ្សព្វផ្សាយកុំឱ្យមានរឿងមិនគម្បីណាមួយកើតឡើងដោយចេតនា ឬអចេតនាក្ដី ក្រសួងធម្មការ និងសាសនា សហការណ៍ជាមួយ ក្រសួងអប់រំ យុវជន និងកីឡា និង ក្រសួងវប្បធម៌ និងវិចិត្រសិល្បៈ តែងតែចេញសេចក្ដីណែនាំ និងសារដាស់តឿន កុំឱ្យបុគ្គលគ្រប់រូបមានការយល់ច្រឡំអត្ថន័យនៃថ្ងៃនេះ រហូតដល់ប្រព្រឹត្តរឿងមិនគប្បីក្នុងសង្គមជាដើម។
“យ៉ាងណាមិញ បុគ្គលគ្រប់រូបអាចបង្ហាញក្ដីស្រឡាញ់ និងប្រើប្រាស់ពេលវេលានេះជាមួយមនុស្សជាទីស្រឡាញ់តាមរយៈការដឹងគុណ និងថ្លែងអំណរគុណដល់ ឪពុកម្ដាយ អ្នកមានគុណ លោកគ្រូ អ្នកគ្រូ ដោយចំណាយពេលវេលាជាមួយពួកគាត់ឱ្យបានល្អ”
ឯកឧត្ដម ឆាត សុឆេត
លោក យូ សុភា សាស្រ្ដាចារ្យផ្នែកវប្បធម៌ នៃសាកលវិទ្យាល័យភូមិន្ទភ្នំពេញ យល់ឃើញថា ថ្ងៃ១៤ កុម្ភៈ ឬថ្ងៃនៃក្ដីស្រឡាញ់នេះ បានជះឥទ្ធិពលយ៉ាងខ្លាំងដល់ប្រជាជនកម្ពុជា ហើយអាចជាមូលហេតុ ឬលេស មួយដែលយុវជន យុវនារីខ្មែរមួយចំនួនតូចមានការយល់ច្រឡំថាជាថ្ងៃដែលដៃគូត្រូវបង្ហាញការស្រឡាញ់ តាមរយៈការលះបង់ថវិកា ឬខ្លួនប្រាណ ការប្រព្រឹត្តទង្វើរមិនគប្បី និងខុសទំនៀមទម្លាប់ ដែលអាចបង្កជាផលលំបាកដល់សាម៉ីខ្លួន ក្រុមគ្រួសារ និងសង្គមជាតិនាពេលក្រោយ។
បើតាម លោក យូ សុភា សេចក្ដីស្រឡាញ់ត្រូវមានជារៀងរាល់ថ្ងៃសម្រាប់មនុស្សគ្រប់គ្នា និងមនុស្សជាទីស្រឡាញ់ ហើយការបង្ហាញក្ដីស្រឡាញ់គឺការយកចិត្តទុកដាក់ ព្រួយបារម្ភ ការណែនាំឱ្យដើរផ្លូវល្អ ធ្វើរឿងត្រឹមត្រូវ ដែលមានប្រយោជន៍សម្រាប់ខ្លួនឯង និងគ្រួសារ ឱ្យក្លាយជាធនធានមនុស្ស និងធ្វើសង្គមឱ្យកាន់តែរីកចម្រើន។
“យុវជន យុវនារីមួយចំនួនគ្រាន់តែយកថ្ងៃ១៤ កុម្ភៈ នេះជាលេសបង្ហាញក្ដីស្រលាញ់ និងប្រព្រឹត្តិខុសឆ្គងមួយចំនួនតែប៉ុណ្ណោះ ដូចនេះយុវជនទាំងអស់ មិនត្រូវធ្វើរឿងខុសពីទំនៀមទម្លាប់ប្រពៃណីឡើយ”
លោក យូ សុភា សាស្រ្ដាចារ្យផ្នែកវប្បធម៌
បន្ថែមពីការយល់ឃើញខាងលើ សាស្ត្រាចារ្យរូបនេះ សំណូមពរដល់ប្រជាពលរដ្ឋខ្មែរគ្រប់រូប ជាពិសេសយុវជន យុវនារីកុំមានការជ្រួលជ្រើមនឹងវប្បធម៌បរទេសដែលកំពុងកើតមានក្នុងប្រទេសកម្ពុជាយើង ហើយគួរតែចូលរួមរក្សាវប្បធម៌ ប្រពៃណីឱ្យបានខ្ជាប់ខ្ជួន និងរក្សាតម្លៃនៃខ្លួនឯងផងដែរ៕
