បច្ចុប្បន្ន​នេះ យុវវ័យមានភាពលំបាក​ក្នុង​ការ​ផ្តោត​អារម្មណ៍​ ដោយសារតែព័ត៌មានជាច្រើនលោតចូលក្នុងទូរស័ព្ទដៃ ឬឧបករណ៍ដែលខ្លួនកំពុងតែប្រើប្រាស់, ទន្ទឹមគ្នានោះបណ្តាញសង្គមក៏មានឥទ្ធិពលនាំឱ្យ​ស្ថានភាពផ្លូវចិត្តកាន់តែមិនល្អទៅៗ ព្រោះតែមានការប្រៀបធៀប និងការដេញតាមសុភមង្គលជាដើម។ ត្បិតថាបដិវត្តន៍ឌីជីថល បាននាំមកនូវភាពងាយស្រួលក៏ពិតមែន ជាមួយគ្នានោះក៏បានបង្កការរំខាននៅពេលត្រូវការផ្តោតលើការងារអ្វីមួយ ដែលតម្រូវឱ្យមនុស្សមានការតស៊ូយ៉ាងស្វិតស្វាញ ដើម្បីបញ្ចប់ភារកិច្ចនីមួយៗ ដែលចំណុចនេះនាំឱ្យប៉ះពាល់ទៅកាន់សុខភាពផ្លូវចិត្ត។

តាមរយៈ គេហទំព័រ Reviewjournal ការផ្តោតតែទៅលើសុភមង្គល ក៏​ធ្វើឱ្យស្ថានភាពផ្លូវចិត្តកាន់តែមិនល្អ ដោយហេតុថា ត្រូវបង្ខំខ្លួនឯងពេកនាំឱ្យអស់ថាមពលច្រើនទ្វេគុណ និងកាន់តែពិបាកក្នុងការគ្រប់គ្រងខ្លួនឯង រួមទាំងផលប៉ះពាល់ក្នុងការរស់នៅប្រចាំថ្ងៃផងដែរ។ យ៉ាងណាក៏ដោយ អ្នកជំនាញ​បានបង្ហាញគន្លឹះចំនួន៣ ដើម្បីដោះស្រាយបញ្ហានេះ ៖

១. ប្រើប្រាស់យុទ្ធសាស្រ្តតិចនិយមលើទូរស័ព្ទដៃ និង​បណ្តាញសង្គម ៖ ការរៀបចំទូរស័ព្ទដៃ ក៏​ដូចជា​បណ្តាញសង្គម ហាក់មានភាពស្រដៀងគ្នានឹងការរស់នៅដែរ ត្រូវការបោសសម្អាត និងរក្សាទុកតែរបស់សំខាន់ និងប្រើប្រាស់បានច្រើនបែបបទ ក្នុងគោលបំណងកាត់បន្ថយការប្រើប្រាស់ ឬការប្រើមួយដែលនាំមកនូវផលិតភាព ជាជាងកម្មវិធីនាំឱ្យខ្ជះខ្ជាយពេលវេលា។ ការកំណត់ពេលវេលាលើអេក្រង់អាចកាត់បន្ថយការផ្ទុកលើសចំណុះ និងសម្រាប់ដាក់កម្មវិធីសំខាន់ៗ បន្ថែមពីនោះបិទរាល់ការជូនដំណឹងដែលមិនសំខាន់ ក៏ជាការប្រមូលអារម្មណ៍ឱ្យងាកមកចាប់អារម្មណ៍ពេលបច្ចុប្បន្ន រួមទាំងការកំណត់ឯកជនភាពកុំឱ្យមានការផ្ញើសារពីគេហទំព័រណាដែលមិនឆ្លើយតបនឹងតម្រូវការផ្ទាល់ខ្លួន។

២. ធ្វើការងារតែមួយ ៖ ច្រើនដងច្រើនសារ មានមនុស្សជឿជាក់ថា ធ្វើការងារច្រើនក្នុងពេលតែមួយចំណេញពេលវេលា ប៉ុន្តែបានត្រឹមតែរុញច្រានពេលឱ្យអូសបន្លាយទៅវិញ។ ទោះបីជាមានការអះអាងថា ខ្លួនមានភាពប្រសព្វ ក្នុងការធ្វើកិច្ចការពីបីក្នុងពេលតែមួយក៏ដោយ តែនៅនាទីចុងក្រោយ នៅតែផ្តោតលើលទ្ធផលមួយៗដដែល។ ជារួមគឺការផ្តោតលើកិច្ចការមួយក្នុងពេលតែមួយអាចបង្កើនផលិតភាព និងសេចក្ដីពេញចិត្តចំពោះខ្លួនឯង។

៣. ប្រើប្រាស់ខួរក្បាលឱ្យបានរាល់ថ្ងៃ ៖ មានសកម្មភាពជាច្រើនជំរុញឱ្យខួក្បាលមានលំហាត់ប្រាណជាប្រចាំដូចជា ល្បែងផ្គុំរូប ហ្គេមដែលនាំឱ្យគិតអំពីពេលចាស់ៗដើម្បីបង្កើនការចងចាំ និងការរៀនជំនាញថ្មីៗ ប្រកួតប្រជែងគណនាលេខ និងការចូលរួមកម្មវិធីលើកកម្ពស់សុខភាពផ្លូវចិត្ត។ បន្ថែមពីនោះ ការអានសៀវភៅ ការរៀនឧបករណ៍តន្ត្រី បង្កើនភាពស្ទាត់ជំនាញចំពោះភាសាថ្មីៗ សុទ្ធសឹងតែជាចំណែកនាំឱ្យ​ខួរក្បាលមានការដុះដាលជាប្រចាំ៕