សាកលវិទ្យាល័យខេមតិច បានប្រកាសជ្រើសរើសនិស្សិតចូលរួមការប្រកួតនវានុវត្តន៍បច្ចេកវិទ្យា រដូវកាលទី២ ក្នុងការលើកកម្ពស់សហគ្រិនភាព និងការបង្កើតធុរកិច្ចថ្មីដោយប្រើប្រាស់បច្ចេកវិទ្យា។

អ្នកនាង ណយ ឆវិន អ្នកសម្របសម្រួលគម្រោងការប្រកួតប្រជែងបច្ចេកវិទ្យានវានុវត្តន៍ មានប្រសាសន៍ថា ក្រោមការគាំទ្រពីសហគ្រិនខ្មែរ (Khmer Enterprise) សាកលវិទ្យាល័យខេមតិច នឹងរៀបចំការប្រកួតនវានុវត្តន៍បច្ចេកវិទ្យា រដូវកាលទី២ (Innovative Tech Challenge Season 2) ដែលជាការប្រកួតប្រជែងស្តីពីគំនិតបង្កើតធុរកិច្ចថ្មីក្នុងសម័យបច្ចេកវិទ្យា។

កម្មវិធីប្រកួតនេះ គឺជាវេទិកាមួយដែលផ្តល់ឱកាសដល់និស្សិតដែលកំពុងសិក្សានៅតាមបណ្តាគ្រឹះសា្ថនឧត្តមសិក្សាអាចដាក់ពាក្យចូលរួមការប្រកួតប្រជែងគម្រោងនវានុវត្តន៍បច្ចេកវិទ្យារបស់ខ្លួនបាន។

អ្នកសម្របសម្រួលគម្រោងការប្រកួតប្រជែងបច្ចេកវិទ្យានវានុវត្តន៍ បញ្ជាក់បន្ថែមថា និស្សិតដែលនឹងត្រូវជ្រើសរើសចំនួន១០ក្រុមចុងក្រោយនឹងទទួលបានការបណ្តុះបណ្តាលចំនួន ០៨វគ្គ លើប្រធានបទទាក់ទងនឹងសហគ្រិនភាព និងការបង្កើតធុរកិច្ចថ្មី និងត្រៀមការប្រកួតយកជ័យលាភីដែលមានទឹកប្រាក់រហូតដល់ ៣៥០០ដុល្លារអាមេរិក។

អ្នកនាង ណយ ឆវិន បន្ថែមថា បេក្ខជនដែលមានបំណងចូលរួមត្រូវមានលក្ខខណ្ឌ រួមមាន ជានិស្សិតដែលកំពុងសិក្សាតាមគ្រឹះស្ថានឧត្តមសិក្សា និងវិទ្យាស្ថានបណ្តុះបណ្តលវិជ្ជាជីវៈ ទាំងនៅរាជធានីភ្នំពេញ និងបណ្តាខេត្ត។ បេក្ខជនមួយក្រុមមានសមាជិកមិនលើសពី៥នាក់ យ៉ាងហោចណាស់មានសមាជិកម្នាក់ជានារី។ លើសពីនេះ មានគំនិតបង្កើតធុរកិច្ចថ្មីៗក្នុងសម័យបច្ចេកវិទ្យា។

អ្នកសម្របសម្រួលគម្រោងការប្រកួតប្រជែងបច្ចេកវិទ្យានវានុវត្តន៍ សង្ឃឹមថា និស្សិតដែលកំពុងសិក្សាតាមគ្រឹះស្ថានឧត្តមសិក្សា និងវិទ្យាស្ថានបណ្តុះបណ្តលវិជ្ជាជីវៈ ទាំងនៅរាជធានីភ្នំពេញ និងបណ្តាខេត្ត នឹងដាក់ពាក្យចូលរួមកម្មវិធីការប្រកួតប្រជែងបច្ចេកវិទ្យានវានុវត្តន៍រដូវកាលពី២នេះ ច្រើនជាងរដូវកាលទី១។ បន្ថែមពីនេះ និស្សិតគ្រប់រូបដែលមានគំនិតបង្កើតធុរកិច្ចថ្មីៗក្នុងសម័យបច្ចេកវិទ្យា ដោយពួកគាត់នឹងដាក់បង្ហាញគំនិតរបស់ខ្លួនដល់ទស្សនិកជន និងអ្នកវិនិយោគនាថ្ងៃទី១៩ ខែតុលា ឆ្នាំ២០២៤ ខាងមុខ។

សម្រាប់ស្សិតដែលកំពុងសិក្សានៅតាមបណ្តាគ្រឹះសា្ថនឧត្តមសិក្សាមានចំណាប់អារម្មណ៍អាចដាក់ពាក្យចូលរួមការប្រកួតប្រជែងគម្រោងនវានុវត្តន៍បច្ចេកវិទ្យារបស់ខ្លួន ចាប់ពីថ្ងៃទី១៥ ខែមិថុនា ដល់ថ្ងៃទី១៥ ខែកក្កដា ឆ្នាំ២០២៤។ ការដាក់ពាក្យប្រកួតតាមរយៈតំណភ្ជាប់ https://forms.gle/KUo7ps6Amkz584dRA ៕