ភាពឈ្លាសវៃត្រូវបានដុះដាលតាមរយៈវិធីសាស្រ្តចម្រុះគ្នា ទីតាំងខុសគ្នា ការជ្រើសទម្លាប់គុណភាព និងកត្តារួមផ្សំដទៃទៀត ទើបអាចទទួលបានផ្លែផ្កាជាទីគាប់ចិត្ត។ យ៉ាងណាមិញ គេហទំព័រ Entrepreneur បានបង្ហាញនូវគន្លឹះ៤ចំណុចក្នុងការជំរុញឱ្យភាពឈ្លាសវៃត្រូវបានរីកដុះដាលពីមួយពេល ទៅមួយពេល។

១. បង្កើនសកម្មភាពចម្រុះក្នុងថ្ងៃនីមួយៗ ៖ កាលដែលមានទម្លាប់ល្អប្រចាំខ្លួន អាចរាប់បានថាជាទ្រព្យសម្បត្តិដ៏មានតម្លៃហើយ ប៉ុន្តែដើម្បីពង្រឹងភាពឈ្លាសវៃទៅកាន់សុខភាពខួរក្បាល ក៏ដូចជាសុខុមាលភាពទាំងមូល ការមានភាពបត់បែន និងការទទួលយកភាពចម្រុះក៏ជាចំណែកមួយ ដែលមិនអាចមើលរំលងបាន ដូចនេះការបង្កើនភាពចម្រុះ គឺជាមធ្យោបាយ​មួយ ក្នុងការដុសខាត់នូវភាពឈ្លាសវៃ ព្រោះការធ្វើសកម្មភាពដដែលៗយូរទៅ វាពិបាកនឹងធ្វើឱ្យសមត្ថភាពខួរក្បាលមានភាពរីកចម្រើន។ ការអនុវត្តសកម្មភាពដែលមានភាពខុសប្លែកគ្នា ពុំចាំបាច់ទាល់តែមានការងារថ្មីៗមកទេ តួយ៉ាងអាចចាប់ផ្តើមតាមរយៈការប្រើប្រាស់ជីវិតប្រចាំថ្ងៃដូចជា ទៅញាំអាហារដែលមានទីតាំងខុសៗគ្នា សញ្ជឹងមើល៍ទេសភាព និងស្តាប់សម្លេងដែលមាននៅជុំវិញខ្លួនដោយយកចិត្តទុកដាក់ ដើម្បីរក្សាស្មារតីឱ្យនៅជាមួយបច្ចុប្បន្នភាព។

២. រំឮកព័ត៌មាន ឬមេរៀនដែលបានស្រូបយក ៖ រៀនហើយភ្លេច ឬអានហើយមិនចាំ ស្មើនឹងមិនបានរៀន ដែលជាហេតុ ត្រូវការរំលឹកឡើងវិញនូវព័ត៌មាន ឬរាល់មេរៀនដែលបានសិក្សាកន្លងមក។ ដើម្បីឱ្យកាន់តែមានប្រសិទ្ធភាពក្រោយការអាន និងក្រោយការរៀនសូត្រ គឺយកទ្រឹស្ដីដែលទទួលបានទៅអនុវត្តន៍ក្នុងការរស់នៅប្រចាំថ្ងៃ ឬបើពុំដូច្នោះទេ បង្កើនសមត្ថភាពចងចាំ ដោយវិធីសមស្របផ្ទាល់ខ្លួន ដូចជាការសរសេរឆ្លុះបញ្ចាំង និងការជជែកលេងជាមួយមិត្ត ឬក៏ស្រាវជ្រាវបន្ថែមទៅលើប្រធានបទដែលធ្លាប់រៀនកន្លងមក។

៣. តាមដានគំនិតផ្ទាល់ខ្លួន ៖ ស្ថិតក្នុងដំណាក់កាលអភិវឌ្ឍន៍សមត្ថភាព យើងនឹងមើលឃើញភាពរីកចម្រើន ពីមួយថ្ងៃទៅមួយថ្ងៃ។ ប៉ុន្តែម្តងម្កាលអាចជំរុញឱ្យមានការវង្វេងនឹងផ្នត់គំនិតដែលមានចម្រុះបែបទាំងនោះដែរ ដែលជាហេតុតម្រូវឱ្យមានការតាមដាន និងវាយតម្លៃរាល់ផ្នត់គំនិតទាំងនោះឱ្យបានទៀងទាត់។ ហើយអំឡុងពេលអានអ្វីមួយ គួរមានពេលសម្រាកបន្តិច រួចកត់សម្គាល់អំពីផលវិជ្ជមាន និងផលអវិជ្ជមាននៃទ្រឹស្តីនីមួយៗ កាលដែលអនុវត្តន៍បែបនេះ បានរួមចំណែកឱ្យខ្លួនឯងមានពេលគ្រប់គ្រាន់ក្នុងការរក្សាទុក ឬក៏បោះបង់ចោល ឬក៏សង្កេតបានថា តើទ្រឹះស្តីមួយណាដែលសាកសមនឹងស្ថានភាពផ្ទាល់ខ្លួន ព្រោះមិនមែនរាល់គំនិតដែលល្អទាំងអស់សុទ្ធតែសាកសមឱ្យយកមកអនុវត្តន៍ទាំងស្រុងនោះទេ គឺតម្រូវឱ្យជ្រើសរើសយ៉ាងប្រុងប្រយ័ត្ន។

៤. អនុញ្ញាតិឱ្យខ្លួនឯងផ្លាស់ប្តូរ ៖ មិនថាមានដើមកំណើតធំធាត់ក្នុងមជ្ឈដ្ឋានបែបណាទេ ដើម្បីបង្កើនសមត្ថភាពក្នុងជំនាញណាមួយបាន គឺអាស្រ័យលើការសម្រេចចិត្ត និងការតាំងចិត្តផ្ទាល់ខ្លួន ហើយការដុសខាត់ភាពឈ្លាសវៃទៀតសោត តម្រូវឱ្យខ្លួនឯងផ្ទាល់បង្កើតឆន្ទៈដើម្បីផ្លាស់ប្តូរយ៉ាងហ្មត់ចត់។ អនុញ្ញាតិឱ្យខ្លួនឯងផ្លាស់ប្តូរត្រង់ចំណុចនេះ គឺមានន័យថា ហ៊ានសាកល្បង មិនបារម្ភអំពីការបង្កើតកំហុសខ្លាំងពេក ក្លាហានបោះបង់ឱកាសដែលមិនសាកសមនឹងទទួលយក រួមទាំងការកត់សម្គាល់រាល់បទពិសោធន៍ដែលកើតមានទាំងអស់។ ក្រោយពីរក្សាបាននូវភាពរឹងមាំផ្ទាល់ខ្លួនហើយ ជាជំហានបន្ទាប់ គឺផ្តល់ឱកាសឱ្យខ្លួនឯងបានស្តាប់យោបល់អ្នកដទៃ សួរនាំបន្ថែមអំពីផ្លូវទៅកាន់ភាពរីកចម្រើន នោះភាពឈ្លាសវៃចាប់ផ្តើមវិវឌ្ឍន៍បន្តិចម្តងៗ៕