គ្រាន់តែនិយាយថា គិតវិជ្ជមាន ឬ Positive Thinking មិនមែនជារឿងលំបាលនោះទេ ប៉ុន្តែអនុវត្តការគិតតាមបែបវិជ្ជមានអាចជារឿងលំបាកសម្រាប់មនុស្សម្នាក់ៗ ពីព្រោះការគិតតាមបែបវិជ្ជមានទាមទារឱ្យបុគ្គលដឹងពីរបៀបគិត និងអនុវត្តទម្លាប់គិតជាប្រចាំ ។ ការគិតវិជ្ជមានចាំបាច់ត្រូវមានរបៀបគិតដ៏ត្រឹមត្រូវ ព្រមទាំងបង្កើតទស្សនៈវិជ្ជមានក្នុងដំណើរជីវិត ។ ខាងក្រោមនេះ ជាគន្លឹះបីចំណុចធ្វើឱ្យជីវិតមានគុណភាពតាមរយៈការគិតបែបវិជ្ជមាន ដែលស្រាវជ្រាវដោយក្រុមអ្នកសិក្សា verywellmind នៅសហរដ្ឋអាមេរិក ។

១. កត់សម្គាល់លើការគិតរបស់ខ្លួន ៖ នេះជាដំណាក់កាលដំបូង គឺចាប់ផ្តើមកត់សម្គាល់លើដំណើរនៃការគិតរបស់ខ្លួនរាល់ថ្ងៃ ។ ធ្វើបែបនេះជួយឱ្យបុគ្គលអាចរៀបចំរបៀបគិតបានយ៉ាងត្រឹមត្រូវ ឬគិតដោយមានសណ្តាប់ធ្នាប់ ។ ចំណុចចាប់ផ្តើមនេះ ត្រូវរៀនសម្គាល់ពីដំណើរប្រែប្រួលអារម្មណ៍ និងចិត្តរបស់ខ្លួន ដើម្បីដឹងពីចរឹកលក្ខណៈផ្ទាល់ខ្លួន ស្គាល់ពីចំណុចខ្លាំង និងចំណុចខ្សោយរបស់ខ្លួន ព្រមទាំងរបៀបគិតរបស់ខ្លួនកន្លងទៅ ។ នេះអាចនិយាយថា ដំណាក់កាលត្រឡប់មកពីខ្លួនឯងអីចឹងដែរ ។ 

២. សរសេរគំនិតវិជ្ជមានដែលបានជួប ៖ ការកត់ត្រាជាប្រចាំរាល់គំនិតថ្មីៗវិជ្ជមានដែលខ្លួនបានជួបនឹងជួយឱ្យបុគ្គលមានលំនឹកគិតវិជ្ជមានជាប្រចាំ មានន័យថាជួបគំនិតវិជ្ជមានច្រើន ក៏អាចជួយឱ្យការគិតផ្ទាល់ខ្លួនមានភាពវិជ្ជមានដូចគ្នាដែរ ។ បើគ្រាន់តែបានលឺ ឬស្តាប់អាចនឹងភ្លេច ប៉ុន្តែការកត់ត្រានឹងជួយរំលឹករាល់ពេលបុគ្គលចង់បង្កើនសមត្ថភាពគិតរបស់ខ្លួនឱ្យកាន់តែប្រសើរ ។ ការកត់ត្រាគំនិតល្អពីមនុស្សជុំវិញខ្លួន នឹងអាចបង្កើតគំនិតថ្មី ឬទ្រឹស្តីថ្មីសម្រាប់ខ្លួនឯង ព្រមទាំងជួយខ្លួនឯងរាល់ពេលជួបស្ថានការណ៍លំបាកអ្វីមួយ ។ 

៣. និយាយវិជ្ជមានចំពោះខ្លួនឯង ៖ សុខុមាភាពផ្លូវចិត្តមនុស្សម្នាក់ៗកើតចេញភាពរីករាយ តាមរយៈសកម្មភាពផ្ទាល់ខ្លួន និងទង្វើវិជ្ជមានពីអ្នកដទៃ ។ នៅពេលបុគ្គលម្នាក់ចាប់ផ្តើមផ្លាស់ប្តូរការគិតបែបវិជ្ជមាន ការនិយាយវិជ្ជមានទៅកាន់អ្នកដទៃនឹងកើតមានជាបន្តបន្ទាប់ ។ យើងអាចនិយាយវិជ្ជមានពីអ្នកដទៃ តែយើងក៏អាចនិយាយពីចំណុចវិជ្ជមានរបស់ខ្លួនសម្រាប់ខ្លួនឯងផងដែរ ។

ការលើកយកចំណុចវិជ្ជមានរបស់ខ្លួនមកនិយាយប្រាប់ខ្លួនឯង ជាវិធីសាស្ត្រលើកទឹកចិត្តផ្ទាល់ខ្លួនល្អបំផុត និងជួយជំរុញឱ្យមនុស្សមានការគិតវិជ្ជមានគ្រប់ស្ថានភាព ព្រមទាំងគិតផ្សារភ្ជាប់ដោយដំណោះស្រាយវិជ្ជមាន និងមានប្រសិទ្ធភាពបំផុតសម្រាប់ខ្លួន ។ ទម្លាប់និយាយវិជ្ជមានពីខ្លួនឯង ផ្ទុយពីនិយាយដោយភាពអំនួតផ្ទាល់ខ្លួនទៅកាន់អ្នកដទៃ ។

គួររំលឹកថា ការគិតបែបវិជ្ជមានជាវិធីសាស្ត្រដោះស្រាយបញ្ហាដោយភាពឆ្លាតវៃសម្រាប់ការសិក្សា និងការងាររបស់មនុស្សនៅក្នុងរបត់រីកចម្រើនបច្ចេកវិទ្យានៅក្នុងសង្គម ។ ទម្លាប់គិតបែបវិជ្ជមានធ្វើឱ្យបុគ្គលមានសេរីភាពគំនិត ដោះស្រាយបញ្ហាបានលឿនរហ័ស បុគ្គលមានទំនាក់ទំនងល្អ ព្រមទាំងធ្វើការងារផ្ទាល់ខ្លួន និងការងារក្រុមប្រកបដោយទំនួលខុសត្រូវ៕