ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
លោក ម៉ើ មឿន ដែលជាអ្នកលេងចាប៉ីដងវែងប្រកបដោយវោហាស័ព្ទ មកពីខេត្តសៀមរាប បានក្លាយជាម្ចាស់ជ័យលាភីលេខ១ ពីមហោស្រពចាប៉ីដងវែងឆ្នាំ២០២៥ ដែលរៀបចំឡើងដោយក្រសួងវប្បធម៌ និងវិចិត្រសិល្បៈ ក្រោមប្រធានបទ “ចង់ចេះសម្លាប់អាចារ្យ ចង់បានផ្លែផ្កាយកភ្លេីងដុតគល់” កាលពីចុងសប្តាហ៍កន្លងទៅនេះ។
ម្ចាស់ជ័យលាភីចាប៉ីដងវែងឆ្នាំ២០២៥នេះ និយាយថា ក្នុងនាមជាអ្នកសិល្បៈផ្នែកចាប៉ីម្នាក់ និងជាគ្រូបង្រៀនផ្នែកចាប៉ីនេះ លោកពិតជាមានមោទនភាពដែលអាចយកឈ្នះ បេក្ខជនដែលប្រកួតដទៃទៀត ជាពិសេសអាចសម្រេចក្ដីស្រមៃរបស់ខ្លួនឯងដែលមានជាយូរណាស់មកហើយ។ លោក ម៉ើ មឿន បន្តថា អ្វីដែលអាចធ្វើឱ្យលោកទទួលបានជ័យលាភីលេខមួយនេះ គឺការយកចិត្តទុកដាក់ ខិតខំប្រឹងប្រែង និងធ្វើបែបណាឱ្យទាក់ទងនឹងប្រធានបទក្នុងការប្រកួត ពន្យល់នូវអត្ថន័យឱ្យបានក្បោះក្បាយជាដើម។
លោក ម៉ើ មឿន លើកឡើងថា ចាប៉ីដងវែងជានិមិត្តរូបនៃចំណេះដឹង វប្បធម៌ និងអត្តសញ្ញាណរបស់ជាតិកម្ពុជា ទោះបីជាឧបករណ៍ភ្លេងខ្មែរមានច្រើនក្រៃក្ដី ប៉ុន្តែចំណង់ចំណូលចិត្ត និងសមត្ថភាពក្នុងផ្នែកចាប៉ីនេះ ធ្វើឱ្យលោកមិនអាចចាកឆ្ងាយ និងឃ្លៀតចេញពីចាប៉ីដងវែងបានឡើយ ព្រោះឧបករណ៍នេះពិតជាមានតម្លៃយ៉ាងក្រៃសម្រាប់លោក ក៏ដូចជាកូនខ្មែរជំនាន់ក្រោយ។
គួរបញ្ជាក់ដែរថា ក្នុងការប្រកួតចាប៉ីដងវែង កាលពីឆ្នាំ២០០៤ លោក ម៉ើ មឿន ក៏ធ្លាប់ទទួលបានជ័យលាភីលេខ៣ ក្នុងការប្រឡងមហោស្របចាប៉ីដងវែងនាគ្រានោះ ហើយក្នុងឆ្នាំ២០២៥នេះ លោកក៏បានក្លាយជាបេក្ខជនជ័យលាភីលេខ១ ក្នុងមហោស្របចាប៉ីដងវែងឆ្នាំ២០២៥។
យ៉ាងណាក៏ដោយ លោក ម៉ើ មឿន លើកទឹកចិត្តដល់កូនខ្មែរ ក៏ដូចជាយុវជនជំនាន់ក្រោយ សូមចូលរួមរៀនសូត្រ និងថែរក្សាចាប៉ី និងឧបករណ៍ភ្លេងខ្មែរផ្សេងទៀតឱ្យបានច្រើន និងគង់វង្ស បើពុំនោះទេ ឧបករណ៍ទាំងនោះអាចប្រឈមនឹងការបាត់បង់ដោយសារមិនសូវមានធនធានបន្តកេរ្តិ៍ដំណែលនេះ។
មហោស្រពចាប៉ីដងវែងទូទាំងប្រទេសប្រចាំឆ្នាំ២០២៥ បានប្រព្រឹត្តទៅចាប់ពីថ្ងៃទី១១ ដល់ថ្ងៃទី១៣ ខែមិថុនា សប្តាហ៍កន្លងទៅនេះ ក្រោមប្រធានបទ “ទំពាំងស្នងឫស្សី” ដែលបានរៀបចំដោយនាយកដ្ឋានសិល្បៈទស្សនីយភាព នៃក្រសួងវប្បធម៌ និងវិចិត្រសិល្បៈ ក្នុងគោលបំណងថែរក្សា និងលើកតម្លៃវប្បធម៌ប្រពៃណី អត្តសញ្ញាណជាតិ ក៏ដូចជាចូលរួមលើកទឹកចិត្តសិល្បករ សិល្បការិនី និងជំរុញទម្រង់សិល្បៈបុរាណមួយនេះកាន់តែផុសផុល៕
