ភ្នំពេញ- យុទ្ធនាការ១០០កោដិសំឡេង ដើម្បី​លើក​កម្ពស់សិទ្ធិស្រ្តី និងក្មេងស្រី ត្រូវ​បានយុវជន​មួយ​ក្រុម​ដែល​មក​ពី​ទីកន្លែងផ្សេងគ្នា រៀបចំប្រារព្ធធ្វើ​ឡើង​កាលពីពេលថ្មីៗនេះ ដោយ​មានការ​ចូលរួមគាំទ្រពី ក្រុមយុវជន សកម្មជនស្ត្រី និងបុរសដែលធ្វើការលើកកម្ពស់សិទ្ធិស្ត្រី និងក្មេងស្រី។

យុទ្ធនាការ១០០កោដិសំឡេងនៅ​ក្នុង​ឆ្នាំ២០២៣នេះ ប្រារព្ធឡើងក្រោមមូលបទ “ក្រោកឡើងដើម្បីសេរីភាពរបស់ក្មេងស្រី និងស្ត្រីគ្រប់ចម្រុះភាព” ដោយ​មានគោលបំណងបង្កើតនូវវប្បធម៌ថ្មីដែលផ្សព្វផ្សាយទៅក្នុងសហគមន៍ដើម្បីបញ្ឈប់អំពើហិង្សាលើស្ត្រី លុបបំបាត់តួនាទីយេនឌ័រ និងស្វែងយល់បន្ថែមពីយេនឌ័រ តាមរយៈសាមគ្គីភាពនៃថាមពលសិល្បៈ និងការរាំដែលមានចម្រុះភាព។

កញ្ញា កែវ យ៉ារី ជាអ្នករៀបចំយុទ្ធនាការ១០០កោដិសំឡេង បាននិយាយថា យុទ្ធនាការ១០០កោដិសំឡេង គឺជាវេទិកាដ៏ល្អមួយដើម្បីផ្សព្វផ្សាយទៅដល់សាធារណៈជន។ សំឡេង និងសារនៃកម្មវិធីត្រូវបានឮតាមរយៈយុទ្ធនាការដ៏សកម្មនេះបានលឺទៅដល់ និងបង្កើតផលវិជ្ជមានដល់ក្រុមគ្រប់ចម្រុះភាពទាំងអស់ ហើយវាបានបង្ហាញពីរូបភាពដ៏ល្អមួយដល់សង្គមថា ការសហការគ្នារវាងគ្នានឹងគ្នា គឺជាភាពខ្លាំងដើម្បីទម្លាយបញ្ហាប្រឈមទាំងអស់។

កញ្ញា កែវ យ៉ារី អ្នករៀបចំយុទ្ធនាការ១០០កោដិសំឡេង

“តាងនាមសមាគមយុវជនមួយខ្ញុំចង់ឃើញ ការចូលរួមកាន់តែច្រើនពីដៃគូពាក់ព័ន្ធ និងសាធារណៈជនបន្តទៀត ដើម្បីសេរីភាពពេញលេញនិងការគោរពសិទ្ធិមនុស្សនាពេលអនាគត”

កញ្ញា ទេព រចនា ដែលបានចូលរួមក្នុងថ្ងៃយុទ្ធនាការ១០០កោដិសំឡេង បាននិយាយថា កញ្ញាសប្បាយចិត្តពេលដែលឃើញបងប្អូនស្រីៗ អ៊ុំ ពូមីង និងមនុស្សចម្រុះជាច្រើនចូលរួមយុទ្ធនាការមួយរយកោដិសំឡេង ពីព្រោះការប្រយុទ្ធតស៊ូដើម្បីសិទ្ធិ និងសេរីភាពរបស់ក្មេងស្រី និងស្ត្រីពិតជាមានសារៈសំខាន់។ ទន្ទឹមគ្នា កម្មវិធីមួយនេះ ផ្ដល់ឱ្យយើងនូវកន្លែងសុវត្ថិភាពក្នុងការបញ្ចេញសំឡេងរបស់ពួកយើង ក៏ដូចជាពេលមួយដែលយើងអាចយល់ដឹងបន្ថែមអំពីសិទ្ធិសេរីភាពរបស់យើង ។

ជាមួយគ្នានេះ យុទ្ធនាការ១០០កោដិសំឡេង ក៏មានការរាំដោយមិនកំណត់ស្តង់ដារ ការចាក់បញ្ចាំងរឿងខ្លីៗ ការលេងហ្គេមកម្សាន្តឆ្លើយសំណួរទាក់ទងនឹងយុទ្ធនាការដើម្បីទទួលបានរង្វាន់ ការសរសេរពីការប្ដេជ្ញាចិត្តក្នុងការលុបបំបាត់អំពើហិង្សាលើក្មេងស្រី និងស្ត្រីគ្រប់ចម្រុះភាព និងស្តង់ជាច្រើនដែលមានព័ត៌មានពីអង្គការនានាដែលបានសហការគាំទ្រយុទ្ធនាការមួយនេះ។ ក្រៅពីសកម្មភាពនៅថ្ងៃយុទ្ធនាការផ្ទាល់ក្រុមយុវជន ក៏បានរៀបចំសកម្មភាពតាមអនឡាញ ដូចជា ការប្រកួតប្រជែងសេរីភាពនៃគំនិតច្នៃប្រឌិត (Art Competition) និងកិច្ចពិភាក្សាផ្សាយផ្ទាល់នៅលើផេក Facebook ក្រោមប្រធានបទ “ក្មេងស្រី និងស្ត្រីគ្រប់ចម្រុះភាព និងក្រោកឡើងដើម្បីបញ្ឈប់អំពើហិង្សាផ្អែកលើយេនឌ័រ” ។

បើយោងតាមរបាយការណ៍អង្គការសហប្រជាជាតិ ស្ត្រីម្នាក់ក្នុងចំណោម ៣នាក់ បានរងការវាយដំ ឬចាប់រំលោភក្នុងអំឡុងពេលពេញមួយជីវិតរបស់ពួកគាត់។ ស្ថិតិនេះ ស្មើនឹងជាង ១០០កោដិនាក់ ដូច្នោះហើយទើបមានការបង្កើតឱ្យមានយុទ្ធនាការនេះឡើង នៅថ្ងៃបុណ្យនៃក្តីស្រឡាញ់កាលពីឆ្នាំ២០១២ ក្នុងគោលបំណងប្រមូលផ្ដុំសំឡេងមនុស្ស១០០កោដិនាក់ ឬលើសពីនេះ ដើម្បីចូលរួមលុបបំបាត់អំពើហិង្សាលើក្មេងស្រី និងស្ត្រីគ្រប់ចម្រុះភាព៕