ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ប្រសិនបើមានទម្លាប់ចំណាយពេលតាមដានរឿងរ៉ាវនៅលើបណ្ដាញសង្គម ហើយមានអារម្មណ៍ថា អ្នកហាក់ដូចជាកំពុងបាត់បង់អ្វីមួយ ឬតាមមិនទាន់អ្នកដទៃលើរឿងអ្វីមួយ នោះទំនងជាអ្នកយល់ច្បាស់ហើយអំពីអារម្មណ៍ FOMO ។
អារម្មណ៍ភ័យខ្លាចគេល្អជាង ឬតាមមិនទាន់គេ (Fear of missing out) សំដៅលើអារម្មណ៍ ឬការយល់ឃើញ ដែលថា អ្នកដទៃកំពុងរស់នៅសប្បាយចិត្តជាង មានជីវិតល្អប្រសើរជាង និងមានបទពិសោធន៍ជីវិតល្អជាងអ្នក។ អារម្មណ៍នេះ នាំឱ្យមានចិត្តច្រណែន ហើយមានឥទ្ធិពលខ្លាំង លើការឱ្យតម្លៃខ្លួនឯង។
ការស្រាវជ្រាវបង្ហាញថា បញ្ហា FOMO មានផលអវិជ្ជមានជាច្រើន ជាពិសេស គឺបញ្ហាផ្លូវចិត្ត ដែលអាចកើតលើមនុស្សគ្រប់វ័យ ខណៈក្មេងជំទង់ជាវ័យដែលងាយរងគ្រោះជាងគេ។
ក្មេងជំទង់មានទំនោរប្រើប្រាស់បណ្ដាញសង្គមក្នុងអត្រាខ្ពស់។ យោងតាមការស្ទង់មតិរបស់ Gallup ឆ្នាំ២០២៣ បានបង្ហាញថា ក្មេងជំទង់អាម៉េរិកជាងពាក់កណ្ដាលរាយការណ៍ថា ចំណាយពេលយ៉ាងហោចណាស់ ៤ម៉ោងក្នុងមួយថ្ងៃនៅជាមួយបណ្ដាញផ្សព្វផ្សាយសង្គម ដូចជា Instagram, YouTube, TikTok, Facebook និង X (អតីត Twitter) ។
ក្មេងជំទង់ក៏ជាវ័យមួយ ដែលងាយរងគ្រោះក្នុងការប្រៀបធៀបខ្លួនឯង ទៅនឹងអ្នកដទៃ។ ជាលទ្ធផល អារម្មណ៍ FOMO អាចមានឥទ្ធិពលខ្លាំងលើពួកគេ ហើយជារឿយៗមានឥទ្ធិពលអវិជ្ជមានលើជីវិតក្មេងជំទង់ ដែលចំណាយពេលច្រើនលើបណ្ដាញសង្គម។
យ៉ាងណាក៏ដោយ មនុស្សគ្រប់វ័យអាចជួបប្រទះ FOMO នេះបើផ្អែកតាមការសិក្សាជាច្រើនបានរកឃើញ។ ការសិក្សាមួយ នៅក្នុងទិនានុប្បវត្តិស្រាវជ្រាវចិត្តវិទ្យា បានរកឃើញថា ការភ័យខ្លាចគេល្អជាង ឬហ្វូម៉ូ (FOMO) នេះ មានទំនាក់ទំនងទៅនឹងការប្រើប្រាស់ស្មាតហ្វូន និងបណ្ដាញសង្គមច្រើន ហើយបញ្ហានេះ កើតឡើងលើមនុស្សគ្រប់ភេទ និងគ្រប់វ័យទាំងអស់។
ការស្រាវជ្រាវ ដែលបានចេញផ្សាយនៅលើ World Journal of Clinical Cases បានរកឃើញថា បញ្ហាហ្វូម៉ូ (FOMO) លើក្មេងជំទង់មួយចំនួន អាចនាំឱ្យពួកគេ មានបញ្ហាថប់បារម្ភ បាក់ទឹកចិត្ត ឱ្យតម្លៃខ្លួនឯងទាប និងអាចធ្វើសកម្មភាពគ្រោះថ្នាក់។
ការស្រាវជ្រាវក៏បង្ហាញដែរថា FOMO អាចប៉ះពាល់ដល់ការពេញចិត្តនឹងជីវិតរបស់ខ្លួន ហើយទម្លាប់នេះ រួមចំណែកនាំឱ្យមានការគិតអវិជ្ជមាន និងយល់ថា ជីវិតខ្លួនឯងមិនល្អគ្រប់គ្រាន់។
ការកាត់បន្ថយអារម្មណ៍ FOMO
ការស្រាវជ្រាវបង្ហាញថា FOMO អាចកើតចេញពីការមិនសប្បាយចិត្ត ឬការមិនពេញចិត្តក្នុងជីវិត ហើយអារម្មណ៍ទាំងនេះ អាចជំរុញឱ្យអ្នកប្រើប្រាស់បណ្ដាញសង្គមកាន់តែច្រើន។ បញ្ហាគឺនៅត្រង់ថា កាលណា ដែលអ្នកចំណាយពេលនៅជាមួយបណ្ដាញសង្គមកាន់តែច្រើន អ្នកនឹងកាន់តែមានអារម្មណ៍មិនល្អ មិនពេញចិត្តនឹងខ្លួនឯង។
ដើម្បីដោះបញ្ហា FOMO សកម្មភាពដំបូងគឺ ត្រូវផ្លាស់ប្ដូរការផ្ដោតអារម្មណ៍ តាមរយៈការរក្សាទុកមនុស្សវិជ្ជមាន នៅលើបណ្ដាញសង្គមរបស់អ្នកឱ្យបានច្រើន ហើយកាត់បន្ថយតាមដានមនុស្សដែលមានទំនោរអួតអាង ឬអ្នកធ្វើសកម្មភាព ដែលមិនគាំទ្រផ្លូវចិត្តអ្នក។
លើសពីនេះ ត្រូវព្យាយាមផ្ដាច់ខ្លួន ពីបច្ចេកវិទ្យាឌីជីថល (Digital Detox)។ បើទោះបីជាមិនអាចផ្ដាច់ខ្លួនទាំងស្រុងពីបច្ចេកវិទ្យាឌីជីថលក៏ដោយ អ្នកអាចព្យាយាមកាត់បន្ថយពេលវេលា ដើម្បីភ្ជាប់ខ្លួនជាមួយបច្ចេកវិទ្យាឌីជីថល។ ម្យ៉ាងទៀត ការសរសេរកំណត់ហេតុប្រចាំថ្ងៃ ក៏ជាជម្រើសល្អផងដែរ ដោយអ្នកអាចផ្ដោតលើការសរសេរសកម្មភាពសប្បាយ ឬការចងចាំល្អ ដែលអ្នកបានធ្វើជារៀងរាល់ថ្ងៃ។
ចំណុចមួយទៀត គឺព្យាយាម ភ្ជាប់ទំនាក់ទំនង ក្នុងជីវិតជាក់ស្ដែង។ នៅពេល អ្នកមានអារម្មណ៍បាក់ទឹកចិត្ត ឬថប់បារម្ភ ការភ្ជាប់ទំនាក់ទំនងជាមួយមិត្តភក្ដិ ឬមនុស្សជិតស្និទ្ធ គឺជាសកម្មភាពល្អមួយ ដែលជួយឱ្យអារម្មណ៍របស់អ្នកប្រសើរឡើង៕
