ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការអាននាំមកនូវភាពសប្បាយរីករាយ ហើយអាចឱ្យយើងយល់ដឹងពីចំណេះដឹងថ្មីៗជាច្រើន។ ការចំណាយពេលអានជាមួយកូនរបស់លោកអ្នកអាចជួយពង្រឹងទំនាក់ទំនងរវាងអាណាព្យាបាលនឹងកូន ព្រមទាំងបង្កើតអនុស្សាវរីយដ៏អស្ចារ្យជាមួយកូនតូចរបស់អ្នក។ ការអានក៏គាំទ្រឱ្យកុមារក្នុងការស្វែងរកពាក្យ គំនិត និងចំណាប់អារម្មណ៍ថ្មីផងដែរ។
អង្គការយូណេស្វេហ្វ ដែលធ្វើការងារពាក់ព័ន្ធជាមួយការអភិវឌ្ឍកុមារ បានបង្ហាញវិធីចំនួន៥ ដែលអាចជួយឪពុកម្តាយទាំងឡាយ ក្នុងការបង្រៀនកូនឱ្យចូលចិត្តការអាន៖
ចាប់ផ្តើមភ្លាម
ការអានសៀវភៅឱ្យទារកទបើនឹងកើតស្តាប់ ជួយផ្តល់ឱ្យពួកគេនូវការចាប់ផ្តើមដ៏ល្អបំផុតក្នុងជីវិត។ ទារករៀនភាសាពីមនុស្សធំ ដែលនិយាយពាក្យដដែលៗ និងអានឱ្យគេស្តាប់។ នៅពេលអ្នកអានឱ្យកូនតូចរបស់អ្នកស្តាប់ សូមរៀបរាប់អំពីតួអង្គ និងវត្ថុនៅក្នុងសៀវភៅ ឬធ្វើត្រាប់សំឡេងសត្វ។ ការបញ្ចេញសំឡេងរបស់អ្នក ជួយផ្តល់អត្ថន័យដល់ពាក្យនីមួយៗ និងរូបភាពដែលពួកគេកំពុងឃើញ។
ធ្វើជាគំរូ
វាជារឿងសំខាន់ក្នុងការធ្វើឱ្យកុមារមើលឃើញថា ការអានគឺមានភាពសប្បាយរីករាយ មិនមែនជាកិច្ចការពិបាកនោះទេ។ វិធីដែលប្រសើរមួយដើម្បីបង្រៀនកូនៗរបស់អ្នកឱ្យចូលចិត្តការអាន គឺធ្វើជាគំរូដល់ពួកគេ! ប្រសិនបើកូនៗរបស់អ្នកឃើញអ្នកអានញឹកញាប់ ពួកគេអាចនឹងធ្វើតាម។ វិធីនេះ ក៏នឹងជួយពួកគេឱ្យចេញឆ្ងាយពីការប្រើប្រាស់ឧបករណ៍អេឡិចត្រូនិចផងដែរ។
ប្តូរវេនគ្នាអាន
នៅពេលកូនរបស់អ្នកកាន់តែធំ សូមប្តូរវេនគ្នាអានឱ្យលឺៗដាក់គ្នាទៅវិញទៅមក។ ប្រសិនជាកូនរបស់អ្នកទើបចាប់ផ្តើមអានដំបូង អ្នកអាចឱ្យពួកគេចង្អុលអក្សរ និងពាក្យដែលពួកគេស្គាល់។ នៅពេលអ្នកកំពុងអានជាមួយគ្នា អ្នកអាចសួរពួកគេពីអ្វីដែលគេកំពុងអាន។ ឧទាហរណ៍ “តើកូនគិតថា នឹងមានអ្វីកើតឡើងបន្ទាប់មកទៀត? ” ហេតុអ្វីបានជាកូនគិតថា ដំរីធ្វើយ៉ាងដូច្នេះ?”។
ស្តាប់កូនរបស់អ្នក
នៅពេលដែលកូនរបស់អ្នកធំឡើង សូមយកចិត្តទុកដាក់ចំពោះចំណង់ចំណូលចិត្តរបស់ពួកគេ។ ប្រសិនបើពួកគេចូលចិត្តប្រធានបទណាមួយ ដូចជាសត្វដាយណូស័រ សូមស្វែងរកសៀវភៅអំពីប្រធានបទនោះឱ្យពួកគេអាន។ ការធ្វើបែបនេះ ជួយពន្យល់ប្រាប់ពួកគេថា ការអានជួយឱ្យយើងយល់ដឹងបន្ថែមអំពីអ្វីៗដែលយើងយកចិត្តទុកដាក់ ហើយកូនរបស់អ្នកអាចនឹងអានប្រសិនបើប្រធានបទនោះ និយាយអំពីសត្វដាយណូស័រដែលពួកគេចូលចិត្ត។
បង្កើតជាទម្លាប់
ដើម្បីធ្វើឱ្យការអានក្លាយជាផ្នែកដ៏រីករាយក្នុងជីវិតកូនរបស់អ្នក អ្នកត្រូវចាប់ផ្តើមបញ្ចូលសៀវភៅទៅក្នុងទម្លាប់ប្រចាំថ្ងៃរបស់ពួកគេ។ អ្នកអាចបង្កើតពេលវេលាអានសៀវភៅមុនពេលចូលគេង ឬពេលកំពុងធ្វើដំណើរ។ ខណៈពេលដែលអ្នកអានជាមួយគ្នា អ្នកត្រូវធ្វើយ៉ាងណាកុំឱ្យទូរស័ព្ទ និងទូរទស្សន៍រំខាន។ ពេលអានគួរជាពេលវេលាសម្រាប់អ្នក និងកូនតែប៉ុណ្ណោះ។
ដូច្នេះសូមឪពុកម្តាយទាំងអស់បង្កើតទម្លាប់សិក្សាពេញមួយជីវិតសម្រាប់កូនរបស់អ្នក ដោយធ្វើឱ្យការអានក្លាយជាផ្នែកមួយនៃទម្លាប់ប្រចាំថ្ងៃ៕
