បន្ទាប់ពីទិវាជាតិអាហារូបត្ថម្ភ​ជាតិលើកទី១១ ដែលបានប្រារព្ធធ្វើ​ឡើង​កាលពីខែវិច្ឆិកា ឆ្នាំទៅ យុទ្ធនាការ “គ្រប់គ្រាន់” នៅថ្នាក់ក្រោមជាតិ ក្រោម​កិច្ច​សហការ​រវាង​ក្រុមប្រឹក្សា​អភិវឌ្ឍន៍​កសិកម្ម និង​ជនបទ (CARD) និងអង្គការ​ទស្សនៈពិភពលោក បានចាប់ផ្តើមធ្វើនៅខេត្តចំនួន៥ក្នុង​ប្រទេស​កម្ពុជា ដើម្បីលើក​កម្ពស់​ការ​យល់ដឹងអំពី​បញ្ហា​កង្វះ​អាហារូបត្ថម្ភ​របស់​កុមារ និង​លើក​កម្ពស់​ការ​យល់ដឹងពីជម្រើស​អាហារ​ដែលមាន​សុខភាពល្អ​។

អ្នកស្រី ឈឹម រតនា ប្រធានយុទ្ធនាការអង្គការទស្សនៈពិភពលោកនៅកម្ពុជាមានប្រសាសន៍ថា ចក្ខុវិស័យនៃយុទ្ធនាការគ្រប់គ្រាន់ គឺដើម្បីកែលម្អការផលិតអាហារប្រកបដោយជីវជាតិគ្រប់គ្រាន់ដែលផ្តល់អត្ថប្រយោជន៍ដោយផ្ទាល់ដល់កុមារនៅកម្ពុជា។ អ្នកស្រីថា ចក្ខុវិស័យនេះនឹងមិនអាចសម្រេចបានទេ បើគ្មានការសម្របសម្រួល និងកិច្ចសហប្រតិបត្តិការដ៏រឹងមាំជាមួយក្រសួង ស្ថាប័ននានា នៃរាជរដ្ឋាភិបាល ដៃគូអភិវឌ្ឍន៍ វិស័យឯកជន និងសាធារណជននោះទេ។

បញ្ហាកង្វះអាហារូបត្ថម្ភរបស់កុមារនៅតែជាបញ្ហាដ៏គួរឱ្យព្រួយបារម្ភ ដោយមានកុមារចំនួន ២១,៩% ក្រោមអាយុ៥ឆ្នាំ មានកម្ពស់ទាបធៀបនឹងអាយុរបស់ពួកគេ (ក្រិសក្រិន)។ យុទ្ធនាការជាសកល “គ្រប់គ្រាន់” ដែលភាសាអង់គ្លេសហៅថា “ENOUGH” មានគោលដៅដើម្បីបង្កើនអាហារូបត្ថម្ភសម្រាប់កុមារ និងសន្តិសុខស្បៀង នៅកម្ពុជាក្នុងអំឡុងពេលបីឆ្នាំបន្តបន្ទាប់ទៀត។

ក្នុងឱកាសសម្ពោធយុទ្ធនាការនៅខេត្តកំពង់ឆ្នាំង កាលពីថ្ងៃទី១២ ខែកុម្ភៈ ឆ្នាំ២០២៥ ឯកឧត្តមបណ្ឌិត អ៊ុក ម៉ាការ៉ា អនុប្រធានក្រុមប្រឹក្សាអភិវឌ្ឍន៍កសិកម្ម និងជនបទ (CARD) បានមានប្រសាសន៍​ដោយ​អំពាវនាវដល់រដ្ឋបាលថ្នាក់ក្រោមជាតិ ដៃគូអភិវឌ្ឍន៍ អង្គការសង្គមស៊ីវិល វិស័យឯកជន និងប្រជាពលរដ្ឋទាំងអស់ ឱ្យបន្តយកចិត្តទុកដាក់ និងអនុវត្តភារកិច្ចរបស់ខ្លួនរួមគ្នា ដើម្បីលុបបំបាត់កង្វះអាហារូបត្ថម្ភគ្រប់ទម្រង់ និងរួមចំណែកដល់ការអភិវឌ្ឍធនធានមនុស្ស និងសង្គម បង្កើនប្រសិទ្ធភាពការងារ និងជំរុញកំណើនសេដ្ឋកិច្ចជាតិឆ្ពោះទៅសម្រេចគោលដៅអភិវឌ្ឍន៍ប្រកបដោយចីរភាពកម្ពុជា ឆ្នាំ២០៣០ និងចក្ខុវិស័យកម្ពុជា ឆ្នាំ២០៥០។

ចាប់តាំងពីការបើកការសម្ពោធយុទ្ធនាការក្នុងខែវិច្ឆិកា ឆ្នាំ២០២៤ អង្គការទស្សនៈពិភពលោកបានប្រើប្រាស់បណ្តាញសង្គមឌីជីថលដើម្បីផ្សព្វផ្សាយទៅដល់អ្នកប្រើប្រាស់បណ្តាញសង្គមប្រមាណ ២៥០ ០០០នាក់ និងគ្រោងនឹងពង្រីកការផ្សព្វផ្សាយរបស់ខ្លួនក្នុងប៉ុន្មានខែខាងមុខនេះ ជាមួយនឹងសារផ្លាស់ប្តូរឥរិយាបថ ដើម្បីលើកកម្ពស់ជម្រើសអាហារដែលមានសុខភាពល្អ។

ស្របគ្នានេះដែរ ចាប់ពីខេត្តបន្ទាយមានជ័យ ដល់ខេត្តក្រចេះ យុទ្ធនាការនេះបានសម្រេចដោយមានការចូលរួមពីសំណាក់ប្រជាជនជាង១៥០០០នាក់ ដែលចូលរួមក្នុងសកម្មភាពរស់រវើក ជំរុញជម្រើសអាហារដែលមានសុខភាពល្អ និងការផ្លាស់ប្តូរឥរិយាបថ។ តារាល្បីៗដូចជា ឃុន សំអន ជ័យលាភី MasterChef រដូវកាលទី ៣ និងក្រុមតារាចម្រៀង D-Man បានប្តេជ្ញាគាំទ្រយុទ្ធនាការនេះ និងពង្រីកសារសំខាន់ៗដល់យុទ្ធនាការនេះ។ ជាពិសេសតារាល្បី ឃុន សំអន បានបង្ហាញការចម្អិនអាហារនៅបន្ទាយមានជ័យ ដោយជំរុញការបរិភោគអាហារក្នុងស្រុក ខណៈដែលក្រុម D-Man បានដឹកនាំសកម្មភាពដើម្បីចូលរួមជាមួយទស្សនិកជននៅសៀមរាប និងទូទាំងប្រទេសកម្ពុជា តាមរយៈបណ្តាញទំនាក់ទំនងសង្គមឌីជីថល៕