សម្រាប់ឆ្នាំ២០២៥នេះ ជា​យុទ្ធសាស្រ្ត ក្រសួងការងារ និង​បណ្តុះបណ្តាលវិជ្ជាជីវៈ នឹងបន្ត​ពង្រីកធ្វើការ​ផ្សព្វផ្សាយ​ពីការ​បណ្តុះបណ្តាលជំនាញ បច្ចេកទេស និង​វិជ្ជាជីវៈ ១,៥លាននាក់ ឱ្យ​កាន់តែផុសផុលថែមទៀត តាមរយៈ​បណ្តាញ​សារព័ត៌មាន បណ្តាញសង្គម បញ្ជរសេវាសាធារណៈរបស់ក្រសួងការងារ សិល្បៈកសិល្បៈការិនីជាដើម ដោយ​ធ្វើ​យ៉ាង​ណាបានជ្រួបជ្រាបទៅដល់យុវជន ក៏​ដូចជា​គ្រួសារយុវជន ឱ្យ​មក​ទទួលការ​ចុះឈ្មោះ​ចូលរៀន​ជំនាញវិជ្ជាជីវៈ និង​បច្ចេកទេស ដើម្បី​ឱ្យ​គេ​ក្លាយទៅជា​កម្លាំង​ពលកម្មជំនាញរបស់​កម្ពុជា។ នេះ បើតាម​ការ​លើកឡើងរបស់ ឯកឧត្តម កត្តា អ៊ន មន្រ្តីជាន់ខ្ពស់ និង​ជាអ្នកនាំពាក្យ​ក្រសួងការងារ និង​បណ្តុះបណ្តាលវិជ្ជាជីវៈ។

ឯកឧត្តម កត្តា អ៊ន មានប្រសាសន៍ថា កម្មវិធីបណ្តុះបណ្តាល​បច្ចេកទេស និង​វិជ្ជាជីវៈ ១លាន៥សែននាក់ គឺជា​កម្មវិធីពិសេសមួយ​របស់រាជរដ្ឋាភិបាលអាណត្តិទី៧ ក្នុងការកៀរគរយុវជនដែលបានបោះបង់ការសិក្សា​កន្លងមក និងយុវជន​ដែលពុំមានជំនាញ​ឱ្យ​ចូលរៀនជំនាញវិជ្ជាជីវៈ និង​បច្ចេកទេស ដើម្បី​ឱ្យ​ពួកគេមានជំនាញ​មួយ​សម្រាប់ជីវិត។ ឯកឧត្តមបន្តថា បច្ចុប្បន្ន​​តម្រូវ​ការ​ក្នុងវិស័យ​ការងារ គឺកំពុងតែត្រូវ​ការ​កម្លាំង​ពលកម្មជំនាញ ដូច្នេះ ប្រសិន​បើ​យុវជន​គ្មាន​ជំនាញ នោះពួកគេ​នឹង​មិន​អាច​ទទួលបានការងារធ្វើនោះទេ ដូច្នេះ​ហើយ​បានជា​រាជរដ្ឋាភិបាលប្រឹងប្រែងក្នុង​ការ​បណ្តុះបណ្តាល ដើម្បី​ឱ្យ​យុវជន​ទទួលបានជំនាញ ដើម្បីទទួលបាន​ការងារធ្វើ។

យោង​តាម​របាយការណ៍​របស់​អគ្គនាយកអប់រំ​បណ្តុះបណ្តាលបច្ចេកទេស និង​វិជ្ជាជីវៈ កម្មវិធី​បណ្តុះបណ្តាលជំនាញ​វិជ្ជាជីវៈ និង​បច្ចេកទេស ១,៥លាននាក់ ដែលរាជរដ្ឋាភិបាល​បានប្រកាស​ដាក់​ឱ្យ​អនុវត្ត​កាលពីចុងឆ្នាំ២០២៣ ទទួលបានការ​គាំទ្រពី​គ្រប់មជ្ឈដ្ឋាន ប៉ុន្តែចំនួន​សិស្ស​ចុះឈ្មោះ​ចូលរៀន​នៅ​មិន​ទាន់មាន​ចំនួន​ច្រើន​នៅឡើយ។ បើតាម​តួលេខ ក្នុងឆ្នាំ២០២៤ សិស្ស​ដែលបាន​ចុះឈ្មោះ​ចូលរៀន​ក្នុង​កម្មវិធី​បណ្តុះបណ្តាលជំនាញ ១,៥លាននាក់ មានសរុបចំនួន ៨៥ ៦៣៩នាក់ ក្នុងនោះ​សិស្ស​ដែលបញ្ចប់ការសិក្សា​មាន​ចំនួន ១៧ ១៨០នាក់, កំពុងសិក្សាមានចំនួន ២៨ ០៩០នាក់, ទទួលបានការងារធ្វើ ១០ ១០៨នាក់ ហើយ​ក៏​មានសិស្សបោះបង់ចំនួន ៦៥៤៦នាក់។

បើតាម​ប្រសាសន៍ ឯកឧត្តម កត្តា អ៊ន ការបោះបង់ការសិក្សា​របស់សិស្ស​ គឺមាន​ចំនួនតិចតួច ដោយ​គេ​បានរកឃើញ​មូលហេតុ​ថា ការបោះបង់ទាំងនោះ ព្រោះយុវជន​មួយ​ចំនួន​បានប្តូរចិត្តទៅរៀនជំនាញ ឬវិស័យផ្សេង ហើយ​ខ្លះ​បានទៅធ្វើការងារកំឡុងពេលនៃការរង់ចាំវគ្គសិក្សា។ យ៉ាងណាក៏ដោយ ឯកឧត្តមអ្នកនាំពាក្យ បានលើកទឹកចិត្ត​​ទៅ​ដល់យុវជនដែលចង់ចុះឈ្មោះ​រៀនជំនាញ​បច្ចេកទេស និងវិជ្ជាជីវៈ សូមពិចារណា​ឱ្យបានដិតដល់ ដើម្បីរង់ចាំ​ចូលរៀន​ជំនាញ​ដែល​ខ្លួនពេញចិត្ត ជាតម្រូវ​ការ​ទីផ្សារការងារ។ ឯកឧត្តមមានប្រសាសន៍បញ្ជាក់ថា ការរៀនជំនាញពីកម្មវិធី ១,៥លាននាក់ គឺប្រើរយៈពេលខ្លី ហើយ​មានការងារធ្វើ ទទួល​បាន​ប្រាក់ខែសមរម្យ ហើយ​សម្រាប់​យុវជន​មក​ពី​គ្រួសារក្រីក្រ និង​គ្រួសារ​ងាយរងហានិភ័យ គឺចូលរៀន​ដោយ​មិនបង់ប្រាក់ ហើយ​ទទួល​បាន​ប្រាក់​ឧបត្ថម្ភ​ចំនួន ២៨ម៉ឺន​រៀល​ក្នុង​មួយខែថែមទៀត។

គួរ​ជំរាបជូនថា កម្មវិធីបណ្តុះបណ្តាលជំនាញ​វិជ្ជាជីវៈ និង​បច្ចេកទេស ដល់​យុវជន​មក​ពី​គ្រួសារក្រីក្រ និង​គ្រួសារងាយរងហានិភ័យ នៅទូទាំង​ប្រទេស​ចំនួន ១,៥លាននាក់ ត្រូវ​បានផ្តួចផ្តើម​ឡើង​ដោយ​សម្តេចអគ្គមហាសេនាបតីតេជោ ហ៊ុន សែន ហើយ​កម្មវិធីត្រូវ​បាន​សម្រេចមហាបវធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រ​កម្ពុជា ដាក់បញ្ចូល​ទៅ​ក្នុង​យុទ្ធសាស្រ្ត​បញ្ចកោណដំណាក់កាលទី១ និង​បាន​ប្រកាសជា​កម្មវិធី​គោលនយោបាយ​អាទិភាព ១ ក្នុង​ចំណោម​ ៦ របស់រាជរដ្ឋាភិបាល។ កម្មវិធីនេះ មានគោលបំណង ផ្តល់នូវ​ជំនាញ​មួយ​យ៉ាង​តិចប្រចាំជីវិត ដល់​យុវជន​មក​ពីគ្រួសារក្រីក្រ និង​គ្រួសារ​ងាយរងហានិភ័យ និង​យុវជន នៃសេដ្ឋកិច្ច​ក្រៅប្រព័ន្ធ និង​ក្នុង​ប្រព័ន្ធ ដើម្បីទទួលបាន​ឱកាស​ការងារ ឬ បង្កើត​ការងារ​ដោយ​ខ្លួនឯង​ប្រកប​ដោយ​ភាព​ម្ចាស់ការ មានគុណភាព និង​ផលិតភាពខ្ពស់ សម្រាប់ផ្គត់ផ្គង់ និង​ឆ្លើយតប​បាន​តាមតម្រូវ​ការ​ទីផ្សារ​ប្រកបដោយ​ចីរភាព ភាពធន់ និង​បរិយាបន្ន។

ដើម្បីឱ្យ​ឆ្លើយតបទៅនឹង​តម្រូវ​ការ​ទីផ្សារ​ការងារ ក្រសួងការងារ និង​បណ្តុះបណ្តាល​វិជ្ជាជីវៈ បានកំណត់យក​មុខ​ជំនាញ​ចំនួន ៤៥ ក្នុងវិស័យ​អាទិភាព​ចំនួន១០ មក​ធ្វើការ​បណ្តុះបណ្តាល​យុវជន​ក្នុង​កម្មវិធី ១,៥លាននាក់នេះ ដោយ​វិស័យទាំងនោះ​រួមមាន ៖ វិស័យសំណង់, អគ្គិសនី និង​ថាមពល, អេឡិចត្រូនិក, បរិក្ខារត្រជាក់ និង​កំដៅ, កម្មន្តសាល, មេកានិក/មេកានិករថយន្ត, ទេសចរណ៍, សេវាកម្ម, កសិកម្ម និងកសិ-ឧស្សាហកម្ម, វិស័យ​ធុរកិច្ច និង​ព័ត៌មានវិទ្យា៕