ភ្នំពេញ – សាកលវិទ្យាល័យ International University of Health and Welfare ប្រទេសជប៉ុនប្រកាសជ្រើសរើសនិស្សិតឆ្នាំមូលដ្ឋាន និងឆ្នាំទី២ផ្នែកវេជ្ជសាស្ត្រនៃសាកលវិទ្យាល័យវិទ្យាសាស្ត្រសុខាភិបាលឆ្នាំសិក្សា២០២២-២០២៣ ។ អាហារូបករណ៍ផ្ដល់ការសិក្សារយៈពេល៦ឆ្នាំដែលនឹងចាប់ផ្ដើមនៅខែមេសា ឆ្នាំ២០២៤ និងសិក្សាពីឆ្នាំទី១ឡើងវិញ ។

លក្ខខណ្ឌក្នុងការជ្រើសរើសបេក្ខជននឹងត្រូវឆ្លង២ដំណាក់កាល ដោយទី១ឆ្លងកាត់ការជ្រើសរើសដោយសាកលវិទ្យាល័យវិទ្យាសាស្ត្រសុខាភិបាល ។ ទី២ ជាការជ្រើសរើសដោយតំណាងសាកលវិទ្យាល័យ International University of Health and Welfare តាមរយៈការប្រឡងលើមុខវិជ្ជាដែលបានសិក្សានៅកម្រិតមធ្យមសិក្សាទុតិយភូមិ រួមមានគណិតវិទ្យា វិទ្យាសាស្ត្រ និងភាសាអង់គ្លេស (បេក្ខជនអាចជ្រើសរើសមុខវិជ្ជាចំនួន២ ក្នុងចំណោមមុខវិជ្ជាវិទ្យាសាស្ត្រចំនួន៣មាន គីមីវិទ្យា ជីវវិទ្យា និងរូបវិទ្យា) និងការសម្ភាសន៍ផ្ទាល់មាត់ជាភាសាអង់គ្លេស ឬជាភាសាជប៉ុន ។

សិស្សានុសិស្សអាចទាញយកពាក្យសុំអាហារូបករណ៍ និងកម្រងសំណួរស្ដីពីសុខភាព (Self-Declaration Health Questionnaire) តាមរយៈ https://t.ly/ZEWV ។ ការទទួលពាក្យសម្រាប់និស្សិតឆ្នាំមូលដ្ឋានផ្នែកវេជ្ជសាស្ត្រសូមបំពេញពាក្យសុំអាហារូបករណ៍ និងកម្រងសំនួរស្ដីពីសុខភាពរួចស្កែនឯកសារទាំង២រួមជាមួយចាំបាច់ជា pdf រួចផ្ញើទៅតាម Email: Lounghsoklay@uhs.edu.kh និង panhamen1994@uhs.edu.kh ។

សម្រាប់និស្សិតឆ្នាំទី២ នៃមហាវិទ្យាល័យវេជ្ជសាស្ត្រ សូមបំពេញពាក្យអាហារូបករណ៍ និងកម្រងសំនួរស្ដីពីសុខភាព រួចស្កែនឯកសារទាំង២ និងភ្ជាប់ជាមួយឯកសារចាំបាច់ជា pdf រួចផ្ញើទៅកាន់ Email: tannsoksreya@uhs.edu.kh និង molikahen@uhs.edu.kh ។

បេក្ខជនដែលមានចំណាប់អារម្មណ៍ក្នុងការដាក់ពាក្យត្រូវភ្ជាប់ឯកសារចាំបាច់មួយចំនួនដូចជា ពាក្យសុំអាហារូបករណ៍១ច្បាប់ កម្រងសំណួរស្ដីពីសុខភាព១ច្បាប់ វិញ្ញាបនបត្របណ្ដោះអាសន្នមធ្យមសិក្សាទុតិយភូមិ (ស្កែនច្បាប់ដើម) ១ច្បាប់ ព្រឹត្តិបត្រពិន្ទុថ្នាក់ឆ្នាំសិក្សាមូលដ្ឋានជាភាសាអង់គ្លេសចំពោះនិស្សិតឆ្នាំទី២(ស្កែនច្បាប់ដើម) ១ច្បាប់ សញ្ញាបត្រ IELTS Test Report Form ឬលិខិតបញ្ជាក់កម្រិតភាសាអង់គ្លេសកម្រិតខ្ពស់បំផុត(ថ្មីៗ ឬក្រោយបំផុត)ស្កែនច្បាប់ដើម១ច្បាប់ ។ លើសពីនេះ លិខិតបញ្ជាក់ការសិក្សាជាភាសាអង់គ្លេស (ស្កែនច្បាប់ដើម) ១ច្បាប់ និងលិខិតឆ្លងដែន ស្កែនច្បាប់ដើម១ច្បាប់(ប្រសិនបើមាន) ។

គួរបញ្ជាក់ដែរថា បេក្ខជន-បេក្ខនារីដែលបានជ្រើសរើសនឹងទទួលបានការសិក្សាថ្នាក់ត្រៀមភាសាជប៉ុន គណិតវិទ្យា វិទ្យាសាស្ត្រ និងភាសាអង់គ្លេសរហូតដល់ខែមីនា ឆ្នាំ២០២៤ មុនចូលរៀននៅសាលាវេជ្ជសាស្ត្រនៃសាកលវិទ្យាល័យ IUHM នៃប្រទេសជប៉ុន ។

ចាប់ទទួលពាក្យពីថ្ងៃផ្សាយដំណឹងរហូតដល់ថ្ងៃទី២៦ ខែឧសភា ឆ្នាំ២០២៣ វេលាម៉ោង ១៧:០០នាទី ៕