យុវជន Kairan Quazi ដែលបានក្លាយជាវិស្វករក្មេងជាងគេនៅក្រុមហ៊ុន SpeceX របស់មហាសេដ្ឋីពិភពលោក Elon Musk នៅអាយុ១៤ឆ្នាំ បានចាកចេញពីក្រុមហ៊ុននេះ នៅត្រឹមវ័យ ១៦ឆ្នាំ ទៅចូលរួមជាមួយក្រុមហ៊ុនថ្មីឈ្មោះ quant trading firm Citadel Securities ។

បើតាមសម្ដីរបស់ Kairan Quazi បានលើកឡើងថា «បន្ទាប់ពីចំណាយពេល ២ឆ្នាំធ្វើការនៅ SpaceX ខ្ញុំមានអារម្មណ៍ត្រៀមខ្លួនរួចជាស្រេច ដើម្បីទទួលយកនូវបញ្ហាប្រឈមថ្មីៗ និងពង្រឹងជំនាញរបស់ខ្ញុំ នៅក្នុងបរិយាកាសការងារ ដែលមានការប្រកួតប្រជែងខ្ពស់មួយទៀត។ Citadel Securities បានផ្ដល់នូវវប្បធម៌ការងារ ដែលមានមហិច្ឆតាស្រដៀងគ្នា ប៉ុន្តែស្ថិតក្នុងវិស័យថ្មីទាំងស្រុង​ ដែលនេះ គឺជារឿងដែលគួរឱ្យរំភើបសម្រាប់ខ្ញុំ។»

អ្នកនាំពាក្យក្រុមហ៊ុនបាននិយាយថា Quazi នឹងធ្វើការលើហេដ្ឋារចនាសម្ព័ន្ធពាណិជ្ជកម្មសកល ដែលស្ថិតនៅចំណុចប្រសព្វ នៃវិស្វកម្ម និងការដោះស្រាយបញ្ហាបរិមាណ ដោយការងារ តម្រូវឱ្យសហការជាមួយពាណិជ្ជករ និងវិស្វករ។

ដំណើរនៃអាជីពការងាររបស់ Quazi គឺមានលក្ខណៈមិនធម្មតាតាំងពីដើមមកម្ល៉េះ។ នៅអាយុ ៩ឆ្នាំ Quazi បានផ្លោះពីការរៀនថ្នាក់ទី៣ ចូលរៀននៅវិទ្យាល័យសហគមន៍ ហើយធ្វើការនៅ Intel Labs នៅអាយុ ១០ឆ្នាំ រួចក៏ផ្ទេរទៅសាកលវិទ្យាល័យ Santa Clara នៅអាយុ ១១ឆ្នាំ បន្ទាប់មកបានក្លាយជានិស្សិតបញ្ចប់ការសិក្សាវ័យក្មេងបំផុតក្នុងប្រវត្តិសាស្ត្រសាលារយៈពេល ១៧២ឆ្នាំ, នេះបើយោងតាម Fortune ។

នៅឆ្នាំ២០២៣ គាត់បានធ្វើឱ្យសារព័ត៌មានធំៗជាច្រើនចាប់អារម្មណ៍ បន្ទាប់ពីក្រុមហ៊ុន SpaceX បានជ្រើសរើសគាត់ចូលធ្វើការ។ នៅពេលនោះ គាត់បានសរសើរក្រុមហ៊ុននេះថា ជាក្រុមហ៊ុនកម្រ ដែលជ្រើសរើសបុគ្គលិក ដោយមិនគិតពីអាយុ ប៉ុន្តែផ្ដោតលើភាពចាស់ទុំ និងសមត្ថភាព។ គាត់បន្តថា គាត់មិនបានទៅយកកាហ្វេ ឬធ្វើការលើគម្រោងតូចៗនោះទេ ប៉ុន្តែគាត់ទទួលខុសត្រូវក្នុងប្រព័ន្ធផលិតកម្មសំខាន់ៗ។

នៅឆ្នាំដដែលនោះ Quazi មានការប៉ះទង្គិចជាមួយ LinkedIn បន្ទាប់ពីក្រុមហ៊ុននេះ បានចាក់សោគណនីរបស់គាត់ ក្រោមហេតុផលថា គាត់មានអាយុក្រោម ១៦ឆ្នាំ ដោយហៅការសម្រេចចិត្តនេះថា «មិនសមហេតុផល និងមិនទំនង»។ នៅពេលដែលគណនីរបស់គាត់បានដំណើរការឡើងវិញ គាត់បានរិះគន់ប្រព័ន្ធអប់រំថា ការប្រឡងមិនត្រូវប្រើ ដើម្បីវាស់ស្ទង់សមត្ថភាព និងភាពស្ទាត់ជំនាញនោះទេ ប៉ុន្តែគួរតែប្រើដើម្បីវាស់ស្ទង់ សមត្ថភាពនៃការផ្ដល់ឱ្យរបស់បុគ្គលមកកាន់សង្គម។ ហើយបន្តថា សាលារៀនសម័យទំនើប ទទួលខុសត្រូវលើភាពភ័យខ្លាច និងកិត្យានុភាព ជាជាងការសិក្សា។

ពីរឆ្នាំក្រោយមក គាត់បានជ្រើសរើសក្រុមហ៊ុនហិរញ្ញវត្ថុ ជំនួសឱ្យក្រុមហ៊ុន AI និងក្រុមហ៊ុនបច្ចេកវិទ្យា។ លោកបាននិយាយថា ក្រុមហ៊ុនហិរញ្ញវត្ថុ Quant បានផ្ដល់នូវការរួមបញ្ចូលដ៏កម្រមួយ គឺ ភាពស្មុគស្មាញ និងបញ្ហាប្រឈមផ្នែកបញ្ញា ដែលការស្រាវជ្រាវ AI បានផ្ដល់ឱ្យ ហើយក្នុងល្បឿនមួយកាន់តែលឿន។ លោកបានបន្ថែមថា Citadel Securities លទ្ធផលអាចត្រូវបានគេមើលឃើញថា ក្នុងមួយថ្ងៃ មិនមែនមួយខែ ឬមួយឆ្នាំនោះទេ៕