ក្នុងដំណើរទស្សនកិច្ចចុះ​ពិនិត្យការរៀន និងបង្រៀន នៅសាលាមត្តេយ្យសិក្សាធនធាន ក្រុងបាត់ដំបង កាលពីពេលថ្មីៗនេះ ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា មានប្រសាសន៍ថា ការបញ្ជូនកុមារទៅចូលរៀននៅកម្រិតមត្តេយ្យសិក្សាជាមួយគ្រូបង្រៀនមានវិជ្ជាជីវៈច្បាស់លាស់ ជួយជំរុញដល់ការលូតលាស់ផ្នែកសង្គម បញ្ញា អារម្មណ៍ និងកាយសម្បទា។

ឯកឧត្ដមបណ្ឌិតសភាចារ្យបញ្ជាក់ថា ការលូតលាស់របស់កុមារតូចក្នុងរយៈពេល ១០០០ថ្ងៃដំបូង ជាពេលវេលាមួយដែលខួរក្បាលរបស់ពួកគេកំពុងលូតលាស់លឿន ហើយទាមទារឱ្យមានការថែទាំឱ្យបានម៉ត់ចត់ ទទួលបានអាហារូបត្ថម្ភគ្រប់គ្រាន់ និងពេញលេញតាំងពីនៅក្នុងពោះម្ដាយ ដើម្បីកាត់បន្ថយអត្រាមរណភាពមាតា និងធានាបាននូវការលូតលាស់ខួរក្បាលប្រកបដោយប្រសិទ្ធភាព។

ដូចនេះ ការបញ្ជូនកុមារទៅចូលរៀននៅកម្រិតមត្តេយ្យសិក្សា ដែលគ្រូបង្រៀនមានវិជ្ជាជីវៈច្បាស់លាស់ គឺមានសារៈសំខាន់ណាស់ ដោយនឹងជួយជំរុញដល់ការលូតលាស់ផ្នែកសង្គម បញ្ញា អារម្មណ៍ និងកាយសម្បទារបស់ពួកគេតាមរយៈសកម្មភាពរៀន និងការលេងជាក្រុមជាដើម ដែលជាមូលដ្ឋានគ្រឹះដ៏រឹងមាំសម្រាប់ដំណាក់កាលសិក្សាបន្ទាប់។

រដ្ឋមន្ត្រីក្រសួងអប់រំ បន្ថែមថា មាតាបិតា អ្នកអាណាព្យាបាលគួរតែយកចិត្តទុកដាក់ខ្ពស់លើការផ្ដល់នូវអន្តរសកម្មភាព និងការរំញោចនានាដល់កុមារតូច ដើម្បីជៀសវាងការទុកចោល ដែលអាចប៉ះពាល់ដល់ការអភិវឌ្ឍរបស់ពួកគាត់។

ក្នុង​ឱកាស​នោះ ឯកឧត្ដមបណ្ឌិតសភាចារ្យ ហង់ជួន ណារ៉ុន បានថ្លែងអំណរគុណដល់អង្គការជំនួយជប៉ុន និងភាគីពាក់ព័ន្ធទាំងអស់ ដែលបានខិតខំប្រឹងប្រែងរហូតសម្រេចបានជាសាលារៀនគំរូ។ ទន្ទឹមគ្នានេះ ក្រសួងនឹងបន្តជួយគាំទ្រ និងជំរុញការអភិវឌ្ឍវិស័យមត្តេយ្យសិក្សាឱ្យកាន់តែរីកចម្រើនថែមទៀត ដើម្បីកសាងធនធានមនុស្ស ប្រកបដោយសក្តានុពល ឆ្ពោះទៅសម្រេចចក្ខុវិស័យកម្ពុជាឆ្នាំ២០៣០ និងឆ្នាំ២០៥០។

គួរជំរាបជូនថា សាលាមត្តេយ្យសិក្សាធនធាន ក្រុងបាត់ដំបង គឺជាសាលារដ្ឋដែលមានកម្មវិធីចម្រុះ ដូចជាកម្មវិធីរៀនតាមរយៈការលេង រៀនតាមប្រធានបទ សិក្សាលម្អិត និងកម្មវិធីរៀនតាមបែបឌីជីថល។ សាលាមានកម្មវិធីជាច្រើនទៀតដូចជា កម្មវិធីអាហារពេលព្រឹកដែលផ្តល់អាហារូបត្ថម្ភសម្រាប់កុមារ ដោយមានគោលបំណងកាត់បន្ថយកង្វះអាហាររូបត្ថម្ភសម្រាប់កុមារ មានកម្មវិធីសិក្សាក្រៅម៉ោង ថ្នាក់ភាសាចិន អង់គ្លេស កម្មវិធីសិក្សាពីបំណិនរកចំណូល តន្រ្តី និងសិល្បៈ។ កន្លងមកនេះ សាលាត្រូវបានទទួលស្គាល់គុណភាពអប់រំ ដោយទទួលបានជ័យលាភីជាច្រើន និងទទួលបានចំណាត់ថ្នាក់លេខ២ ជាអង្គភាពផ្តល់សេវាសាធារណៈគំរូផ្នែកអប់រំទូទាំងប្រទេសសម្រាប់ឆ្នាំ២០២៣-២០២៤៕