ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
បច្ចេកទេសចិត្តសាស្ត្រ ដែលអាចចាក់ទម្លុះភាពខ្ជិលរបស់កុមារបាន គឺការជំរុញលើកទឹកចិត្ត (Positive Reinforcement), នេះបើតាមការបញ្ជាក់របស់អ្នកជំនាញផ្នែកកុមារតូច។
លោក អ៊ីង វន្នី អ្នកជំនាញផ្នែកអប់រំកុមារតូច និងជាស្ថាបនិក និងនាយកប្រតិបត្តិ Kinder Early Learning (KEL) មានប្រសាសន៍ថា មានកត្តាជាច្រើនដែលបណ្ដាលឱ្យកុមារខ្ជិលច្រអូស និងមិនចង់ជួយការងារផ្ទះ និងសិក្សារៀនសូត្រ។ ប៉ុន្តែក្នុងនាមជាឪពុកម្ដាយ ត្រូវដឹងពីចិត្តសាស្ត្រកុមារ ថា កុមារជាមនុស្សដែលចង់បានការចាប់អារម្មណ៍ ការឱ្យតម្លៃ និងលើកទឹកចិត្ត ហេតុនេះប្រសិនបើចង់ឱ្យកុមារមានទម្លាប់ល្អ និងឧស្សាហ៍ព្យាយាម ឪពុកម្ដាយ ត្រូវឧស្សាហ៍សរសើរ និងលើកទឹកចិត្តកុមារ នៅពេលដែលពួកគេ ធ្វើរឿងល្អៗ ដូចជា ធ្វើកិច្ចការសាលា ជួយការងារផ្ទះ បោសផ្ទះ ឬយកសំរាមចោលជាដើម។
“នៅពេលកូនធ្វើរឿងល្អៗ ឪពុកម្ដាយ ត្រូវសរសើរកុមារ ឬបង្ហាញអារម្មណ៍រីករាយទៅកាន់កុមារ ដោយអាចនិយាយពាក្យសាមញ្ញៗ ដូចជា អរគុណណាស់កូន ម៉ាក់ ឬប៉ា ពិតជាសប្បាយចិត្តខ្លាំងណាស់ កូនបានជួយការងារផ្ទះម៉ាក់ហើយ កូនថែមទាំងចេះបំណិនជីវិតទៀត…”
លោកបន្តថា ការសង្កេត ឱ្យតម្លៃ និងសរសើរលើសកម្មភាព ដែលកុមារបានធ្វើ នឹងក្លាយជាកម្លាំងជំរុញឱ្យកុមារចង់ធ្វើសកម្មភាពនោះម្ដងហើយម្ដងទៀត។ ព្រោះកុមារ ចង់បានចំណាប់អារម្មណ៍ពីមនុស្សចាស់ និងចង់បានការសរសើរ លើកទឹកចិត្តពីសំណាក់ឪពុកម្ដាយ។
ដោយឡែកចំពោះអាកប្បកិរិយា ដែលមិនចង់ឱ្យកុមារធ្វើ អ្នកជំនាញរូបនេះ ណែនាំថា ប្រសិនបើអាកប្បកិរិយានោះតូចតាចទេ ឪពុកម្ដាយ អាចធ្វើមិនដឹង, ប្រសិនបើល្មមៗទេ ត្រូវជជែក ណែនាំ ប៉ុន្តែប្រសិនបើជារឿងធំ ត្រូវដាក់វិន័យ។ លោកសង្កត់ធ្ងន់ថា នេះជាយុទ្ធសាស្ត្រ របស់អ្នកចិត្តសាស្ត្រ ក្នុងការជំរុញឱ្យកុមារចង់ធ្វើកិច្ចការអ្វីមួយ ហើយវិធីសាស្ត្រនេះ ក៏ត្រូវបានគេប្រើក្នុងវិស័យជំនួញផងដែរ។
“ការធ្វើឱ្យកុមារទទួលអារម្មណ៍ថា គេទទួលបានរង្វាន់ពិតជាសំខាន់ណាស់ ដែលរង្វាន់នោះអាចជាការសរសើរ ផ្ដល់កាដូ ការចំណាយពេលវេលាជាមួយគេ ការនាំដើរលេង ឬក៏មើល Ipad ឬទូរស័ព្ទ រយៈពេល ១៥នាទីជាដើម“
អ្នកជំនាញកុមារតូចរូបនេះ បញ្ជាក់ថា អាកប្បកិរិយាអវិជ្ជមានរបស់កុមារភាគច្រើនកើតឡើង នៅពេលដែលកុមារធ្វើល្អ ឪពុកម្ដាយ ឬមនុស្សចាស់ មើលមិនឃើញ។ ហេតុនេះ ប្រសិនបើគេ ធ្វើល្អមិនទទួលបានការចាប់អារម្មណ៍ គេនឹងធ្វើអាក្រក់ ដូចជា ការវាយគេ ឬធ្វើសកម្មភាពអវិជ្ជមានណាមួយ ដើម្បីទទួលបានចំណាប់អារម្មណ៍៕
