ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
របាយការណ៍លទ្ធផលអ្នកធ្វើតេស្ត IELTS ឆ្នាំ២០២៣-២០២៤ សម្រាប់ប្រទេសចំនួន ៣៩ ជុំវិញពិភពលោក បានបង្ហាញថា បេក្ខជនមកពីប្រទេសម៉ាឡេស៊ី ទទួលបានពិន្ទុមធ្យមខ្ពស់បំផុត ក្នុងចំណោមប្រទេសនៅតំបន់អាស៊ីអាគ្នេយ៍ ដោយប្រទេសនេះទទួលបានពិន្ទុជាមធ្យម ៧,១ លើពិន្ទុពេញ ៩,០ពិន្ទុ។ លទ្ធផលនេះ តាមពីក្រោយដោយ ហ្វីលីពីន ៦,៨ ពិន្ទុ, ឥណ្ឌូនេស៊ី ៦,៧ ពិន្ទុ, មីយ៉ាន់ម៉ា ៦,៦ ពិន្ទុ និងវៀតណាម ៦,២ពិន្ទុ។
លទ្ធផលបានបង្ហាញថា ពិន្ទុ IELTS របស់ប្រទេសក្នុងតំបន់អាស៊ីអាគ្នេយ៍ទាំងនេះ គឺខ្ពស់ជាង ប្រទេសចិន និងជប៉ុន ដែលទទួលបានពិន្ទុមធ្យម ៥,៩ ពិន្ទុ។
បេក្ខជនរបស់ម៉ាឡេស៊ីទទួលបានពិន្ទុល្អជាងគេក្នុងវិញ្ញាសាស្ដាប់ ដោយទទួលបានពិន្ទុមធ្យម ៧,៥ ពិន្ទុ, វិញ្ញាសាអាន ៧,២ ពិន្ទុ, វិញ្ញាសានិយាយ ៦,៨ពិន្ទុ និងវិញ្ញាសាសរសេរ ៦,៤ពិន្ទុ។ ដោយឡែក សម្រាប់ពិន្ទុក្នុងវិញ្ញាសានិយាយ ទាំងម៉ាឡេស៊ី និងហ្វីលីពីន ទទួលបានពិន្ទុមធ្យម ៦,៨ ពិន្ទុដូចគ្នា។
ចំពោះលទ្ធផល ជាសកល ម៉ាឡេស៊ី និងអេស្ប៉ាញ ទទួលបានពិន្ទុនាំមុខគេ ដោយប្រទេសទាំង ២នេះ ទទួលបានពិន្ទុ ៧,១ និងតាមពីក្រោយដោយ អ៉ីតាលី ដែលមានពិន្ទុមធ្យម ៧,០ពិន្ទុ។ ប្រទេសទាំង ៣នេះ ក៏មានភាគរយ អ្នកធ្វើតេស្ត បានពិន្ទុ ៨,០ ឬខ្ពស់ជាងនេះ ច្រើនជាងប្រទេសដទៃផងដែរ។ ក្នុងនោះ បេក្ខជនមកពីម៉ាឡេស៊ី មាន ២៥ភាគរយ, បេក្ខជនមកពីអេស្ប៉ាញមាន ២៣ភាគរយ និងបេក្ខជនមកពីអ៉ីតាលីមាន ១៩ភាគរយ។
សម្រាប់កម្ពុជា សន្ទស្សន៍ជំនាញភាសាអង់គ្លេសប្រចាំឆ្នាំរបស់ស្ថាប័ន EF English Proficiency Index ដែលមានប្រទេសចូលរួមចំនួន ១១៣ បានបង្ហាញថា កម្ពុជាជាប់ចំណាត់ថ្នាក់លេខ ៩៨ ក្នុងចំណោមប្រទេសទាំង ១១៣។ ខណៈក្នុងប្រទេសកម្ពុជា ភាសាអង់គ្លេស ត្រូវបានប្រើប្រាស់ក្នុងការធ្វើអាជីវកម្មសាកល និងត្រូវបានប្រជានជនឱ្យតម្លៃខ្ពស់ ។ ក្រៅពីអង់គ្លេស ភាសាបារាំង និងចិន ក៏ត្រូវបានប្រើប្រាស់យ៉ាងទូលំទូលាយផងដែរ។
រឿងដែលគួរឱ្យចាប់អារម្មណ៍មួយសម្រាប់កម្ពុជាគឺ ទីក្រុងភ្នំពេញ ត្រូវបានគេចាត់ទុកថា ជាទីក្រុង ដែលប្រើប្រាស់ភាសាអង់គ្លេស ក្នុងកម្រិតល្អបំផុតនៅតំបន់អាស៊ីអាគ្នេយ៍។
គួរជម្រាបជូនថា IELTS គឺជាការធ្វើតេស្តសមត្ថភាពភាសាអង់គ្លេស ដែលទទួលស្គាល់យ៉ាងទូលំទូលាយ ពីសំណាក់ស្ថាប័នជាង ១២,៥០០ នៅទូទាំងពិភពលោក ក្នុងនោះរួមទាំងស្ថាប័នអប់រំដ៏មានកិត្យានុភាព និយោជក និងអាជ្ញាធរអន្តោប្រវេសន៍។ ជារៀងរាល់ឆ្នាំ ការធ្វើតេស្ត IELTS មានច្រើនជាង 4 លានដង បានធ្វើឡើងនៅទូទាំងពិភពលោក៕
