មុខខ្មុក​ហនុមាន ដែល​គេធ្លាប់ឃើញតួអង្គពាក់សម្តែង​នៅ​ក្នុងទម្រង់​ល្ខោនខោល ត្រូវ​បានគរុនិស្សិត​មួយ​ក្រុម នៃវិទ្យាស្ថានជាតិអប់រំ យក​មក​ច្នៃប្រឌិតជាទម្រង់ថ្មីមួយ​ ក្នុងការ​ប្រើ​ប្រាស់​ជា​សម្ភារៈឧបទេស​ជំនួយ​ក្នុងការ​បង្រៀនរបស់លោកគ្រូអ្នកគ្រូ ទៅ​លើមុខវិជ្ជា​អក្សរសិល្ប៍ខ្មែរ។ គំនិតនៃការច្នៃប្រឌិតដោយ​ប្រើទម្រង់មុខខ្មុកហនុមាន ជា​សម្ភារឧបទេស​បង្រៀននេះ ក៏​ត្រូវ​បានជាប់ជ័យលាភីលេខ១ ក្នុង​ពិព័រណ៌អប់រំ​ស្នាដៃស្រាវជ្រាវ​របស់​គរុនិស្សិត​កាលពីពេលថ្មីៗនេះផងដែរ។

លោក សឹម ឆៃ គរុនិស្សិត​បរិញ្ញាបត្រ​+២ ឯកទេស​អក្សរសាស្រ្តខ្មែរ ដែលជា​ប្រធានក្រុម ដឹកនាំក្នុងការ​ផលិត​សម្ភារ​ឧបទេសមួយ​នេះ និយាយថា ការដែល​ក្រុមរបស់លោក​ជ្រើសរើសប្រធានបទនវានុវត្តន៍ វិទ្យាសាស្ត្រសង្គម ដោយការប្រើ​រូបហនុមាន តាមគំរូមុខខ្មុក គឺមកពីការស្រឡាញ់សិល្បៈចម្លាក់ដែលផ្សារភ្ជាប់ខ្លឹមសារមេរៀនផ្នែកអក្សរសិល្ប៍ខ្មែរ។

សម្ភារៈ​ឧបទេស ដែល​ប្រើ​គំនូរ​ខ្មុក ហនុមាន នេះ ត្រូវ​បាន​រចនា​ឡើង​នៅ​លើផ្ទៃស្នោ​ដែលមានទំហំ​មួយម៉ែត្រ​បួនជ្រុង។ បើតាម​លោក សឹម ឆៃ ក្នុងការ​បង្កើតរូបនេះឡើង គឺបានឆ្លង​កាត់​នូវ​ដំណាក់​កាល​ចំនួន៣ ​រួមមាន ទី១ ការព្រាងគំនូរនៅលើក្រដាស ដោយគូររូបហនុមាននៅលើក្រដាសមួយផ្ទាំងធំ, ទី២. ត្រៀមសម្ភារៈផលិតធ្វើពីស្នោ បន្ទាប់ពីបានគំនូរព្រាង ដោយមានស្នោ កាំបិត កាវទៀន ជក់ ទឹកថ្នាំ និង ទី៣. កាត់ផ្គុំ យកសម្ភារដែលធ្វើជាពុម្ពគំរូរួចរាល់មកកាត់ និងផ្គុំតាមផ្នែកនីមួយៗ ដោយបិទកាវ និងលាបពណ៌ ក៏ដូចជាតុបតែងឱ្យមានសោភ័ណភាពស្អាត និងទាក់ទាញ។

លោក សឹម ឆៃ និយាយថា សម្ភារឧបទេសនេះ គឺបានបំផុស​គុណតម្លៃ​របស់តួអង្គហនុមាន ដែលមានឥទ្ធិពលក្នុងសង្គមខ្មែរ ទាំងផ្នែកវប្បធម៌ និងសង្គមខ្មែរ ក្នុងនោះវិស័យអក្សរសាស្រ្ត វិស័យកងទ័ព ជំនឿ ឈ្មោះទីកន្លែង សុទ្ធតែមាន ហនុមាននៅក្នុងសង្គមខ្មែរ ដោយយោងតាមឯកសារមានប្រភពច្បាស់លាស់។

ប្រធានក្រុមរូបនេះបន្ថែមថា លក្ខណៈពិសេសដែល ធ្វើ​ឱ្យ​រូបមុខហនុមាននេះ ទទួលបានជ័យលាភីឆ្នើម នៃគ្រឿង​ឧបទេស​ដែលមានភាពច្នៃប្រឌិត ក៏ដោយសារស្នាដៃនេះ មានសោភ័ណភាពល្អ និងធ្វើដោយយកចិត្តទុកដាក់ ហើយចំណុចពិសេស គឺមានភស្ដុតាងជាឯកសារយោងត្រឹមត្រូវ ដែលសមាជិកក្រុមបានព្យាយាមស្រាវជ្រាវ ចងក្រងជាអត្ថបទ បញ្ចូលព័ត៌មានទាក់ទងជាមួយហនុមាន ដែលមានឥទ្ធិពលក្នុងសង្គមខ្មែរ រួមមាន វិស័យអក្សរសាស្រ្ត វិស័យកងទ័ព ជំនឿ ឈ្មោះទីកន្លែង ឈ្មោះរុក្ខជាតិឱសថ ជាដើម ទៅក្នុងរូបនោះ ។

កញ្ញា ពេជ្រ ស្រីពៅ ជាគរុនិស្សិតបរិញ្ញាបត្រ+២ ឯកទេសអក្សរសាស្រ្តខ្មែរ ជំនាន់ទី២ នៃវិទ្យាស្ថានជាតិអប់រំ ដែលជាសមាជិកក្នុងការបង្កើតសម្ភារៈ​នេះ និយាយថា ក្នុងការ​បង្កើតស្នាដៃមួយនេះ ចំពោះខ្លួន ក៏​ដូចជា​សមាជិក​ក្រុម ​គឺបានប្រឈមបញ្ហាមួយចំនួនដូចជាការបែងចែកពេលវេលា ដោយគរុនិស្សិតត្រូវរៀនផង ចុះកម្មសិក្សាផង និងការចំណាយថវិកាផ្ទាល់ខ្លួនទិញសម្ភារៈដើម្បីផលិតជាដើម ។ តែទោះយ៉ាងនេះក្ដី ក៏សមាជិកក្រុមទាំងអស់នៅតែសហការគ្នា ជួបជុំពិភាក្សាគ្នា និងលះបង់កម្លាំងកាយចិត្ត ព្រមទាំងថវិកាក្នុងការផលិតស្នាដៃនេះឱ្យចេញជារូបរាង។

ស្រីពៅ មានជំនឿថា ការផលិតស្នាដៃផ្នែកនវានុវត្តន៍ រូបហនុមាននេះ គឺនឹងចូលរួមចំណែកជួយ​ដល់គ្រូបង្រៀន និងសិស្សានុសិស្ស ជាពិសេសទៅលើមេរៀនអក្សរសិល្ប៍រឿងរាមកេរ្តិ៍ ដែលមានតួអង្គហនុមាន ដោយមកបង្ហាញសិស្សអំពីគុណសម្បត្តិ និងគុណវិបត្តិរបស់តួអង្គ។

ជាមួយគ្នានេះ កញ្ញា ពេជ្រ ស្រីពៅ ក៏លើកទឹកចិត្តដល់គរុនិស្សិតទាំងអស់ដែលនឹងចេញទៅបំពេញការងារជាគ្រូបង្រៀន ត្រូវបង្កើនភាពច្នៃប្រឌិត ផលិតស្នាដៃថ្មីៗ សម្រាប់ជាសម្ភារឧបទេសក្នុងការបង្រៀន និងរៀនឱ្យមានប្រសិទ្ធភាព ដើម្បីឱ្យសិស្សទទួលបានទាំងខ្លឹមសារមេរៀន និងការអនុវត្តជាក់ស្ដែង ជាពិសេសបំផុសសិស្សឱ្យមានការគិតស៊ីជម្រៅ បង្កើតអ្វីថ្មីៗស្របតាមបំណិនសតវត្សទី២១៕