ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងឱកាសបូកសរុបលទ្ធផល នៃសន្និបាតការងារអប់រំ យុវជន និងកីឡាឆ្នាំសិក្សា២០២៣-២០២៤ និងលើកទិសដៅការងារឆ្នាំសិក្សា ២០២៤-២០២៥ នាព្រឹកថ្ងៃទី២៦ ខែកុម្ភៈ ឆ្នាំ២០២៥នេះ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា បានលើកឡើងថា គ្រូបង្រៀនដែលគ្រោងនឹងចេញបង្រៀនថ្មី គឺត្រូវតែមានស្តង់ដាវិជ្ជាជីវៈខ្ពស់ ដើម្បីលើកកម្ពស់គុណភាពអប់រំ ឆ្លើយតបទៅនឹងការវិវឌ្ឍរបស់សង្គម។
ឯកឧត្តមបណ្ឌិតសភាចារ្យ ហង់ជួន ណារ៉ុន បានបង្ហាញពីសមាសភាគសំខាន់ចំនួន៣សម្រាប់គ្រូចេញថ្មី ដែលករួមមាន ទី១. ចំណេះដឹងទូលំទូលាយ និងខ្លឹមសារមេរៀន, ទី២. ចិត្តគរុកោសល្យ វិធីសាស្រ្តបង្រៀន ដឹងពីការវិវត្តរបស់សិស្ស និងទី៣. ចំណេះដឹងប្រើប្រាស់ច្ចេកវិទ្យា។
រដ្ឋមន្រ្តីក្រសួងអប់រំ មានប្រសាសន៍បន្ថែមថា ការបង្រៀនសិស្សដោយប្រើប្រាស់វិធីសាស្រ្តបង្រៀនថ្មី គឺជាការងារចាំបាច់ដើម្បីបណ្ដុះបំណិនសតវត្សទី២១ រួមមាន បំណិនត្រិះរិះពិចារណា បំណិនដោះស្រាយបញ្ហា បំណិនធ្វើការងារជាក្រុម បំណិនក្នុងការសហការ បំណិននៅក្នុងការទំនាក់ទំនង បំណិនបច្ចេកវិទ្យា បំណិនសហគ្រិនភាព ជាដើម។
បើតាមឯកឧត្តមបណ្ឌិតសភាចារ្យ ដើម្បីបណ្ដុះបំណិនសតវត្សទី២១ គ្រូបង្រៀនត្រូវតែមានវិធីសាស្រ្តបង្រៀនល្អ ជាពិសេសផ្ដោតលើវិទ្យាសាស្រ្តបច្ចេកវិទ្យា ដោយទាមទារនូវបន្ទប់ពិសោធន៍ បន្ទប់រៀនបែបទំនើប ទើបសិស្សរៀនមានប្រសិទ្ធភាព។ ក្នុងន័យនេះ ក្រសួងនឹងបន្តពង្រីកប្រើប្រាស់វិធីសាស្រ្តបង្រៀនថ្មីទៅក្នុងសាលាគំរូ និងសាលាផ្សេងទៀត ជាពិសេស គ្រឹះស្ថានបណ្ដុះបណ្ដាលគ្រូ ត្រូវតែអនុវត្តឱ្យបានពេញលេញនូវស្តង់ដាវិជ្ជាជីវៈគ្រូបង្រៀន។
គួរជម្រាបជូនថា វិទ្យាស្ថានគរុកោសល្យរាជធានីភ្នំពេញ បាននិងកំពុងអនុវត្តកម្មវិធីអប់រំគ្រូបង្រៀន ក្នុងគោលបំណងផលិតបាននូវគ្រូបង្រៀនដែលមានគុណសម្បទាពេញលេញ សម្រាប់ផ្គត់ផ្គង់ដល់តម្រូវការសាលារៀន ឆ្លើយតបនឹងកំណែទម្រង់អប់រំរបស់ក្រសួងអប់រំ យុវជន និងកីឡា ក៏ដូចជាចក្ខុវិស័យរបស់រាជរដ្ឋាភិបាល ក្នុងការកសាងមូលធនមនុស្សជាមូលដ្ឋាន ក្នុងការអភិវឌ្ឍប្រទេសជាតិ៕
