ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ថ្លែងក្នុងពិធីសម្ពោធសមិទ្ធផលកំណែទម្រង់វិទ្យាស្ថានជាតិអប់រំ និងពិធីប្រគល់សញ្ញាបត្រជូនដល់និស្សិត គរុនិស្សិត នៃវិទ្យាស្ថានជាតិអប់រំ នាព្រឹកថ្ងៃទី២១ ខែឧសភា សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា មានប្រសាសន៍លើកទឹកចិត្តដល់និស្សិតខ្មែរដែលកំពុងសិក្សានៅក្នុងស្រុក និងនៅប្រទេស ធ្វើការស្រាវជ្រាវ ចងក្រងឯកសារ និងតម្កល់ស្នាដៃទុកក្នុងបណ្ណាល័យឱ្យបានច្រើនសម្រាប់អ្នកសិក្សាជំនាន់ក្រោយ។
សម្ដេចធិបតី ហ៊ុន ម៉ាណែត មានប្រសាសន៍ថា ការង្កើតទម្លាប់សរសេរ ស្រាវជ្រាវ ហើយចងក្រងទុក គឺត្រូតែជំរុញឱ្យបានច្រើន។ ទន្ទឹមគ្នានេះ និក្ខេបបទផ្សេងៗដែលកូនខ្មែរសរសេរចប់ទាំងក្នុងប្រទេស និងក្រៅប្រទេស ត្រូវដាក់ក្នុងបណ្ណាល័យទុកឱ្យអ្នកជំនាន់ក្រោយស្រាវជ្រាវតាម។ ក្នុងន័យនេះ សម្ដេចជំរុញទឹកចិត្តក្នុងការចងក្រង និងរៀបរៀងឯកសារ ជាពិសេសរបកគំហើញ និងស្នាដៃនិស្សិតពីមួយជំនាន់ទៅមួយជំនាន់ រួមទាំងសាស្រ្តាចារ្យ គ្រូបង្រៀនផងដែរ។
នាយករដ្ឋមន្ត្រីកម្ពុជា បន្ថែមថា បើយើងជាអ្នកសិក្សា ទោះបច្ចេកវិទ្យាវិវត្តទៅដល់ណាក៏ដោយ កុំភ្លេចការអាន ការសរសេរ ការស្រាវជ្រាវ និងការចងក្រងទុក ទាំងនេះហើយដែលធ្វើឱ្យយើងមានចំណេះដឹងក្នុងខ្លួនពិតប្រាកដ។ សម្ដេចធិបតី ហ៊ុន ម៉ាណែត បន្តថា ការសិក្សាស្រាវជ្រាវ ទោះបីរាប់ពាន់ឆ្នាំ ប្រែប្រួលបច្ចេកវិទ្យាយ៉ាងណាក៏ដោយ មនុស្សនៅតែទៅមើលឯកសារដដែល។
“ខ្ញុំចង់ឃើញស្នាដៃ និងលទ្ធផលរបស់និស្សិត បញ្ញវន្ត កូនខ្មែរជាច្រើនមានឯកសារនៅក្នុងប្រទេស យ៉ាងហោចណាស់មានសៀវភៅក្នុងបណ្ណាល័យក្នុងប្រទេសឱ្យកាន់តែច្រើន។ ជាជាងស្រាវជ្រាវប្រវត្តិសាស្រ្តខ្មែរនៅលើទឹកដីខ្មែរ សុទ្ធតែបរទេសសរសេរឱ្យទៀត”
សម្ដេចធិបតី ហ៊ុន ម៉ាណែត សង្កត់ធ្ងន់ថា បញ្ហាចងក្រងឯកសារ មិនមែនតែរឿងអប់រំនោះទេ គឺមាននៅគ្រប់វិស័យទាំងអស់។ សម្ដេចធិបតី ក៏បានស្នើដល់និស្សិតខ្មែរទាំងអស់ មិនថារៀននៅក្រៅប្រទេស ក្នុងប្រទេស សូមយកឯកសារ ស្នាដៃមកតម្កល់ទុកឱ្យច្រើនមិនថា នៅបណ្ណាល័យសម្ដេចព្រះសង្ឃរាជ ជួន ណាត ឬបណ្ណាល័យនៅតាមសាកលវិទ្យាល័យនីមួយៗឡើយ។
គួរជំរាបជូនថា សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ក៏បានតម្កល់ស្នាដៃនិក្ខេបបទថ្នាក់អនុបណ្ឌិត និងបណ្ឌិត នៅក្នុងបណ្ណាល័យសម្ដេចព្រះសង្ឃរាជ ជួន ណាត ដើម្បីផ្ដល់ឱកាសឱ្យនិស្សិត និងអ្នកសិក្សាជំនាន់ក្រោយបានអាន និងស្រាវជ្រាវបន្តផងដែរ៕
