គីម ឌីណា ត្រូវ​បានគេស្គាល់ថា គឺជាអ្នកនិពន្ធសៀវភៅប្រលោមលោក និងសៀវភៅប្រភេទលើកទឹកចិត្ត ដ៏ពេញនិយមពីសំណាក់យុវវ័យ ។ ឌីណា រំលឹកថា ការណ៍ដែលអាចក្លាយ​ខ្លួនជាអ្នក​និពន្ធនេះ គឺផ្តើម​ឡើងកាលពីរូបនាង​រៀននៅថ្នាក់ទី៩ ដោយ​ពេលនោះ នាងមានឱកាសអានសៀវភៅប្រលោមលោកដែលមានចំណងជើងថា «អំពិលអំពែក» និពន្ធដោយកវីម្ចាស់ស្ទឹងសង្កែ គង្គ ប៊ុនឈឿន ។

ឌីណា រំលឹកបន្តថា អត្ថន័យនៅក្នុងអត្ថបទអក្សរសិល្ប៍នោះ បានធ្វើ​ឱ្យ​នាងនឹកគិតទៅដល់ពិភពមួយ ដែលនាងធ្លាប់តែស្រមៃចង់ឃើញពីមុនមក ប៉ុន្តែពុំដែលមានឱកាសទៅដល់ ។ ទន្ទឹមគ្នានោះ ឌីណា ក៏សង្ឃឹមថា នឹងឃើញឈ្មោះរបស់ខ្លួនមានចារនៅក្នុងក្របសៀវភៅដូចជាកវី ប៊ុនឈឿន ដែរ។

គីម ឌីណា

“ខ្ញុំចង់ធ្វើអ្វីមួយ ដែលធ្វើឱ្យគេអាន តាមរយៈការកម្សាន្តបាន អញ្ចឹងហើយទើបធ្វើឱ្យវាជះឥទ្ធិពលខ្លាំងទៅលើជីវិតខ្ញុំ ហើយដែលជាស្ពានធ្វើឱ្យខ្ញុំទៅអានសៀវភៅផ្សេងៗទៀត រហូតក្លាយខ្លួនជាអ្នកនិពន្ធ”

គិតត្រឹមបច្ចុប្បន្នសៀវភៅដែល ឌីណា បានបោះពុម្ពផ្សាយ សរុបមានចំនួន៨ក្បាល ។ ឌីណា បន្តឱ្យដឹងថា ស្នាដៃ ដែលអាចជួយលើកទឹកអ្នកអានបានច្រើនជាងគេគឺ «សៀវភៅមនុស្សបាក់ទឹកចិត្ត» ដោយហេតុថា វាបានសម្រួលដល់សុខភាពផ្លូវចិត្ត និងជាបំណែកមួយ នៃដំណោះស្រាយបញ្ហាទៅកាន់ប្រិយមិត្ត តាមរយៈខ្លឹមសារនៃនិយមន័យក្នុងអត្ថបទ ជាពិសេសអ្នកកំពុងស្ថិតក្នុងស្ថានភាពបាក់ទឹកចិត្ត ឬមានដំណើរជីវិតរស់នៅស្រដៀងគ្នានឹងអត្ថរសរបស់អ្នកនិពន្ធដែលបានរំលេចនៅក្នុងសៀវភៅនោះ។

អ្នកនិពន្ធរូបនេះបន្ថែមថា នៅក្នុងសៀវភៅមនុស្សបាក់ទឹកចិត្តមានបកស្រាយអំពីបទពិសោធន៍របស់អ្នកនិពន្ធផ្ទាល់នៅកំឡុងឆ្នាំ២០១៨ ហើយនៅក្នុងសៀវភៅទៀតសោធន៍ក៏មានសាច់រឿងខ្លីមួយក្នុងចំណោមរឿងខ្លីជាច្រើនក្រោមចំណងជើងថា «កូនអ្នកជិតខាង» ដែលរៀបរាប់អំពីការប្រៀបធៀប កូនរបស់ខ្លួនទៅនឹងកូនរបស់អ្នកដទៃ ការណ៍នេះគឺជាបញ្ហាមួយ ដែលនៅតែកើតមានឡើងនៅក្នុងសង្គមខ្មែរ ខណៈកម្លាំងចិត្តពីគ្រួសារពិសេសឪពុកម្តាយ គឺដើរតួនាទីយ៉ាងសំខាន់ជំរុញថាមពលវិជ្ជមានទៅកាន់កូនៗ។

បន្ថែមពីនោះ ឌីណា ក៏បានបញ្ជាក់ដែរថា ការប្រៀបធៀបរបស់ឪពុកម្តាយពេលខ្លះគឺគ្រាន់តែចង់ឱ្យឃើញថា កូនគេល្អប៉ុណ្ណោះ និងគិតថាជំរុញឱ្យកូនធ្វើបានល្អជាកូនគេ។ ប៉ុន្តែជាក់ស្តែងគឺមិនមែនបែបនោះទាំងស្រុងទេ, ឌីណា មើលឃើញថា វាមិនបានទាញផលវិជ្ជមានពីការប្រៀបធៀបឡើយ ថែមទាំងធ្វើឱ្យទំនាក់ទំនងរវាងឪពុកម្តាយកាន់តែឃ្លាតឆ្ងាយពីគ្នា។

គីម ឌីណា

“ខ្ញុំសង្កេតឃើញថា នៅក្នុងសង្គមខ្មែរយើងមួយចំនួនមានអាណាព្យាបាលយកកូនខ្លួនឯងទៅប្រៀបនឹងកូនអ្នកដទៃ អ្នកជិតខាង និងកូនបងប្អូន។ ជួនកាលមិនមែនកូនគាត់មិនល្អទេ ប៉ុន្តែគាត់ចង់ឱ្យកូនរបស់គាត់ល្អដូចកូនរបស់គេ វាធ្វើឱ្យអាណាព្យាបាល បានមើលរំលងចំណុចល្អៗរបស់កូនគាត់ កត្តាទាំងនេះហើយធ្វើឱ្យកុមារ ឬកូនបាក់ទឹកចិត្ត ចាប់ផ្តើមចែករំលែកជាមួយមិត្តភ័ក្តិច្រើនជាង”

ក្រៅតែពីកិច្ចការនិពន្ធសៀវភៅ និងការងារស្នូលប្រចាំថ្ងៃ ឌីណា ក៏បាននិយាយចែករំលែកទស្សនៈលើកទឹកចិត្ត នៅតាមបណ្តាញសង្គមផងដែរ ហើយកន្លងមកមានមនុស្សជាច្រើនដែលផ្ញើសារទៅកាន់នាងហើយរៀបរាប់បញ្ហាផ្លូវចិត្តរបស់ពួកគេនៅក្នុងប្រអប់សារ។ ហើយអ្វីដែល ឌីណា បានផ្តល់ជូន គឺស្ដាប់ដោយយកចិត្តទុកដាក់ និងផ្តល់ជាគន្លឹះតាមដែលអាចធ្វើបាន ។ ឌីណា ប្រាប់ថា មិនដែលជំរុញអ្នកដែលបានសួរយោបល់ឱ្យទៅទិញសៀវភៅរបស់នាងនោះទេ បើទោះបីជាវាមានភាពពាក់ព័ន្ធក៏ដោយ។  កញ្ញាយល់ថា មនុស្សម្នាក់ៗ មានដំណើររឿងខុសៗគ្នា និងបន្តលើកទឹកចិត្តឱ្យអ្នកដែលមានមន្ទិលទាំងអស់ ចាប់ផ្តើមហ៊ាននិយាយអំពីបញ្ហាទៅកាន់នរណាម្នាក់ ដែលគាត់ទុកចិត្តបំផុត ឬស្វែងរកអ្នកជំនាញដើម្បីប្រឹក្សា។

គួរជំរាបជូនថា ស្នាដៃដែលអ្នកនិពន្ធ គីម ឌីណា បានសរសេរកន្លងមកមានដូចជា ស្នេហ៍អស់ពីហរទ័យភាគ១និងភាគ២, ថាម៉េចយើងស្រឡាញ់គ្នា, បំពេនាង, ផ្ការីកវិញទេ, ភរិយាខ្ញុំអាយុ១៨ឆ្នាំ, គិតវិជ្ជមានហ៊ានជឿជាក់ និង សៀវភៅមនុស្សបាក់ទឹកចិត្ត ហើយ ឌីណា នៅតែបន្តផលិតស្នាដៃថ្មីៗបន្ថែមទៀត៕