ក្រុមហ៊ុនបច្ចេកវិទ្យាយក្ស ៣របស់សហរដ្ឋអាមេរិក កំពុងសហការគ្នា ជាមួយសហជីពគ្រូបង្រៀនចំនួន ២ ដើម្បីបណ្ដុះបណ្ដាលគ្រូបង្រៀនកម្រិតមត្តេយ្យ ដល់ថ្នាក់ទី១២ ចំនួន ៤០ម៉ឺននាក់ អំពីជំនាញប្រើបញ្ញាសិប្បនិម្មិត (AI) ក្នុងរយៈពេល ៥ឆ្នាំ។

បណ្ឌិតសភាជាតិ នៃការណែនាំអំពី AI បានប្រកាសកាលពីថ្ងៃអង្គារ ដើមសប្ដាហ៍នេះថា នេះជាគំនិតផ្ដួចផ្ដើម ដែលមានតម្លៃ ២៣លានដុល្លារ ដែលគាំទ្រដោយ Microsoft, OpenAI, Anthropic, សហព័ន្ធគ្រូបង្រៀនជាតិអាមេរិក និងសហព័ន្ធគ្រូបង្រៀនដែលមានមូលដ្ឋាននៅទីក្រុងញូវយ៉ក។ ជាផ្នែកនៃកិច្ចខិតខំប្រឹងប្រែង ភាគីដែលបានចូលរួមទាំងអស់ បានលើកឡើងថា ខ្លួននឹងអភិវឌ្ឍកម្មវិធីបណ្ដុះបណ្ដាល AI សម្រាប់គ្រូបង្រៀន ដែលអាចចែកចាយតាមអ៊ីនធឺណិត និងនៅក្នុងបរិវេណសាលាផ្ទាល់ ក្នុងទីក្រុងញូវយ៉ក។

ការប្រកាសនេះ កើតឡើងនៅពេលដែល សាលារៀន គ្រូបង្រៀន និងឪពុកម្ដាយជជែកគ្នាថា តើគួរប្រើ AI របៀបណា នៅក្នុងថ្នាក់រៀនឱ្យបានត្រឹមត្រូវ? អ្នកអប់រំចង់ធ្វើឱ្យប្រាកដថា សិស្សនឹងដឹងពីរបៀបប្រើប្រាស់បច្ចេកវិទ្យា ដែលកំពុងផ្លាស់ប្ដូររបៀបធ្វើការងារយ៉ាងឆាប់រហ័ស។ ខណៈគ្រូបង្រៀន ក៏អាចប្រើ AI ដើម្បីធ្វើស្វ័យប្រវត្តិកម្មការងារមួយចំនួន និងចំណាយពេលកាន់ច្រើននៅជាមួយ និងយកចិត្តទុកដាក់ចំពោះសិស្ស។ ប៉ុន្តែ AI នេះ ក៏នាំឱ្យមានការលើកឡើងនូវបញ្ហាក្រមសីលធម៌ និងការអនុវត្តផងដែរ ដែលជារឿយៗ នាំឱ្យមានការចោទជាសំណួរថា ប្រសិនបើកុមារប្រើ AI ដើម្បីជួយកិច្ចការសាលា ហើយគ្រូបង្រៀនប្រើ AI ដើម្បីជួយរៀបចំផែនការមេរៀន ឬឯកសារដាក់ពិន្ទុ តើអាចនាំឱ្យមានផលប៉ះពាល់លើលទ្ធផលសិក្សារបស់សិស្សឬទេ?

បច្ចុប្បន្ន សាលារៀនមួយចំនួន បានហាមឃាត់ការប្រើប្រាស់ AI ក្នុងថ្នាក់រៀន ខណៈខ្លះទៀតបានទទួល​យក​បច្ចេកវិទ្យា​នេះ។ នៅក្នុងទីក្រុងញូវយ៉ក នាយកដ្ឋានអប់រំបានហាមឃាត់ការប្រើប្រាស់ ChatGPT សម្រាប់ការប្រើប្រាស់ក្នុងសាលារៀន មុនពេលបើវគ្គបណ្ដុះបណ្ដាលអំពី AI នៅប៉ុន្មានខែបន្ទាប់ ព្រមទាំងបង្កើតមន្ទីរពិសោធន៍គោលនយោបាយ AI ដើម្បីស្វែងយល់ពីសក្តានុពលនៃបច្ចេកវិទ្យានេះ។

សាលារៀនប្រភេទថ្មី សង្ឃឹមថា នឹងបង្កើតគម្រូថ្នាក់ជាតិមួយ ដែលបង្ហាញពីរបៀបដែលសាលរៀន និងគ្រូបង្រៀនអាចបញ្ចូល​ AI ទៅក្នុងកម្មវិធីសិក្សា និងដំណើរការបង្រៀនរបស់ពួកគេ ដោយមិនបន្ថែមលើការងាររដ្ឋបាល ដែលជារឿយៗជាការដាក់បន្ទុកសម្រាប់អ្នកអប់រំ។

ប្រធាន AFT លោក Randi Weingarten បាននិយាយនៅក្នុងសេចក្តីថ្លែងការណ៍មួយថា AI នឹងនាំមកនូវអត្ថប្រយោជន៍ជាច្រើនសម្រាប់មនុស្ស ប៉ុន្តែក៏បង្កនូវបញ្ហាប្រឈមដ៏ធំផងដែរ ហើយវាជាការងាររបស់អ្នកអប់រំ ដែលត្រូវធានាយ៉ាងប្រាកដថា AI នឹងក្លាយជាឧបករណ៍បម្រើដល់សិស្ស និងសង្គមរបស់យើង មិនមែនបង្កផលប៉ះពាល់សម្រាប់សង្គមនោះទេ។ លោកបន្តថា សាលារៀន គឺជាកន្លែងដែលអប់រំ និងបុគ្គលិកសាលារៀន ត្រូវរៀនអំពី AI មិនមែនត្រឹមតែរបៀបដែលប្រើប្រាស់ ឬរបៀបដែលវាដំណើរការប៉ុណ្ណោះទេ ប៉ុន្តែត្រូវប្រើវាដោយភាពឈ្លាសវៃ សុវត្ថិភាព និងក្រមសីលធម៌ខ្ពស់។

កម្មវិធីនេះ នឹងរួមបញ្ចូលសិក្ខាសាលា វគ្គសិក្សាអនឡាញ និងការបណ្ដុះបណ្ដាលដោយផ្ទាល់ ដែលមេរៀន នឹងរៀបចំដោយអ្នកជំនាញ និងអ្នកអប់រំ AI ហើយការណែនាំ នឹងចាប់ផ្ដើមនារដូវស្លឹកឈើជ្រុះឆ្នាំនេះក្នុងសហរដ្ឋអាមេរិក។ ក្រុមហ៊ុន Microsoft គ្រោងនឹងវិនិយោគ ១២,៥ លានដុល្លារ ក្នុងកិច្ចខិតខំប្រឹងប្រែងបណ្ដុះបណ្ដាលរយៈពេល ៥ឆ្នាំខាងមុខ ហើយ OpenAI នឹងរួមចំណែក ១០លានដុល្លារ។ ខណៈក្រុមហ៊ុន Anthropic គ្រោងនឹងវិនិយោគ ៥០ម៉ឺនដុល្លារក្នុងឆ្នាំដំបូងនៃគម្រោង ហើយអាចនឹងចំណាយច្រើនជាងនេះទៀតនៅឆ្នាំបន្តបន្ទាប់៕