ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ប្រសិនបើយុវជន មានបំណង ចង់ធ្វើការក្នុងវិស័យឧស្សាហកម្មគ្រឿងអេឡិចត្រូនិច ឬក្លាយជាអ្នកជំនាញផ្នែកគ្រឿងអេឡិចត្រូនិច ក្រោយចប់ទី១២ ពួកគាត់អាចរៀនបន្តផ្នែកអេឡិចត្រូនិច មេកានិច អូតូម៉ូទីវ និងផ្នែកវិទ្យាសាស្ត្រ ទាក់ទងនឹងមុខវិជ្ជាគណិតវិទ្យា។ នេះបើតាមលោក សី ធុន អ្នកជំនាញបច្ចេកទេសគ្រឿងអេឡិចត្រូនិច នៃក្រុមហ៊ុន MinebeaMitsumi ។
លើកឡើងក្នងកិច្ចសម្ភាសន៍នៅពិព័រណ៍ការងារ និងផលិតភាពជាតិឆ្នាំ ២០២៤ លោក សី ធុន បានបញ្ជាក់ថា បច្ចុប្បន្ន តម្រូវការពលកម្ម ក្នុងវិស័យផលិតកម្មគ្រឿងអេឡិចត្រូនិច កំពុងមានតម្រូវការខ្ពស់ខ្លាំង ជាក់ស្ដែងក្រុមហ៊ុន MinebeaMitsumi ដែលលោកកំពុងធ្វើការ កំពុងមានតម្រូវការ អ្នកជំនាញផ្នែកគ្រឿងបង្គុំ, គ្រឿងអេឡិចត្រូនិច និងមេកានិចជាច្រើនកន្លែង។ លោកបន្ថែមថា បច្ចុប្បន្ន ក្រុមហ៊ុន MinebeaMitsumi មានទីតាំងចំនួន ២ក្នុងប្រទេសកម្ពុជា ដែលទីតាំងទី១ ស្ថិតក្នុងតំបន់សេដ្ឋកិច្ចពិសេស នៃខណ្ឌកំបូល និងទីតាំងទី២ ស្ថិតនៅក្នុងស្រុកក្រគរ ខេត្តពោធិ៍សាត់។
យ៉ាងណាក៏ដោយ អ្នកជំនាញរូបនេះ បន្តថា សម្រាប់យុវជន និងសិស្សានុសិស្ស ដែលមានបំណងធ្វើការក្នុងវិស័យគ្រឿងអេឡិចត្រូនិច ពួកគាត់ ត្រូវពង្រឹងចំណេះមូលដ្ឋានគ្រឹះទាក់ទងនឹងគ្រឿងអេឡិចត្រូនិចឱ្យបានល្អ។ ដោយឡែក ចំពោះសាលាបច្ចេកទេសសំខាន់ៗ ដែលយុវជនអាចជ្រើសរើសចូលរៀន ជំនាញឧស្សាហកម្មគ្រឿងអេឡិចត្រូនិច មានដូចជា វិទ្យាស្ថានបច្ចេកវិទ្យាកម្ពុជា (ITC), NPIC និង NTTI ។
លោក សី ធុន បានបង្ហាញទស្សនៈវិជ្ជមានចំពោះជំនាញបច្ចេកទេសគ្រឿងអេឡិចត្រូនិចថា ប្រសិនបើសិស្សានុសិស្សកម្ពុជា កាន់តែច្រើន ចូលរៀនជំនាញបច្ចេកទេស និងបច្ចេកវិទ្យា គ្រឿងអេឡិចត្រូនិចនេះ កម្ពុជានឹងក្លាយជាប្រទេសជឿនលឿនក្នុងវិស័យបច្ចេកវិទ្យាកាន់តែឆាប់រហ័ស។ ក្លាយជាប្រទេសជឿនលឿន ព្រោះយុវជន នឹងក្លាយជាកម្លាំងចលករ ដែលចូលរួមធ្វើឱ្យកម្ពុជា ក្លាយជាប្រទេសផលិតកម្ម ខណៈទីផ្សារការងារបច្ចុប្បន្ន កំពុងផ្តោតនៅលើវិស័យបច្ចេកវិទ្យាច្រើន ជាពិសេសគឺ បច្ចេកវិទ្យាឌីជីថល និងបញ្ញាសិប្បនិម្មិត (AI)៕
