នៅពេលរាងកាយឡើងកម្ដៅ ឬកើតជំងឺគ្រុនក្តៅ ប្រព័ន្ធរំលាយអាហារ និងរាងកាយទាំងមូលត្រូវដុតរំលាយកាឡូរីច្រើនជាងធម្មតា ដើម្បីប្រយុទ្ធប្រឆាំងនឹងមេរោគ។ ទោះបីជាអ្នកបាត់បង់ចំណង់អាហារក៏ដោយ ការផ្តល់ថាមពល និងសារធាតុចិញ្ចឹមឱ្យបានគ្រប់គ្រាន់ គឺជាកាតាលីករដ៏សំខាន់ជួយពង្រឹងប្រព័ន្ធភាពស៊ាំឱ្យឆាប់ជាសះស្បើយ។

ខាងក្រោមនេះ ជាប្រភេទអាហារទាំង ៧ យ៉ាងដែលគួរទទួលទាន និងអាហារ ៣ យ៉ាងដែលគួរចៀសវាង ៖

អាហារ ៧ យ៉ាងដែលជួយឱ្យអ្នកឆាប់ជាសះស្បើយ

យ៉ាអួ (Greek Yogurt) ៖ ប្រសិនបើក្រពះរបស់អ្នកមិនមានបញ្ហាជាមួយជាតិទឹកដោះគោ យ៉ាអួគឺជាប្រភពនៃប្រូបាយអូទិក (Probiotics) ដ៏ល្អ ដែលជួយទ្រទ្រង់បាក់តេរីល្អក្នុងពោះវៀន។ លើសពីនេះ យ៉ាអួក៏សម្បូរទៅដោយប្រូតេអ៊ីនខ្ពស់ ដែលផ្តល់ជីវជាតិគ្រប់គ្រាន់ទោះបីជាញ៉ាំបានតិចតួចក៏ដោយ។

ស៊ុបមាន់ក្តៅៗ ឬបបរមាន់រាវ ៖ មុខម្ហូបពេញនិយមរបស់ខ្មែរយើងពេលមិនស្រួលខ្លួននេះ ពិតជាមានប្រសិទ្ធភាពខ្ពស់។ ទឹកក្តៅឧណ្ហៗជួយរំលាយស្លេស កាត់បន្ថយការតឹងច្រមុះ សម្រួលបំពង់ក និងផ្តល់ជាតិទឹក។ ចំពោះអ្នកមិនញ៉ាំសាច់ អាចជំនួសដោយស៊ុបសណ្តែកបាន។

ទឹកដូង ៖ ទឹកដូងធម្មជាតិនៅស្រុកយើង គឺជាប្រភពអេឡិចត្រូលីតធម្មជាតិដ៏អស្ចារ្យ។ ពេលក្តៅខ្លួន រាងកាយបាត់បង់ជាតិទឹកច្រើនតាមរយៈញើស។ ទឹកដូងជួយបំពេញជាតិទឹក និងជាតិប៉ូតាស្យូមឡើងវិញ ដើម្បីរក្សាលំនឹងចង្វាក់បេះដូង និងសាច់ដុំ។ គប្បីពិសារទឹកដូងសុទ្ធ មិនលាយស្ករ ឬរសជាតិបន្ថែម។

ផ្លែឈើស្រស់ ៖ ផ្លែឈើភាគច្រើនផ្ទុកជាតិទឹកលើសពី ៧០% និងសម្បូរវីតាមីន C ជួយជួសជុលកោសិកា។ ផ្លែឈើងាយរកនៅកម្ពុជាដូចជា ក្រូចពោធិ៍សាត់ ចេកណាំវ៉ា និងផ្លែប័រ សុទ្ធតែល្អចំពោះសុខភាព ងាយរំលាយ និងមិនធ្វើឱ្យរំខានដល់ក្រពះពោះវៀន។

បន្លែឆ្អិន ៖ គួរចៀសវាងការញ៉ាំបន្លែស្រស់ច្រើនពេកពេលក្តៅខ្លួន ព្រោះជាតិកាកសរសៃខ្ពស់អាចធ្វើឱ្យពិបាករំលាយ និងហើមពោះ។ ផ្ទុយទៅវិញ គួរជ្រើសរើសបន្លែចម្អិនឆ្អិនល្អ ដូចជាការ៉ុត ខ្ទឹមបារាំង ឬបន្លែក្នុងសម្លផ្សេងៗ ដើម្បីស្រូបយកវីតាមីន និងជាតិរ៉ែបានស្រួល។

អាហារសម្បូរប្រូតេអ៊ីន ៖ ប្រូតេអ៊ីនជួយរាងកាយបង្កើតអង្គបដិប្រាណ (Antibodies) ដើម្បីកម្ចាត់មេរោគ។ បើពិបាកលេបសាច់ដុំធំៗ អ្នកអាចជ្រើសរើសញ៉ាំស៊ុតស្ងោរ ឬហាន់សាច់មាន់ល្អិតៗដាក់ក្នុងបបរ។

ខ្ញី ៖ ខ្ញីមានសារធាតុ Gingerol ដែលមានគុណប្រយោជន៍ប្រឆាំងការរលាក បំបាត់ការចង្អោរ និងក្អួត។ អ្នកអាចឆុងតែខ្ញីក្តៅៗ ឬដំខ្ញីដាក់ក្នុងទឹកស៊ុប ឬបបរ ដើម្បីជួយសម្រួលខ្យល់ និងបង្កើនកម្ដៅក្នុងខ្លួនឱ្យបែកញើសស្រួលខ្លួន។

អាហារ ៣ យ៉ាងដែលគួរចៀសវាងជាដាច់ខាត

គ្រឿងស្រវឹង កាហ្វេ និងភេសជ្ជៈប៉ូវកម្លាំង ៖ ជាតិអាកុល និងជាតិកាហ្វេអ៊ីនធ្វើឱ្យរាងកាយនោមញឹក ដែលនាំឱ្យបាត់បង់ជាតិទឹកកាន់តែខ្លាំង ខណៈរាងកាយកំពុងត្រូវការជាតិទឹកជាចាំបាច់ដើម្បីទម្លាក់កម្ដៅ។

ចំណីអាហារ និងភេសជ្ជៈផ្អែមខ្លាំង៖ ទឹកក្រូចកំប៉ុង នំផ្អែមៗ និងស្ករកែច្នៃ ធ្វើឱ្យរាងកាយរលាក និងរារាំងដល់ដំណើរការបំពេញភារកិច្ចរបស់ប្រព័ន្ធភាពស៊ាំ។

សាច់កែច្នៃ (ប្រហិត សាច់ក្រក ហតដក ឬប៊ីខុន) ៖ អាហារទាំងនេះសម្បូរជាតិខ្លាញ់ ពិបាករំលាយ និងទាមទារឱ្យរាងកាយប្រើថាមពលច្រើនក្នុងការកិនបំបែក ដែលធ្វើឱ្យអ្នកកាន់តែអស់កម្លាំង និងងាយឈឺពោះ។

ការថែទាំសុខភាពឱ្យត្រូវក្បួនខ្នាតតាមរយៈការជ្រើសរើសរបបអាហារត្រឹមត្រូវ គឺជាជំហានដំបូងជួយឱ្យអ្នកឆាប់ជាសះស្បើយពីជំងឺគ្រុនក្តៅ។ ទោះជាយ៉ាងណា ប្រសិនបើតេស្តឃើញសញ្ញាសង្ស័យជំងឺគ្រុនឈាម គ្រុនចាញ់ ឬកម្ដៅឡើងខ្ពស់លើសពី ៣៨.៥ អង្សាសេជាប់ៗគ្នាច្រើនថ្ងៃមិនថយចុះ សូមប្រញាប់ទៅជួបគ្រូពេទ្យនៅមណ្ឌលសុខភាព ឬមន្ទីរពេទ្យដែលនៅជិតលោកអ្នកបំផុត៕