ឱកាសសិក្សាអាហារូបករណ៍ថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិត នៅសាកលវិទ្យាល័យសាកលវិទ្យាល័យបច្ចេកវិទ្យា និងពាណិជ្ជកម្មប៉េកាំង (Beijing Technology and Business ) ពី ផ្ទះយុវជនដើម្បីមិត្តភាពកម្ពុជា-ចិន។ អាហារូបករណ៍ជ្រើសរើសចំនួន២០កន្លែង សម្រាប់ឆ្នាំសិក្សា២០២៥-២០២៦។

ជំនាញដែលអាហារូបករណ៍ផ្ដល់ការសិក្សារួមមាន ៖ សម្រាប់ថ្នាក់បណ្ឌិត មាន ជំនាញរដ្ឋបាលធុរកិច្ច (Business Administration) និងជំនាញសេដ្ឋកិច្ចអនុវត្ត (Applied Economics)។ សម្រាប់ថ្នាក់បរិញ្ញាបត្រជាន់ខ្ពស់ មាន ជំនាញរដ្ឋបាលធុរកិច្ច (Business Administration) និង ជំនាញធុរកិច្ចអន្តរជាតិ (International Business)។ អាហារូបករណ៍នឹងផ្ដល់ជូនថ្លៃសិក្សា កន្លែងស្នាក់នៅ ការធានារ៉ាប់រងសុខភាព និងប្រាក់ឧបត្ថម្ភប្រចាំខែ ៣៥០០យ័នក្នុងមួយខែសម្រាប់ថ្នាក់បណ្ឌិត និង៣០០០យ័នក្នុង​មួយខែសម្រាប់ថ្នាក់បរិញ្ញាបត្រជាន់ខ្ពស់។

លក្ខខណ្ឌនៃការស្នើពាក្យអាហារូបករណ៍ ៖ ជាបេក្ខជនដែលមានសញ្ជាតិខ្មែរ, មានសុខភាពល្អ, មានលិខិតឆ្លងដែនដែលមានសុពលភាព។  មានសញ្ញាបត្របរិញ្ញាបត្រ មានអាយុមិនលើស៣៥ឆ្នាំ (សម្រាប់ថ្នាក់បរិញ្ញាបត្រជាន់ខ្ពស់) និងសញ្ញាបត្រថ្នាក់បរិញ្ញាបត្រជាន់ខ្ពស់ មានអាយុមិនលើស៤០ឆ្នាំ (សម្រាប់ថ្នាក់បណ្ឌិត)។ មានព្រឹត្តិបត្តពិន្ទុគ្រប់ឆ្នាំសិក្សានៃថ្នាក់បរិញ្ញាបត្រ ឬថ្នាក់បរិញ្ញាបត្រជាន់ខ្ពស់ មានចំណេះដឹងភាសាអង់គ្លេសល្អ។ លើសពីនេះ អាហារូបករណ៍នឹងផ្ដល់អាទិភាពចំពោះអ្នកមានពិន្ទុ IELTS ចាប់ពី ៦.០ ឡើងទៅ ឬពិន្ទុ TOEFL ចាប់ពី ៨០ឡើងទៅ។ បេក្ខជន បេក្ខនារី ត្រូវមានឯកសារភ្ជាប់ សំណេរអំពីគម្រោងសិក្សា (Study Plan) មិនលើសពី៨០០ពាក្យ (ជាភាសាអង់គ្លេស) ភ្ជាប់ប្រវត្តិរូបសង្ខេប (ជាភាសាអង់គ្លេស)។ គួរបញ្ជាក់ថា ឯកសារទាំងអស់ត្រូវជាភាសាអង់គ្លេស ឬបានបកប្រែជាភាសាអង់គ្លេស និងរៀបចំជា PDF។

បេក្ខជន បេក្ខនារី​ ដែលមានបំណងស្នើពាក្យអាហារូបករណ៍ ត្រូវរៀបចំឯកសារទាំងអស់ជា PDF និងដាក់ឯកសារទាំងអស់ក្នុងឯកសារតែមួយជា PDF ឬដាក់ក្នុងថតឯកសារតែមួយ ( Zip File) និងផ្ញើទៅកាន់ Email: info@youthhouse-ccf.org ចាប់ពីថ្ងៃផ្សាយដំណឹងនេះ រហូត​ដល់ថ្ងៃទី១៦ ខែឧសភា ឆ្នាំ២០២៥ វេលាម៉ោង ១៧:០០នាទី។

សម្រាប់ព័ត៌មានបន្ថែមអាចចូលទៅកាន់ https://t.me/+K5mzMiixfswzNzQ1 ដើម្បីសាកសួរទៅកាន់ក្រុមការងារព័ត៌មានអាហារូបករណ៍ របស់ ផ្ទះយុវជនដើម្បីមិត្តភាពកម្ពុជា-ចិន ឬអាចទៅកាន់ ការិយាល័យ ផ្ទះយុវជនដើម្បីមិត្តភាពកម្ពុជា-ចិន ដែលមានអាសយដ្ឋានស្ថិតនៅអគារមជ្ឈមណ្ឌលអភិវឌ្ឍន៍ធុរកិច្ច ជាន់ទី១៦ ផ្លូវ OCIC សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ៕