ព្រឹត្តិការណ៍កីឡាអាស៊ី (Asian Games) លើកទី១៩ បានបិទបញ្ចប់នៅកីឡដ្ឋាន Hangzhou Olympic Sports Center ក្នុងទីក្រុង Hangzhou ខេត្ត Zhejiang ភាគខាងកើតប្រទេសចិន កាលពីយប់ថ្ងៃអាទិត្យកន្លងទៅ ។ ការប្រកួតកីឡាអាស៊ីជាព្រឹត្តិការណ៍ទាក់ទាញចំណាប់អារម្មណ៍ពីប្រជាជនអាស៊ី និងជុំវិញពិភពលោក ។ ពិធីបិទព្រឹត្តិការណ៍កីឡាអាស៊ីនៅប្រទេសចិនឆ្នាំនេះ បានបង្ហាញពីទស្សនីយភាពសិល្បៈចម្រុះដ៏ស្រស់ស្អាតបំផុតក្នុងតំបន់អាស៊ីទៅកាន់ពិភពលោក ។

កម្មវិធីបិទកីឡា Asian Games គឺជាពិធីជប់លៀងលាគ្នាដែលមានរយៈពេល ៨៥នាទី ។ រយៈពេលនេះអ្នកទស្សនា ថ្នាក់ដឹកនាំ អត្តពលិក និងប្រតិភូកីឡាមកពីប្រទេសនានា បានទស្សនាការសម្តែងសិល្បៈចម្រុះដ៏ស្រស់ស្អាត ៤កម្មវិធីជាប់ៗគ្នា ។ ទីក្រុង Hangzhou ខេត្ត Zhejiang ជាទីក្រុងរីកចម្រើនផ្នែកបច្ចេកវិទ្យាបំផុតរបស់ចិន ។ បើតាមលោក Zhang Shiqian នាយកគ្របគ្រងគំនិតច្នៃប្រតិដ្ឋទស្សនីយភាពបាននិយាយថា កម្មវិធីបិទកីឡា Asian Games បានប្រើប្រាស់អំពូល LEDs ចំនួនជាង ៤ម៉ឺនគ្រាប់ដោយតំឡើងនៅលើវាលស្មៅនៃកីឡដ្ឋាន Hangzhou Olympic Sports Center ។

ការប្រើប្រាស់អំពូល LED រួមបញ្ចូលគ្នាជាមួយបច្ចេកវិទ្យា Augmented Reality (AR) បានបង្កើតជំនោរខ្យល់ ទឹករលក សម្រស់ធម្មជាតិ ព្រះអាទិត្យ និងនិម្មិតកម្មរូបភាពផ្កាភ្ញីផ្សេងៗ ប្រែក្លាយកីឡដ្ឋានទាំងមូលទៅជាសួនដ៏ស្រស់ស្អាតបំផុតនៅអាស៊ី ដែលជាសារបង្ហាញពីការចងចាំ មិត្តភាព និងលាមិត្តភក្តិទាំងឡាយដែលបានចូលរួមទស្សនា ។ ការប្រកួតកីឡា Asian Games លើកទី១៩ មានរយៈពេល ១៥ថ្ងៃ និងមានអត្តពលិកចំនួន ១១,៨៣០នាក់មកពី ៤៥ប្រទេស ។

លោក Wu Yan ផលិតករប្រតិបត្តិនៃពិធីបិទកីឡា Asian Games បាននិយាយថា ព្រឹត្តិការណ៍នេះបានផ្តោតសំខាន់លើសារៈសំខាន់នៃអារម្មណ៍និងមនោសញ្ចេតនារបស់មនុស្ស និងបានថ្លែងអំណរគុណចំពោះការលះបង់របស់អត្តពលិក និងអ្នកស្ម័គ្រចិត្តទាំងអស់ដែលបានខិតខំប្រឹងប្រែង បង្ហូរញើស និងទឹកភ្នែកនៅក្នុងព្រឹត្តិការណ៍នេះ ។

សូមជម្រាបថា ព្រឹត្តិការណ៍កីឡាអាស៊ី (Asian Games) ឬកីឡារដូវក្តៅនេះ បានចាប់ផ្តើមប្រកួតដំបូងនៅឆ្នាំ១៩៥១ នៅទឹកដីប្រទេសឥណ្ឌា បន្ទាប់ពីពិភពលោកបានបញ្ចប់សង្គ្រាមលោកលើកទី២ ។ ការរៀបចំការប្រកួតព្រឹត្តិការណ៍កីឡាអាស៊ីមានគោលបំណងបង្ហាញពីមិត្តភាព ក្តីស្រឡាញ់ សាមគ្គីភាព សន្តិភាព ភារតភាព រវាងប្រទេសនិងប្រទេស និងរវាងតំបន់អាស៊ីទៅកាន់ពិភពលោក ។

ព្រឹត្តិការណ៍ Asian Games លើកទី១៩ នៅទីក្រុង Hangzhou ប្រទេសចិន មាន ៤០ ប្រភេទកីឡា និងមាន ៤៨១ វិញ្ញាសា ។ អ្នកចូលរួមពិធីបិទព្រឹត្តិការណ៍កីឡាអាស៊ីមានចំនួនជាង ១ម៉ឺនពីរពាន់នាក់ ។ ទន្ទឹមគ្នានេះ កម្ពុជាបានបញ្ជូនអត្តពលិក ១៧ប្រភេទកីឡាចូលរួមការប្រកួតនៅចិន រួមមានកីឡាអត្តពលកម្ម, ហែលទឹក, បាល់ទះ, បាល់បោះ, ជឺជីតស៊ូ, តេក្វាន់ដូ WT, គ្រិកឃីត, យូដូ, ចំបាប់, វាយសី, ការ៉ាតេ, ទូកក្ដោង, ទ្រីយ៉ាត្លុង, ទូកប្រពៃណី, សូហ្វតិន្នីស, អុកចិន និងកីឡាគុនដាវ៕