ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រសួងអប់រំ យុវជន និងកីឡា កាលពីសប្តាហ៍កន្លងទៅនេះ ប្រកាសដល់សិស្សានុសិស្សដែលប្រឡងជាប់សញ្ញាបត្រមធ្យមសិក្សាបឋមភូមិ ឬសញ្ញាបត្រមានតម្លៃសមមូល ពីការជ្រើសរើសសិស្សឱ្យចូលរៀននៅតាមគ្រឹះស្ថានសិក្សាអប់រំបច្ចេកទេសសាធារណៈ និងឯកជន ទាំង២១ ចំនួន២៣០០នាក់ សម្រាប់ឆ្នាំ២០២៤-២០២៥។
មុខជំនាញ ដែលមានបណ្តុះបណ្តាលនៅតាមគ្រឹះស្ថានទាំង២១ រួមមាន ៖ អគ្គិសនី, អេឡិចត្រូនិក, ក្សេត្រសាស្រ្ត, បសុវប្បកម្ម, មេកានិក, គណនេយ្យ, ទេសចរណ៍ (ការិយាល័យជួរមុខ), កែច្នៃអាហារ, វិទ្យាសាស្រ្តកុំព្យូទ័រ, ឌីជីថលមេឌៀឌីហ្សាញ, កសិកម្មវៃឆ្លាត និងអភិវឌ្ឍកសិកម្ម។
លក្ខខណ្ឌ នៃការដាក់ពាក្យសុំចូលរៀន ៖ សិស្សដែលបានប្រឡងជាប់សញ្ញាបត្រមធ្យមសិក្សាបឋមភូមិ ឬសញ្ញាបត្រមានតម្លៃសមមូល, សិស្សដែលមានសញ្ញាបត្រមធ្យមសិក្សាទុតិយភូមិចំណេះទូទៅ និងបំពេញវិជ្ជា, សិស្សត្រូវភ្ជាប់មកជាមួយនូវព្រឹត្តិបត្រពិន្ទុ ឬសេចក្តីបញ្ជាក់ពីមន្ទីរអប់រំ យុវជន និងកីឡារាជធានីខេត្តដែលសាម៉ីជនបានប្រឡងជាប់, សិស្សទាំងពីរភេទត្រុវនៅលីវ មានកាយសម្បទាគ្រប់គ្រាន់ និងមានឧបនិស្ស័យសមស្រប (ចំពោះសិស្សនារីនឹងត្រូវទទួលបានការលើកទឹកចិត្ត), មានសីលធម៌រស់នៅ និងសុខភាពល្អ, សិស្សមានពិការភាព (ជើង) អាចចុះឈ្មោះចូលរៀនផ្នែកអេឡិចត្រូនិក គណនេយ្យ កុំព្យូទ័រ និងឌីជីថលមេឌៀឌីហ្សាញបាន។
ការទទួលស្គាល់ និងផ្តល់សញ្ញាបត្រ ៖ សិស្សានុសិស្សត្រូវសិក្សាតាមកម្មវិធីសិក្សារបស់ក្រសួងអប់រំ យុវជន និងកីឡា ដែលបានកំណត់ការបណ្តុះបណ្តាលរយៈពេល ៣ឆ្នាំ ។ សិស្សដែលបានប្រឡងបញ្ចប់ឆ្នាំទី៣ ផ្នែកអប់រំបច្ចេកទេសជាប់ជាស្ថាពរ ត្រូវទទួលបានសញ្ញាបត្របច្ចេកទេស និងវិជ្ជាជីវៈកម្រិត៣ ដែលមានតម្លៃសមមូលនឹងវិញ្ញាបនបត្រ ឬសញ្ញាបត្រ ឬសញ្ញាបត្រមធ្យមសិក្សាទុតិយភូមិ យោងតាមប្រកាសលេខ ៦៤៣ អយក.ប្រក ចុះថ្ងៃទី២៧ ខែមីនា ឆ្នាំ២០២០ របស់ក្រសួងអប់រំ យុវជន និងកីឡា ។ សិស្សមានសញ្ញាបត្របច្ចេកទេស និងវិជ្ជាជីវៈកម្រិត៣ អាចធ្វើការជាមួយក្រុមហ៊ុន ឬប្រកបអាជីពផ្ទាល់ខ្លួន ឬសិក្សាបន្តនៅក្នុងគ្រឹះស្ថានឧត្តមសិក្សានានាទូទាំងប្រទេស ដោយគោរពតាមគោលការណ៍ ឬលក្ខខណ្ឌដោយឡែករបស់សាមីគ្រឹះស្ថានឧត្តមសិក្សានោះ។
ការចែកពាក្យ និងទទួលពាក្យសុំចុះឈ្មោះចូលរៀន ចាប់ពីថ្ងៃទី១០ ខែកញ្ញា ឆ្នាំ២០២៤ ។ កាលបរិច្ឆេទចូលរៀននៅថ្ងៃទី០១ ខែវិច្ឆិកា ឆ្នាំ២០២៤ ។ ពាក្យសុំចូលរៀនមានចែកជូនដោយឥតគិតថ្លៃ នៅតាមគ្រឹះស្ថានសិក្សាទាំង២១សាលា រាល់ម៉ោងធ្វើការ ព្រឹកពីម៉ោង ៧:៣០ ដល់ ១១:៣០ និងរសៀលម៉ោង ២:០០ ដល់ ៥:០០៕
