រ៉ូបូតប្រយុទ្ធ Royals​ ដែល​រួមគ្នាបង្កើត​ដោយ​សិស្សវិទ្យាល័យ នៃសាលារៀនជំនាន់ថ្មី វិទ្យាល័យព្រែកលៀប បានឈ្នះ​ការ​ប្រកួតក្នុងវគ្គជម្រុះជុំទី១ ក្នុងកម្មវិធី BATTLEBOTx កាលពីពេលកន្លងទៅថ្មីៗនេះ និង​កំពុង​ត្រៀម​ខ្លួន​ទៅប្រកួតក្នុងវគ្គផ្ដាច់ព្រ័ត្រ នៅថ្ងៃទី១៤ ខែកក្កដា ឆ្នាំ២០២៤ខាងមុខ។

យុវសិស្ស ផល លាភ ជាសិស្សថ្នាក់ទី១១ C2 សាលារៀនជំនាន់ថ្មី វិទ្យាល័យព្រែកលៀប និងជាសមាជិកក្លឹប STEM ដែលចូលរួមបង្កើត​រូបូត បានប្រាប់ឱ្យដឹងថា រូបគេ ចូលរួមប្រកួតរ៉ូបូត ក្នុងកម្មវិធី BATTLEBOTx នេះ គឺដោយសារចាប់អារម្មណ៍ចំពោះកម្មវិធីប្រកួត ព្រមទាំងមានបំណងបង្កើតរ៉ូបូតដើម្បីចូលរួមប្រកួតតែម្ដង។

សិស្សថ្នាក់ទី១១ C2 រូបនេះ បញ្ជាក់បន្ថែមថា រ៉ូបូតនេះ ជាប្រភេទរ៉ូបូតប្រកួតផ្នែកកីឡាប្រើសម្រាប់ប្រយុទ្ធគ្នាជាមួយរ៉ូបូតផ្សេងទៀត។ ផល លាភ បន្តថា រ៉ូបូតប្រយុទ្ធនេះ មានឈ្មោះថា រ៉ូបូតរ៉ូយ៉ាល់ (Robot Royals) ដែលអាចជួយឱ្យវិស័យបច្ចេកវិទ្យានៅកម្ពុជាកាន់តែរីកចម្រើន។ ហើយលក្ខណៈពិសេសរបស់ រ៉ូបូតរ៉ូយ៉ាល់នេះ មានអាវុធចំនួនពីរនៅខាងមុខ និងខាងក្រោយ ដែលផលិតអំពីដែកអាលុយមីញ៉ូម សម្រាប់ប្រយុទ្ធ និងការការពារខ្លួន។

យុវសិស្ស ផល លាភ បន្ថែមថា រ៉ូបូតរ៉ូយ៉ាល់​ បង្កើតឡើងចំណាយរយៈពេល២សប្ដាហ៍ និងប្រើប្រាស់ថវិកាចំនួន ១៨០ដុល្លារ។ ដោយឡែកសម្រាប់ផលវិបាកក្នុងការផលិត គឺទៅលើផ្នែកបច្ចេកទេស ដោយសារវាជាការបង្កើតលើកដំបូង នៅពេលតសៀគ្វីក៏មានការឆេះខូចខាត ហើយការតេស្តសាកល្បងប្រហែលជាង ១០ដងទើបសម្រេចផលិតផល។

សម្រាប់យុវសិស្ស លឹម ប៊ុនថី ជាសិស្សថ្នាក់ទី១១ B1 កម្មវិធីសាលារៀនជំនាន់ថ្មី វិទ្យាល័យព្រែកលៀប ប្រាប់ថា រូបគេពេញចិត្តចំពោះការប្រកួតក្នុងវគ្គជម្រុះដំបូងនេះ ដោយសារការខិតខំប្រឹងប្រែងរបស់ខ្លួនចូលរួមសហការបង្កើតរ៉ូបូតរយៈពេលកន្លះខែកន្លងមក។

សិស្សថ្នាក់ទី១១ B1 កម្មវិធីសាលារៀនជំនាន់ថ្មី វិទ្យាល័យព្រែកលៀប បន្ថែមថា កត្តាជំរុញចិត្តឱ្យចូលរួមប្រកួតរ៉ូបូតនេះ ដោយសារឃើញថា នៅបរទេសតែងមានការប្រកួតប្រជែងស្នាដៃសិស្សផ្នែកបច្ចេកវិទ្យារ៉ូបូត ហើយផ្គួបផ្សំការស្រឡាញ់បច្ចេកវិទ្យា និងមានគំនិតចង់ចូលរួមប្រកួតដូចសិស្សនៅបរទេសដែរ។

យុវសិស្ស លឹម ប៊ុនថី ក៏បានអះអាងដូចគ្នាដែរថា ក្នុង​ដំណើរការនៃការបង្កើតរ៉ូបូតរ៉យ៉ាល់នេះ គឺជួបការលំបាក​ជាច្រើន​ដូចជាការតសៀគ្វី រៀបចំប្រព័ន្ធមេកានិច ការសរសេរកូដ និងបន្ថែមគំនិតច្នៃប្រឌិត។ ប៊ុនថី បន្តថា ក្នុងនាមជាសមាជិកក្រុម រូបគេអាចជួយសម្រួលការលំបាករបស់ក្រុមផ្នែកថវិកា ការជួសជុល ក៏ដូចជា ការរៀបឧបករណ៍មួយចំនួននៅក្នុងការដំឡើងរ៉ូបូត។

ចំណែក យុវសិស្ស អេង មុន្នី ជាសិស្សថ្នាក់ទី១១ P2 កម្មវិធីសាលារៀនជំនាន់ថ្មី វិទ្យាល័យព្រែកលៀប លើកឡើងថា ការចូលរួមប្រកួតរ៉ូបូតនេះ រូបគេពិតជាមានអារម្មណ៍សប្បាយរីករាយ ហើយគិតថាកម្មវិធីនេះល្អ ដែលជួយឱ្យសិស្សានុសិស្សយល់ដឹងកាន់តែច្បាស់អំពីផ្នែកជាច្រើននៃប្រព័ន្ធបច្ចេកវិទ្យាវិទ្យាសាស្រ្តឱ្យកាន់តែរីកចម្រើន។

យុវសិស្ស អេង មុន្នី បញ្ជាក់បន្ថែមថា ដើម្បីទទួលបានលទ្ធផលល្អ ក្រុមរបស់ខ្លួនបានសហការគ្នាយ៉ាងល្អក្នុងការស្រាវជ្រាវ សិក្សាស្វែងយល់អំពីឧបករណ៍ផ្សេងៗដែលត្រូវជួយគ្នា ដូចជា ការកាត់ ការស្វានជាដើម។ ចំពោះ គ្រឿងតិចណូឡូជី ប្រើប្រាស់ឧបករណ៍ដែលល្អៗ និងសិក្សាអំពីអាវុធ ដើម្បីងាយស្រួលប្រកួតប្រជែង។

ដើម្បីខិតទៅរកភាពជោគជ័យក្នុងការប្រកួតរ៉ូបូតវគ្គផ្ដាច់ព្រ័ត្រខាងមុខនេះ ក្រុមរបស់ខ្លួននឹងខិតខំធ្វើការងារនេះដោយបន្ថែមចំណេះដឹងផ្នែកមេកានិចទៅលើរ៉ូបូត ដោយពិនិត្យលើទៅលើប្រព័ន្ធទាំងអស់របស់រ៉ូបូត ភាពរឹងមាំរបស់រ៉ូបូត និងប្រើប្រាស់ឧបករណ៍ល្អសម្រាប់ផលិត។

គួរជម្រាបជូនថា ក្នុងវគ្គជម្រុះពាក់កណ្ដាលផ្ដាច់ព្រ័ត្រ មានក្រុមបេក្ខជនចូលរួមប្រកួតសរុបមានចំនួន ៥០ក្រុម ហើយជម្រុះយក ៣២ក្រុម បន្តទៅវគ្គផ្ដាច់ព្រ័ត្រនៅថ្ងៃទី១៤ ខែកក្កដា ឆ្នាំ២០២៤ខាងមុខ៕