ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
លទ្ធផល នៃការប្រឡងសិស្សពូកែទូទាំងប្រទេសសម្រាប់ឆ្នាំ២០២៤នេះ ត្រូវបានប្រកាសកាលពីរសៀលថ្ងៃទី១៦ ខែឧសភា ដោយក្នុងនោះ គេបានរកឃើញម្ចាស់ជ័យលាភីចំនួន៣០រូប ក្នុងនោះសិស្សពូកែថ្នាក់ទី៩ មានចំនួន១៥រូប និងសិស្សពូកែថ្នាក់ទី១២ ចំនួន១៥រូប។
ក្នុងពិធីបិទការប្រឡងជ្រើសរើសសិស្សពូកែទូទាំងប្រទេស ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា បានមានប្រសាសន៍អបអរ និងបានផ្តាំផ្ញើដល់ក្មួយៗដែលជាជ័យលាភីសិស្សពូកែ និងជាសិស្សពូកែទាំងអស់ សូមបន្តខិតខំរៀនសូត្រ ស្រាវជ្រាវនិងកសាងខ្លួនឱ្យក្លាយជាយុវជនឆ្នើម ជាសសរទ្រូង និងជាអ្នកបន្តវេនដ៏រឹងមាំរបស់ប្រទេសជាតិ និងស្វែងរកកិត្តិយសថ្មីៗទៀតជូនជាតិ មាតុភូមិ។
ជាមួយគ្នានេះ ឯកឧត្តមរដ្ឋមន្រ្តី ក៏បានផ្តាំផ្ញើដល់ជ័យលាភីសិស្សពូកែទាំង ៣ មុខវិជ្ជា ទាំងថ្នាក់ទី ៩ និងថ្នាក់ទី១២ ត្រូវបន្តត្រៀមខ្លួនប្រឡងសញ្ញាបត្រមធ្យមសិក្សាបឋមភូមិ និងមធ្យមសិក្សាទុតិយភូមិថ្នាក់ជាតិ នាពេលខាងមុខ និងទទួលបានលទ្ធផលកាន់តែប្រសើរ ព្រមទាំងត្រៀមខ្លួនឱ្យបានល្អ ដើម្បីបន្តចូលរៀននៅមធ្យមសិក្សាទុតិយភូមិ និងនៅឧត្តមសិក្សា។
” សិស្សពូកែទាំងអស់នៅថ្ងៃនេះ នឹងក្លាយជាធនធានបញ្ញវន្ត សម្រាប់ពេលអនាគតរបស់កម្ពុជា ស្របពេលដែលប្រទេសយើងកំពុងត្រូវការនូវមូលធនមនុស្សជាចាំបាច់ ដើម្បីធ្វើការអភិវឌ្ឍប្រទេសឱ្យកាន់តែរីកចម្រើន…”
ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា
សូមបញ្ជាក់ថា ការប្រឡងសិស្សពូកែទូទាំងប្រទេសនៅឆ្នាំនេះ មានសិស្សានុសិស្សចូលរួមប្រឡងសរុបចំនួន ២៤០នាក់ ស្រី១២៧នាក់ ។ ការប្រឡងបានប្រព្រឹត្តទៅរយៈពេល៥ថ្ងៃ ដោយចាប់តាំងពីថ្ងៃទី១២ ខែឧសភា នៅវិទ្យាល័យជាស៊ីមសន្ធរមុខ រាជធានីភ្នំពេញ។
ក្រសួងអប់រំ យុវជន និងកីឡា បានឱ្យដឹងថា គ្រប់ដំណើរការប្រឡងតាំងពីដើមរហូតដល់ចប់បានប្រព្រឹត្តទៅប្រកបដោយសណ្ដាប់ធ្នាប់ របៀបរៀបរយល្អ មានសុវត្ថិភាព ពុំមានឧបទ្ទវហេតុ ឬប្រធានស័ក្តិឡើយ ហើយពុំមានបេក្ខជនអវត្តមាន ឬមានបញ្ហាសុខភាពគួរឱ្យកត់សម្គាល់នោះដែរ។ ដោយឡែកលទ្ធផលប្រឡង ត្រូវបានគណៈមេប្រយោគ និងគណៈកម្មការប្រឡងសម្រិតសម្រំាងដោយការយកចិត្តទុកដាក់ ប្រកបដោយគតិយុត្តិធម៌ និងរក្សាការសម្ងាត់៕
