ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការប្រកាសជ្រើសរើសបុគ្គលិក ក្នុងវិស័យការងារបៃតង «Green Job» បានកើនឡើងជិត ២ដង ដែលល្បឿននេះ គឺលឿនជាងចំនួនបុគ្គលិកជំនាញ ដែលកំពុងបំពេញការងារក្នុងវិស័យនេះទៅទៀត។ បច្ចុប្បន្ន មនុស្សតែម្នាក់ប៉ុណ្ណោះ ក្នុងចំណោម ៨នាក់ ដែលមានជំនាញពាក់ព័ន្ធនឹង ការលុបបំបាត់វិបត្តិអាកាសធាតុ ខណៈស្ត្រីមានចំនួនតិចតួច។ នេះបើតាមរបាយការណ៍ ជំនាញបៃតងសកលឆ្នាំ ២០២៣ « Global Green Skills Report 2023» របស់ LinkedIn ដែលបានវិភាគលើប្រទេសសមាជិកភាព ចំនួន ៤៨ ប្រទេស។
លោក Allen Blue សហស្ថាបនិក LinkedIn បានលើកឡើងថា «ប្រាក់រាប់ពាន់លានដុល្លារ ត្រូវបានវិនិយោគជារៀងរាល់ឆ្នាំ នៅក្នុងវិស័យការងារបៃតង ខណៈកិច្ចខិតប្រឹងប្រែងជុំវិញបញ្ហាអាកាសធាតុកំពុងកើនឡើងជាលំដាប់។ ដូច្នេះ យើងនឹងឃើញផលនៃការវិនិយោគនេះក្នុងរយៈពេលខាងមុខដ៏ខ្លី។»
តម្រូវការជំនាញបៃតងលើសពីមូលដ្ឋានជំនាញ
LinkedIn រាយការណ៍ថា ចន្លោះឆ្នាំ ២០២២ និង ២០២៣ ចំនួនបុគ្គលិក ដែលមានជំនាញដោះស្រាយបញ្ហាវិបត្តិអាកាសធាតុបានកើនឡើងដល់ ១២, ៣ ភាគរយ។ ទន្ទឹមនឹងនេះ ក្នុងការប្រកាសជ្រើសរើសបុគ្គលិកក្នុងរយៈពេលដូចគ្នា ដែលត្រូវការអ្នកជំនាញបៃតង យ៉ាងហោចណាស់ម្នាក់ បានកើនឡើងជិត ២ដង និងស្ថិតក្នុងអត្រា ២២, ៤ ភាគរយ។ ដូច្នេះ អត្រាបុគ្គលិកជំនាញផ្នែក ការងារបៃតង មានអត្រាអាចទទួលបានការងារលឿនជាង អ្នកជំនាញក្នុងវិស័យផ្សេងទៀត ក្នុងអត្រាជាមធ្យម ២៩ភាគរយ។
តើជំនាញបៃតងមានអ្វីខ្លះ?
ក្រុមប្រឹក្សាអន្តររដ្ឋាភិបាលរបស់អង្គការសហប្រជាជាតិស្តីពីការប្រែប្រួលអាកាសធាតុ (IPCC) បាននិយាយម្តងហើយម្តងទៀតថា សកម្មភាព ក្នុងការទប់ទល់នឹងការប្រែប្រួលអាកាសធាតុ ត្រូវតែពន្លឿន និងមានការត្រួតពិនិត្យជាប់ជាប្រចាំ។ ជាមួយគ្នានេះ ពិភពលោក ពិតជាត្រូវការ អ្នកជំនាញ និងមនុស្ស ដែលមានចំណេះដឹង ក្នុងការការពារបរិស្ថាន អភិរក្សធនធានធម្មជាតិ ឬក៏ការដកកាបូន (remove carbon)។
តាមរយៈការកំណត់អត្តសញ្ញាណ សមត្ថភាពទាំងនេះ និងការបង្កើតយុទ្ធសាស្ត្រ ដើម្បីអភិវឌ្ឍអ្នកជំនាញ លើការងារបៃតង, និយោជក អាចបង្កើតធនធានមនុស្ស ដែលមានទេពកោសល្យលើផ្នែកនេះបន្ថែមទៀត ដើម្បីជួយដោះស្រាយវិបត្តិអាកាសធាតុ។
ជំនាញបៃតងផ្តល់តួនាទីការងារដែលមានភាពធន់
ការស្រាវជ្រាវរបស់ LinkedIn បានរកឃើញថា ជំនាញ និងការងារបៃតងកំពុងបង្ហាញពីភាពធន់ ជាពិសេសនៅពេលមានភាពមិនច្បាស់លាស់ខាងសេដ្ឋកិច្ច។ ខណៈពេលដែលការជ្រើសរើសបុគ្គលិកកំពុងថយចុះ ប៉ុន្តែការជ្រើសរើសបុគ្គលិកលើជំនាញបៃតង បានកើនឡើងច្រើនជាង ១៥ភាគរយ។ ទិន្នន័យនេះ បង្ហាញថា ជំនាញក្នុងវិស័យការងារបៃតង មានអត្រាជួលខ្ពស់ជាងការងារក្នុងវិស័យផ្សេង ហើយលទ្ធផលនេះ ស្របគ្នានៅទូទាំង ៤៨ ប្រទេស ដែលបានចូលរួមស្ទង់មតិ។
ជំនាញបៃតង គឺជាជំនាញមាននិរន្តរភាព មានន័យថា នេះជាជំនាញមូលដ្ឋាន ដែលមានតម្រូវការខ្ពស់ និងមានប្រយោជន៍សម្រាប់ការកសាងអាជីពរយៈពេលវែងច្រើនទសវត្សរ៍ខាងមុខ ព្រោះការងារជាច្រើន នឹងត្រូវកើតឡើង នៅក្នុងពិភពលោក ដែលអាកាសធាតុកំពុងផ្លាស់ប្ដូរជាលំដាប់។ នេះបើតាមការលើកឡើងរបស់លោក លោក Allen Blue សហស្ថាបនិក LinkedIn ៕
