មិនមែនជារឿងតិចដងនោះទេ ដែលមនុស្សជួបនឹងបទពិសោធន៍អារម្មណ៍មួរម៉ៅ តានតឹង ខឹងសម្បារ និងស្រ្តេស ។ ដូច្នេះហើយទើបជំនាញធ្វើឱ្យចិត្តត្រជាក់មានភាពចាំបាច់ដើម្បីកាត់បន្ថយអារម្មណ៍អវិជ្ជមាន ក៏ដូចជាការពារមិនឱ្យមានបញ្ហាដល់សុខភាពផ្លូវចិត្ត។ នៅក្នុងការសិក្សាស្រាវជ្រាវបែបវិទ្យាសាស្រ្តរកឃើញថា បច្ចេកទេសនៃការលួងលោមចិត្តខ្លួនឯង រួមទាំងការធ្វើឱ្យខួរក្បាលស្រឡះ និងមានស្មារតីយល់ត្រូវសុទ្ធសឹងតែជាគន្លឹះសំខាន់ៗជួយឱ្យចិត្តត្រជាក់។ គេហទំព័រ Good Men Project  ផ្តល់ជូននូវគន្លឹះប្រាំចំណុចដើម្បីយកទៅអនុវត្ត និងការជៀសពីកត្តាដែលនាំឱ្យការប្រព្រឹត្តសកម្មភាពអវិជ្ជមានទាំងឡាយ។

១. មានស្មារតីរឭកដឹង ៖ ការផ្តោតអំពីបច្ចុប្បន្នភាព គឺជាបុព្វហេតុនាំឱ្យមនុស្សមានស្មារតីរលឹកដឹង តាមរយៈការអនុវត្តវិធីសាស្រ្តដូចជា សមាធិ ផ្តោតទៅលើដងខ្លួនទាំងមូល និងកត់សម្គាល់រាល់ចលនានៃរាងកាយជាការសម្រួលដល់ផ្លូវដង្ហើមចេញចូលឱ្យមានសភាពធូរស្រាយ និងកាត់បន្ថយនូវការគិតណាដែលមិនចាំបាច់ ឬការគិតលើសពីដែនសមត្ថភាពដែលអាចគ្រប់គ្រងបាន។ គួរចងចាំដែរថា វិធីសាស្រ្តនេះមិនផ្តល់ប្រសិទ្ធភាពសម្រាប់មនុស្សទូទៅទេ ប៉ុន្តែឆ្លងកាត់តាមការដកពិសោធន៍កន្លងមក វាពិតជាបានជួយដល់មនុស្សមួយចំនួនពិតមែន។

២. កាត់ចោលការគិតដែលមិននាំប្រយោជន៍ ៖ ជារឿយៗមនុស្សបានយកពេលទៅគិតរឿងមិនល្អជាច្រើនពីអតីតកាល ឬបារម្ភជ្រុលអំពីព្រឹត្តិការណ៍ មិនល្អណាមួយដែលមិនទាន់កើតឡើង កត្តានេះបណ្តាលឱ្យមានបញ្ហាដូចជា តានតឹង និងស្រ្តេសជាដើម។ ដើម្បីជៀសវាងនូវការគិតទាំងឡាយណាដែលមិនចាំបាច់ ឬរឿងដែលអ្នកមិនអាចដោះស្រាយបាន សូមប្តូរការគិតទៅលើរឿងអ្វីផ្សេងអាចថាជាការបន្លប់មួយពេលក៏បាន ឬទៅងូតទឹកកម្សាន្ត ឬមួយក៏ដើរចុះដើរឡើងជាដើម។

៣. កត់ទិនានុប្បវត្តិ ៖ ទិនានុប្បវត្តិមានន័យថា ជាការសរសេររាល់ព្រឹត្តិការណ៍ប្រចាំថ្ងៃ ឬហៅថាកំណត់ហេតុផ្ទាល់ខ្លួន ។  រឿងរ៉ាវនៅក្នុងជីវិតប្រចាំថ្ងៃមានច្រើនឥតគណនា ដូច្នេះកត់យកចំណុចណាដែលសំខាន់ ជាពិសេសទាក់ទងនឹងការបញ្ចេញអារម្មណ៍ផ្ទាល់ខ្លួន ពីព្រោះការសិក្សាធ្លាប់បានរកឃើញថា​វាជាសកម្មភាពជួយអភិវឌ្ឍសុខភាពផ្លូវចិត្ត។ យ៉ាងណាមិញ លោកអ្នកក៏អាចសរសេរអំពីអតីតកាល មិនថារឿងល្អក្ដី មិនល្អក្ដី! ឬក៏ជាព្រឹត្តិការណ៍ណាមួយដែលអ្នកមានក្ដីសោមនស្ស ។ តាមរយៈការសរសេរកំណត់ហេតុគឺអាចជួយឱ្យចិត្តស្ងប់ ឬត្រជាក់ ហើយវាក៏ជាវិធីសាស្រ្តមួយដ៏មានប្រជាប្រិយភាព ក្នុងការទាញបាននៅប្រយោជន៍ជាច្រើនដូចជា រំសាយអារម្មណ៍ បង្កើនការចងចាំ និងកាត់បន្ថយស្រ្តេស។

៤. ធ្វើយូហ្កា ៖ វិធីសាស្រ្តនេះក៏ក្លាយជាសកម្មភាពដ៏ពេញនិយមផងដែរនៅប៉ុន្មានឆ្នាំចុងក្រោយនេះ តាមរយៈការធ្វើយូហ្កា វាជួយបង្កើនភាពបត់បែន ដើម្បីជួយឱ្យកាយនិងចិត្តធូរស្រាលជាងមុន។

៥. ស្គាល់និងទទួលយកខ្លួនឯង ៖ ទទួលស្គាល់ថាសុខភាពផ្លូវចិត្ត ក៏ដូចជាចិត្តក្ដៅ ឬមួរម៉ៅតែងកើតមានចំពោះបុថុជ្ជនជាធម្មតា។ ដូច្នេះគួរតែទទួលដឹងថាមិនមែនមានតែអ្នកនោះទេ គឺមនុស្សស្ទើរតែគ្រប់គ្នាសុទ្ធតែប្រសព្វនឹងស្ថានភាពបែបនេះ។ ពេលស្ថិតក្នុងស្ថានការណ៍មិនល្អ លោកអ្នកគ្រាន់តែសួរទៅកាន់ខ្លួនឯងថា តើខ្ញុំមានអារម្មណ៍ស្ងប់ឬនៅ? ការសួរបែបនេះ ជារបៀបនៃការតាមដានអំពីបច្ចុប្បន្នភាពនៃខ្លួនឯង៕