ក្រុមគោព្រៃកំណាច ជាឈ្មោះរ៉ុបូត របស់ក្រុមសិស្សនៃសាលារៀនជំនាន់ថ្មី វិទ្យាល័យព្រះយុគន្ធដែលបានបង្កើតឡើងដោយសមាជិកប្រាំពីរនាក់ និងធ្លាប់បានចូលរួមប្រកួតជាមួយក្រុមជាង៦០ និងបានឆ្លងកាត់ដល់ត្រឹម៨ក្រុមចុងក្រោយផងដែរ។

កុមារា ផាត់ សិរីវឌ្ឍនៈ តំណាងក្រុមគោព្រៃកំណាច បានប្រាប់ឱ្យដឹងថា រ៉ូបូតវាយបក ឬរ៉ូបូតប្រយុទ្ធនេះ បានបង្កើតឡើងដើម្បីទៅប្រកួតជាមួយនឹងរ៉ូបូតដទៃទៀត និងជាចំណេះដឹងសម្រាប់សមាជិកក្រុមដែលអាចរៀនសូត្រពីការបង្កើតថ្មី ផលវិបាក ដំណោះស្រាយ និងការងារជាក្រុមផងដែរ។ វឌ្ឍនៈ បានបន្តថា រ៉ូបូតនេះបានចំណាយពេលមួយខែដើម្បីផលិតឡើង ទាំងការរចនារូបរាង (Design) ការតំឡើង និងការសិក្សាអំពីគ្រឿងក្នុងរ​បស់វាផងដែរ។

សិស្សថ្នាក់ទី៧ រូបនេះបន្ថែមថា ការផលិតរ៉ូបូតនេះឡើងក៏បានធ្វើឱ្យខ្លួន និងសមាជិកក្រុមផ្សេងទៀតបានស្វែងយល់ជាច្រើនអំពីដំណាក់កាលផលិតដោយចាប់តាំងពីការសម្រេចចិត្តបែបណាដើម្បីបំពាក់ឌីណាម៉ូដែលមានកម្លាំងខ្លាំងឱ្យសមនឹងរូបរាង និងការជ្រើសរើសប្រភេទថ្មសម្រាប់បំពាក់ក្នុងគ្រឿងរ៉ូបូត ការគិតអំពីរូបរាងឱ្យសមល្មម និងគ្រប់គីឡូដែលកម្មវិធីប្រកួតបានកំណត់ ការគិតអំពីការជ្រើសរើសសម្ភារៈមួយចំនួនដើម្បីឱ្យរ៉ូបូតមានរូបរាងសមល្មម និងរឹងមាំដែលអាចប្រយុទ្ធជាមួយនឹងរ៉ូបូតដទៃទៀតបាន។

ជាមួយគ្នានេះ ដើម្បីអាចភ្ជាប់ការបញ្ជាពីដៃបញ្ជាទៅកាន់តួរ៉ូបូតបាន កុមារាដ៏ឆ្នើមរូបនេះ បានសិក្សា និងយក Remote ពីដៃបញ្ជាយន្តហោះបញ្ជា និងដុំ Signal ម្យ៉ាងដើម្បីភ្ជាប់ក្នុងតួរ៉ូបូត និងដៃបញ្ជា ព្រោះសមាជិកក្រុមទាំងអស់មិនទាន់បានរៀនដល់ផ្នែកសរសេរកូដសម្រាប់ប្រើប្រាស់នៅឡើយ។

កុមារា ផាត់ សិរីវឌ្ឍនៈ តំណាងក្រុមគោព្រៃកំណាច បានបញ្ជាក់ពីគោលបំណងទៅថ្ងៃអនាគតថា ខ្លួនមានបំណងនឹងបង្កើតរ៉ូបូតធំជាងនេះ និងមានស្តង់ដាជាងនេះ ដើម្បីអាចទៅចូលរួមប្រកួតជាមួយនឹងក្រុមផ្សេងៗ និងប្រកួតនៅក្នុងឆាកអន្តរជាតិផងដែរ៕