ប្រទេសកម្ពុជាជាប្រទេសដែលអំណោយផលផ្នែកកសិកម្ម ប៉ុន្តែប្រជាជនភាគច្រើននៅធ្វើកសិកម្មបែបប្រពៃណីនៅឡើយ ។ ដោយមើលឃើញពីការអនុវត្តកសិកម្មប្រពៃណីហើយទទួលបានទិន្នផលតិច ទើបយុវជន ឡាយ សុវិសារ ចង់កែប្រែសហគមន៍របស់ខ្លួនទៅជាសហគមន៍កសិកម្មទំនើបដើម្បីទទួលបានទិន្នផលខ្ពស់ ចំណាយទន់តិច។

យុវជន ឡាយ សុវិសារ បច្ចុប្បន្ន​កំពុងសិក្សាថ្នាក់បរិញ្ញាបត្រជំនាញក្សេតសាស្ត្រ នៅវិទ្យាស្ថានពហុបច្ចេកទេសភូមិភាគតេជោសែនបាត់ដំបង ។ វិសារ និយាយថា បានជាខ្លួនសម្រេចចិត្តរៀនជំនាញក្សេតសាស្ត្រ ព្រោះខ្លួនមានចំណូលចិត្តទាក់ទងការដាំដុះ ការចិញ្ចឹមសត្វ និងមើលឃើញពីការដាំបន្លែលើប្រព័ន្ធទំនើបមានលក្ខណៈឡូយ និងប្លែក ដែលធ្វើឱ្យ វិសារ កាន់តែចង់សិក្សាជំនាញនេះឱ្យកាន់តែច្បាស់។

ត្បិតការសិក្សាជំនាញនេះមានផលលំបាក និងបញ្ហាប្រឈមមួយចំនួន ដូចជាការអនុវត្តនៅក្រោមកំដៅថ្ងៃ ការចុះទៅកន្លែងអនុវត្តផ្ទាល់ ចំណាយពេលយូរ ប៉ុន្តែ វិសារ មិនមានការរាថយឡើយ ថែមទាំងទទួលបានការលើកទឹកចិត្តពីក្រុមគ្រួសារ ជាពិសេសម្ដាយឪពុកផ្ទាល់ ដែលបានជំរុញស្មារតីឱ្យ វិសារ ខិតខំព្យាយាមបន្ថែមដើម្បីទៅដល់គោលដៅ។

បើតាម​យុវជន ឡាយ សុវិសារ ការរៀនជំនាញក្សេតសាស្រ្តនេះ ជាការសិក្សាពីការដាំដុះ ការបំបែកពូជដំណាំ ការប្រើថ្នាំពុលទាក់ទងនឹងសត្វល្អិត និងការចិញ្ចឹមសត្វមួយផ្នែកតូចផងដែរ។ វិសារបន្តថា ក្រោយពីបញ្ចប់ការសិក្សាថ្នាក់បរិញ្ញាបត្រជំនាញនេះ អ្នកសិក្សាក៏អាចមានឱកាសធ្វើជាគ្រូបច្ចេកទេស ធ្វើការនៅក្នុងក្រុមហ៊ុនជី ក្រុមហ៊ុនកសិកម្មលក់គ្រាប់ពូជដំណាំ ហើយក៏មានសិទ្ធិអាចបើកដេប៉ូចែកចាយថ្នាំគីមីកសិកម្ម ឬអាចបើកកសិដ្ឋានផ្គត់ផ្គង់ដំណាំបន្លែផ្សេងៗ។

និស្សិតផ្នែកកសិកម្មរូបនេះបញ្ជាក់ថា ក្រៅពីមើលឃើញអត្ថប្រយោជន៍ជាច្រើន នៃជំនាញនេះ ខ្លួនក៏មើលឃើញពីការដាំដំណាំ និងបន្លែផ្សេងៗរបស់ប្រជាជនក្នុងសហគមន៍ខ្លួនផងដែរ ប៉ុន្តែការដាំនោះជាការដាំបែបបុរាណ ធ្វើការចំណាយទុនច្រើន និងទទួលបានទិន្នផលតិច ដូច្នេះហើយទើប ខ្លួនមានក្ដីស្រមៃថា ក្រោយបញ្ចប់ការសិក្សាជំនាញនេះ នឹងយកចំណេះដឹងដែលខ្លួនបានរៀនទៅចែករំលែកដល់ប្រជាជនក្នុងការសហគមន៍ឱ្យបានស្វែងយល់ និងចេះដាំដំណាំបែបកសិកម្មទំនើបដែលអាចទទួលបានផលច្រើន និងចំណាយទុនតិច និងព្យាយាមកែច្នៃបន្លែ ឬដំណាំផ្សេងៗឱ្យមានគុណភាព និងមានការគាំទ្រទទួលស្គាល់ដើម្បីជាទីផ្សារសម្រាប់ប្រជាជនក្នុងសហគមន៍៕