កម្មវិធីមនសិការពលរដ្ឋល្អ ដែលជាកម្មវិធីបណ្ដុះបណ្ដាលស្មារតី និងសមត្ថភាពយុវជនកម្ពុជា​ នៅឆ្នាំ២០២៦នេះ កំពុងអនុវត្តនៅតាមវិទ្យាល័យគោលដៅក្នុងរាជធានី-ខេត្តចំនួន១២ ដោយផ្តោត​លើសិស្សានុសិស្ស​កម្រិតថ្នាក់ទី១០ និង​ថ្នាក់ទី១១ ដើម្បីជំរុញពួកគេឱ្យមានបំណិនជីវិត ភាពជាអ្នកដឹកនាំ។

លោក ស៊ីវ ឧត្តម មន្ត្រីលេខាធិការដ្ឋាននៃអគ្គនាយកដ្ឋានយុវជន មានប្រសាសន៍ថា កម្មវិធី “មនសិការពលរដ្ឋល្អ” ត្រូវ​បានដាក់ឱ្យអនុវត្ដសាកល្បងនៅឆ្នាំ២០២៤ ក្នុងគោលបំណងបណ្តុះមនសិការ ឆន្ទៈ និងភាពជាពលរដ្ឋល្អដល់យុវជនកម្ពុជា ដើម្បីក្លាយជាសរសរទ្រូង និងជាធនធានដ៏មាន សារៈសំខាន់សម្រាប់ប្រទេសជាតិ នាពេលអនាគត។ លើសពីនេះ កម្មវិធីក៏បណ្តុះគំនិតច្នៃប្រឌិត ជំនាញទន់ ភាពជាអ្នកដឹកនាំ និងការធ្វើសេចក្តីសម្រេចចិត្តដ៏ត្រឹមត្រូវ ក្នុងការជ្រើសរើសជំនាញអាជីព ដើម្បីពង្រឹង និងពង្រីកសក្តានុពលរបស់យុវជនកម្ពុជា។ ជាពិសេស ផ្តល់ឱកាសឱ្យយុវជនមានការចូលរួមយ៉ាងសកម្មក្នុងការងារស្ម័គ្រចិត្តលើកិច្ចការងារសង្គម និងការអនុវត្ត តួនាទីកាតព្វកិច្ច និងការទទួលខុសត្រូវរបស់ខ្លួន ដើម្បីរួមចំណែកអភិវឌ្ឍប្រទេសជាតិក្នុងនាមជាពលរដ្ឋល្អ។​

ក្រោយ​ការ​ដាក់​ឱ្យ​អនុវត្តសាកល្បង កម្មវិធីបានទទួលការគាំទ្រច្រើន ហើយ​ក៏​បានពង្រីកវិសាលភាពពីរាជធានី-ខេត្តពីចំនួន៧ក្នុងឆ្នាំ២០២៤ ទៅដល់ចំនួន១២ ក្នុងឆ្នាំ២០២៥ ក៏ដូចជាកំណើនចំនួនក្លឹបសិក្សា និងការបន្ថែមគម្រោង “កម្ពុជាក្នុងបេះដូងខ្ញុំ” តាមរយៈការឱ្យមានការសរសេរ និងការអនុវត្តគម្រោង នៅតាមបណ្តាក្លឹបសិក្សាផងដែរ។

លោក ស៊ីវ ឧត្តម មានប្រសាសន៍ថា ក្នុងឆ្នាំ២០២៦នេះ កម្មវិធី​មនសិការពលរដ្ឋល្អ ក៏នៅតែបន្តអនុវត្តក្នុងរាជធានី-ខេត្តចំនួន១២ ដដែល រួមមាន រាជធានីភ្នំពេញ ខេត្ដកណ្ដាល ខេត្ដកំពង់ស្ពឺ ខេត្ដព្រះសីហនុ ខេត្ដបាត់ដំបង ខេត្ដស្វាយរៀង និងខេត្ដសៀមរាប ខេត្តតាកែវ ខេត្តប៉ៃលិន ខេត្តស្ទឹងត្រែង ខេត្តកំពង់ចាម និងខេត្តកំពង់ធំ។

សិស្សានុសិស្ស​ដែលស្ថិត​នៅ​ក្នុង​កម្មវិធី មនសិការពលរដ្ឋល្អ នឹងទទួលបានការ​សិក្សា​រយៈពេល ១ម៉ោង ក្នុងមួយសប្តាហ៍ (កំណត់ម៉ោងសិក្សាដោយសាលាគោលដៅ និងបត់បែនតាមលទ្ធភាពជាក់ស្តែង) ដោយ​ក្នុង​មួយម៉ោងនេះ សិស្សានុសិស្សមិនត្រឹមតែសិក្សាលើទឹ្រស្តីនៃមេរៀននោះទេ ប៉ុន្តែក៏​មាន​ជាការពិភាក្សាបន្ថែមនៅក្នុងថ្នាក់ ការធ្វើកិច្ចការងារជាក្រុម ដោយរួមបញ្ចូលការចូលរួមសកម្មភាពសង្គម និងការងារស្ម័គ្រចិត្តផ្សេងៗក្នុងសហគមន៍ ដែលត្រូវបានយកមកអនុវត្តក្នុងសង្គមជាក់ស្តែងផងដែរ។ បើតាមលោក ស៊ីវ ឧត្តម សកម្មភាពសំខាន់ក្នុងកម្មវិធីរួមមាន ការបង្រៀន និងរៀនមានរយៈពេល១២សប្តាហ៍, កម្មវិធីទស្សនកិច្ចសិក្សានៅតាមតំបន់ប្រវត្តិសាស្រ្ត, កម្មវិធីជំនួបវាគ្មិនពិសេស ការអនុវត្ត និងការប្រកួតគម្រោង “កម្ពុជាក្នុងបេះដូងខ្ញុំ”។

មន្ត្រីលេខាធិការដ្ឋាននៃអគ្គនាយកដ្ឋានយុវជន បន្ថែមថា សម្រាប់គម្រោង “កម្ពុជាក្នុងបេះដូងខ្ញុំ” ជាយន្តការមួយដ៏សំខាន់ក្នុងការជួយលើកទឹកចិត្តសិស្សឱ្យចេះស្វែងយល់ ចេះមើលឃើញពីបញ្ហានៅក្នុងសហគមន៍ ហើយព្យាយាមជួយរកដំណោះស្រាយស្របតាមខ្លឹមសារបណ្តុះបណ្តាល ដែលមាននៅក្នុងកម្មវិធីសិក្សា នៃកម្មវិធីមនសិការពលរដ្ឋល្អ។ ការអនុវត្តគម្រោងនេះ ជាវិធីសាស្រ្តបង្រៀន និងរៀន ដែលឱ្យសិស្សានុសិស្សរៀនតាមរយៈការអនុវត្តគម្រោងជាក់ស្តែង ហើយបង្កើតជាផលិតផល ឬលទ្ធផលចុងក្រោយដោយផ្សារភ្ជាប់ជាមួយប្រធានបទធំៗលើវិស័យអប់រំ វប្បធម៌ សាសនា កីឡា សុខាភិបាល ទេសចរណ៍ បរិស្ថាន និងកសិកម្ម ជាដើម។

“ពលរដ្ឋល្អ គឺជាពរជ័យដល់សង្គម, ពលរដ្ឋល្អតែងគិត និងយល់ថា ខ្លួនមានការទទួលខុសត្រូវជាក់លាក់ចំពោះរដ្ឋ ប្រៀបដូចជារដ្ឋមានការទទួលខុសត្រូវជាក់លាក់ចំពោះពលរដ្ឋដូចគ្នា”

តាមប្រសាសន៍​លើកឡើងរបស់លោក ស៊ីវ ឧត្តម កម្មវិធីមនសិការពលរដ្ឋល្អ នឹងបំពេញបន្ថែមនូវអ្វីដែលមានស្រាប់ក្នុងកម្មវិធីសិក្សារបស់រដ្ឋ លើការប្រើប្រាស់បំណិនទាំងអស់ប្រកប ដោយឆន្ទៈ ដើម្បីអភិវឌ្ឍនយុវជន​ឱ្យ​ចូលរួមក្នុងការអភិវឌ្ឍប្រទេសជាតិ។ ​លោកថា កម្មវិធីមនសិការពលរដ្ឋល្អ ពិតជាមានអត្ថប្រយោជន៍ល្អ សម្រាប់គ្រួសារ សហគមន៍ និងសង្គមជាតិទាំងមូល ធ្វើឱ្យសង្គមជាតិមានប្រសើរឡើងជាវិជ្ជមាន និងមានការអភិវឌ្ឍប្រកបដោយចីរភាព វិបុលភាព និងភាពសុខុមដុម៕