ធំធាត់ឡើងដោយបានឃើញគំរូពីម្ដាយចូលចិត្តដាំដំណាំ បង្កាត់ពូជកូនផ្កាអគីដេ រុក្ខជាតិលម្អ និងផ្កាផ្សេងៗដែលធ្វើយុវជនម្នាក់មកពីខេត្តពោធិ៍សាត់សម្រេចចិត្តជ្រើសរើសជំនាញវិទ្យាសាស្ត្រដំណាំដើម្បីសិក្សា និងស្វែងយល់បន្ថែមអំពីដំណាំ។ នេះជាដំណើរដើមទង នៃការសិក្សាជំនាញវិទ្យាសាស្ត្រដំណាំរបស់យុវជន ប៊ិន ស៊ិនពុទ្ធិវង្ស និស្សិតកំពុងសិក្សាឆ្នាំទី៣ នៃវិទ្យាស្ថានបច្ចេកវិទ្យាកំពង់ស្ពឺ។

យុវជន ប៊ិន ស៉ិនពុទ្ធិវង្ស បានប្រាប់ AMS ថា ជំនាញវិទ្យាសាស្ត្រដំណាំនេះ គឺគេសិក្សាអំពី សត្រូវដំណាំដូចជា សត្វល្អិតចង្រៃ ពពួកមេរោគ (ផ្សិត បាក់តេរី​វីសុស) និងសិក្សាលើការធ្វើរបាយការផ្សិត ការបង្កាត់ពូជ ការបណ្ដុះជាលិកាជាដើម។ ស៉ិនពុទ្ធិវង្ស បន្ថែមថា ការដែល​ខ្លួន​សម្រេចចិត្តរៀនជំនាញនេះ ព្រោះខ្លួនបានឃើញម្ដាយដាំដំណាំនៅផ្ទះ និងបង្កាត់ពូជរុក្ខជាតិជាច្រើននៅផ្ទះដែលធ្វើឱ្យខ្លួនចង់ចេះ ចង់ដឹងអំពីជំនាញនេះបន្ថែម ហើយក៏យល់ឃើញថា បើមានចំណេះជំនាញមួយនេះច្បាស់លាស់ នឹងអាចជួយដល់កសិករនៅក្នុងសហគមន៍ ដោះស្រាយបញ្ហាដែលពួកគាត់ជួបប្រទះ។

ចំពោះការសម្រេចចិត្តរៀននៅវិទ្យាស្ថានបច្ចេកវិទ្យាកំពង់ស្ពឺ យុវជនអាយុ២១ឆ្នាំរូបនេះ បានរៀបរាប់ថា ក្រោយទទួលបានលទ្ធផលមិនល្អក្នុងការ​ប្រឡង​សញ្ញាបត្រមធ្យមសិក្សា​ទុតិយភូមិ ខ្លួនបានស្វែងរកសាលារៀនជំនាញផ្នែកកសិកម្មដែលជាក្ដីស្រមៃរបស់ខ្លួនតាំងពីតូច ប៉ុន្តែសាលាកសិកម្មនៅក្នុងខេត្តពោធិ៍សាត់មិនមានជំនាញនេះ ក៏បន្តស្វែងរកនៅភ្នំពេញនិងតាមបណ្ដាខេត្តមួយចំនួន។ ជាចៃដន្យ ពុទ្ធិវង្ស បានឃើញពីការផ្សព្វផ្សាយសិក្សាជំនាញវិទ្យាសាស្ត្រដំណាំនៅវិទ្យាស្ថានបច្ចេកវិទ្យាកំពង់ស្ពឺ និងកំពុងផ្ដល់អាហារូបករណ៍១០០%ផងនោះ ខ្លួនក៏សម្រេចចិត្តដាក់ពាក្យស្នើសុំអាហារូបករណ៍ដើម្បីសិក្សា។ ក្នុងអំឡុងពេលសិក្សាឆ្នាំទី១ និងទី២ ពុទ្ធិវង្ស បានរៀនថ្នាក់បរិញ្ញាបត្ររង និងបានដាក់ពាក្យស្វ័យរិនប្រឡងថ្នាក់ទី១២។ នៅពេលសិក្សាដល់ឆ្នាំទី២ ពុទ្ធិវង្ស បានចុះហាត់ការងារនៅខេត្តត្បូងឃ្មុំ ដែលការងារភាគច្រើន សិក្សាទៅលើការថែទាំដំណាំហូបផ្លែ ការថែទាំដំណាំត្រសក់ផ្អែម ដំណាំស្លឹក ដំណាំជលព្រឹក្ស ដូចជាប៉េងប៉ោះ ម្ទេសប្លោកជាដើម។

ក្រោយចប់ឆ្នាំទី២ លទ្ធផលប្រឡងស្វ័យរិនក៏ជាប់ យុវជន ពុទ្ធិវង្ស បានសម្រេចបន្តសិក្សា​ទៅថ្នាក់បរិញ្ញាបត្រវិទ្យាដំណាំនេះបន្ថែម។ មកដល់ពេលនេះ ត្រឹមឆ្នាំទី៣ ពុទ្ធិវង្ស ក៏ធ្លាប់ទទួលលឺពាក្យអ្នកជិតខាងគេលើកឡើងថា «រៀនកសិកម្មធ្វើអី បើរៀនចប់ធ្វើស្រែចម្ការដដែលហ្នឹង គួរណាតែទៅរៀនជំនាញផ្សេងៗដែលមានលើទីផ្សារនានា» ប៉ុន្តែមតិទាំងនោះមិនបានបង្អាក់ចិត្តឱ្យ វង្ស បោះបង់រៀនជំនាញនេះឡើយ ព្រោះ វង្ស នៅតែបន្តសិក្សាជំនាញនេះដោយសារក្ដីស្រលាញ់ និងមើលឃើញពីសារប្រយោជន៍នៃជំនាញនេះ។

យុវជន ប៊ិន ស៉ិនពុទ្ធិវង្ស បានលើកឡើងបន្ថែមថា ការរៀនជំនាញវិទ្យាសាស្រ្តដំណាំកាលពីដំបូងៗ គឺធ្លាប់យល់ឃើញថា រៀនជំនាញនេះហត់ ក្ដៅ និងពិបាកក្នុងការរៀន ព្រោះត្រូវ ប្រើប្រាជ្ញាផង ប្រើកម្លាំងច្រើនផង ប៉ុន្តែយ៉ាងណា ស៉ិនពុទ្ធិវង្ស អាចសម្របខ្លួនបានក្រោយសិក្សាបានកន្លះឆ្នាំ។ ជាក់ស្ដែងការរៀនជំនាញនេះ ប្រើកម្លាំងតែតាមមុខជំនាញមួយចំនួនតែប៉ុណ្ណោះដែលត្រូវកាប់ដីសម្រាប់អនុវត្ត ឬពិសោធន៍ ចំណែកមុខវិជ្ជាផ្សេងៗត្រូវសិក្សាចំណេះដឹងទូទៅដូចជំនាញដទៃដែរ។

បច្ចុប្បន្ននេះ យុវជន ពុទ្ធិវង្ស កំពុងសិក្សាឆ្នាំទី៣ និងមានតួនាទីជាប្រធាន និងជាអ្នកមើលការខុសត្រូវកន្លែងស្នាក់នៅខាងអន្តេវាសិកដ្ឋាន។ ពុទ្ធិវង្ស បន្ថែមថា ក្រោយបញ្ចប់ជំនាញនេះ អ្នកសិក្សាអាចចេញទៅខាង Lap ក្នុងការពិសោធន៍ទាក់ទងទៅនឹងផ្នែកគុណភាពផ្សេងៗ អាចធ្វើការតាមដេប៉ូផ្នែកលក់ជីកសិកម្ម ឬថ្នាំកសិកម្ម និងការប្រឡងដាក់ពាក្យធ្វើជាគ្រូកសិកម្ម ឬមន្ត្រីកសិកម្ម។

ជារួមយុវជន ប៊ិន ស៉ិនពុទ្ធិវង្ស យល់ឃើញថា សម្រាប់អ្នកដែលចង់សិក្សាជំនាញផ្សេងៗដែលទាក់ទងនឹងផ្នែកកសិកម្ម ឬជំនាញវិទ្យាសាស្ត្រកសិកម្ម សូមតាំងចិត្តសិក្សាឱ្យបានជាប់លាប់ និងច្បាស់លាស់ព្រោះអាចជួយឱ្យអ្នករៀនមានជំនាញច្បាស់លាស់ ជួយខ្លួនឯងឱ្យមានការងារច្បាស់លាស់ និងត្រឹមត្រូវសម្រាប់ផ្គត់ផ្គងខ្លួនឯង និងគ្រួសារនាពេលអនាគត៕