ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
« ប្រសិនបើមិនមានអាហារូបករណ៍គម្រោងអប់រំសហគមន៍រេដបូក ខ្ញុំមិនមានឱកាសសិក្សានៅសាកលវិទ្យាល័យនិងជំនាញដែលខ្ញុំស្រលាញ់នោះទេ» ។ នេះជាការលើកឡើងរបស់យុវជន ថន ខាក់ និស្សិតអាហារូបករណ៍ថ្នាក់បរិញ្ញាបត្រនៅសាកលវិទ្យាភូមិន្ទកសិកម្ម ក្រោមគម្រោងអាហារូបករណ៍អប់រំសហគមន៍រេដបូកឆ្នាំ២០២២-២០២៦ ។
យុវជន ថន ខាក់ បានលើកឡើងថា អាហារូបករណ៍គម្រោងអប់រំសហគមន៍រេដបូកបានផ្ដល់ឱកាសឱ្យខ្លួន និងសិស្សផ្សេងៗនៅក្នុងតំបន់ដែលមិនមានលទ្ធភាពបន្តការសិក្សានៅមហាវិទ្យាល័យបានទៅសិក្សា ត្បិតមានជីវភាពខ្សត់ខ្សោយមិនអាចមានលទ្ធភាពបង់ថ្លៃសិក្សាបានឡើយ ។ លោកបន្តថា អាហារូបករណ៍នេះបានជួយឱ្យលោកអាចបន្តការសិក្សានៅសាកលវិទ្យាល័យបាន ថែមទាំងផ្ដល់ការចំណាយប្រចាំខែសម្រាប់កន្លែងស្នាក់នៅ សម្លៀកបំពាក់ ប័ណ្ណធានារ៉ាប់រងសុខភាព សម្លៀកបំពាក់ ស្បែកជើង កាបូប សម្ភារៈសិក្សា និងរបស់ប្រើប្រាស់ផងដែរ ។
ថន ខាក់ បានបន្តថា ដើម្បីទទួលបានអាហារូបករណ៍នេះ បេក្ខជនត្រូវមានតាមលក្ខខណ្ឌដូចជា បានប្រឡងជាប់សញ្ញាបត្រមធ្យមសិក្សាទុតិយភូមិ មានទីលំនៅនៅតំបន់សហគមន៍គោលដៅ មានឆន្ទៈក្នុងការសិក្សា និងមានឆន្ទៈក្នុងការត្រឡប់មកជួយសហគមន៍វិញក្រោយបញ្ចប់ការសិក្សា ។ លើសពីនេះ ក្នុងការដាក់ពាក្យស្នើសុំអាហារូបករណ៍បេក្ខជនត្រូវទៅសុំពាក្យអាហារូបករណ៍ពីសាលាឃុំដើម្បីបំពេញ ។
ក្នុងការបំពេញពាក្យ បេក្ខជនត្រូវបំពេញបែបបទការស្នាក់នៅ (បញ្ជាក់ទីលំនៅ)ក្នុងតំបន់ បំពេញលិខិតពេញចិត្តគោរពតាមលក្ខខណ្ឌរបស់អាហារូបករណ៍កំណត់ក្រោយបញ្ជប់ការសិក្សា ។ សរសេរចំណាប់អារម្មណ៍អំពីជំនាញដែលចង់សិក្សា និងឆន្ទៈជួយខ្លួនឯង និងសហគមន៍ក្រោយសិក្សាដូចម្ដេច ។ បន្ទាប់ពីបំពេញពាក្យរួចរាល់ បេក្ខជនត្រូវយកពាក្យទៅកាន់នៅមេភូមិដើម្បីធ្វើការត្រួតពិនិត្យ និងហត្ថលេខាទទួលស្គាល់ ហើយបេក្ខជនត្រូវយកទៅជូនមេឃុំដើម្បីជូនដំណឹងទៅកាន់អង្គការដើម្បីត្រួតពិនិត្យបន្ថែម និងធ្វើការសម្ភាសន៍ដោយផ្ទាល់ផ្នែកចំណេះដឹងទូទៅអំពីអត្ថប្រយោជន៍នៃជួរភ្នំក្រវាញសម្រាប់សហគមន៍ ។
បន្ទាប់មក បេក្ខជនតម្រូវឱ្យសរសេរតែងសេចក្ដីម្ដងទៀតអំពីឆន្ទះក្នុងការសិក្សាជំនាញរបស់ខ្លួនដែលអាចជួយដល់សហគមន៍ និងខ្លួនឯងអ្វីខ្លះក្រោយរៀនចប់ ។ ក្រោយការសម្ភាន៍ និងសាកសួរហើយភាគីអង្គការសម្ព័ន្ធមិត្តសត្វព្រៃនឹងធ្វើការវាយតម្លៃដាក់ពិន្ទុទៅលើស្ថានភាពជាក់ស្ដែងសម្រាប់ជ្រើសរើសជ័យលាភី ។
ជាមួយគ្នានេះដែរ យុវជន ថន ខាក់ ក៏សូមថ្លៃងអំណរគុណដល់គម្រោងអាហារូបករណ៍ដែលបានផ្ដល់ឱកាសដល់យុវជននៅក្នុងតំបន់ដែលមិនមានលទ្ធភាពសិក្សាក៏ដូចជាបណ្ដុះធនធានមនុស្សផងដែរ ។ គួរបញ្ជាក់ដែរថា អាហារូបករណ៍គម្រោងអប់រំសហគមន៍រេដបូក (REDD+) តំបន់ជួរភ្នំក្រវាញជាគម្រោងរបស់ក្រសួងបរិស្ថាន និងអនុវត្តន៍គម្រោងដោយអង្គការសម្ព័ន្ធមិត្តសត្វព្រៃ ៕
