ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការរៀបចំទីតាំងស្នាក់អាស្រ័យបានល្អ ជំរុញទៅដល់គុណភាព នៃការរស់នៅ ការសន្សំពេលវេលា បង្កើនផលិតភាព ផ្តោតលើការងារ សុភមង្គល និងសុខុមាលភាពទូទៅ។ ភាពមមាញឹកផង ការមិនមានទម្លាប់រៀបចំផង រួមទាំងខ្វះនូវភាពគំរូផង ជាកត្តានាំឱ្យពិបាកក្នុងការរក្សាទម្លាប់រៀបចំកន្លែងនៅបានទៀតទាត់។ តែយ៉ាងណា តាមរយៈគេហទំព័រ Homes and Gardens បានបង្ហាញវិធីសាស្រ្ត ក្នុងការបំផុសទឹកចិត្តឱ្យបំបែកទម្លាប់មិនល្អ ហើយងាកមកចាប់អារម្មណ៍លើការរៀបចំកន្លែងស្នាក់នៅឱ្យមានរបៀបរៀបរយ។
រកហេតុផលនៃការចង់ផ្លាស់ប្តូរ ៖ កាលដែលមានបទពិសោធន៍មានអារម្មណ៍រអៀសខ្លួនដោយសារការរក្សាទម្លាប់មិនល្អជារៀងរាល់ថ្ងៃពេលនៅផ្ទះ គឺជាស្ថានភាពរំខានទាំងផ្លូវចិត្ត និងផ្លូវកាយ ដូចជាការបណ្តោយឱ្យក្នុងផ្ទះ ឬបន្ទប់មានភាពរញ៉េរញ៉ៃ ទោះបីជាដឹងពីផលវិជ្ជមានអំពីភាពស្អាតបាតក៏ដោយ។
ដើម្បីឱ្យបរិយាកាសក្នុងផ្ទះមានផាសុកភាពទៅបាន មានរួមបញ្ចូលរាល់សកម្មភាពដូចជា ការលាងសម្អាតសម្ភារ សម្អាតធូលី សម្លៀកបំពាក់ ក៏ដូចជាការតុបតែងដទៃទៀត។ ប៉ុន្តែថា តើធ្វើយ៉ាងណាដើម្បីជំរុញចិត្តឱ្យបន្តធ្វើជាញឹកញាប់ និងទៀងទាត់ទៅបាន? ចម្លើយគឺ សួរខ្លួនឯងជាមុន ហេតុអ្វីត្រូវការផ្លាស់ប្តូរទម្លាប់មួយនេះ? ការស្វែងរកហេតុផលបានបង្កើតភាពងាយស្រួលក្នុងការកំណត់គោលដៅ ផ្តល់ភាពងាយស្រួលក្នុងការជ្រើសរើសសកម្មភាពដទៃ ដើម្បីធ្វើជំនួសឱ្យសកម្មភាពដែលមិនចង់បានពីមុនៗ។ ការដាក់សំណួរសួរខ្លួនឯងទៀតសោត មិនមែនគ្រាន់តែធ្វើឱ្យតែបានៗនោះទេ គឺចំណាយពេលយ៉ាងហោចណាស់ប្រាំដងក្នុងការសញ្ជឹងគិតអំពីការចង់បាននីមួយៗ ដើម្បីរកឱ្យឃើញព័ត៌មានកាន់តែស៊ីជម្រៅ។
ឧទាហរណ៍ ប្រសិនបើលោកអ្នក ចង់ជម្រុះចោលរាល់សម្ភារៈដែលពុំចាំបាច់ឱ្យបានទៀងទាត់ គឺត្រូវដឹងថា ហេតុផលទាំងអស់នេះធ្វើឡើងដើម្បីកាត់បន្ថយស្ត្រេស ឬក៏ភាពតានតឹងពេលនៅផ្ទះ។ ទោះបីជារកចម្លើយឃើញហើយក៏ដោយ គួរបន្តសួរខ្លួនឯងបន្ថែម ដដែលៗ ព្រោះចម្លើយបន្ទាប់អាចនឹងល្អជាងមុន។ អំឡុងពេលនោះដែរ គួរកំណត់អំពីអ្វីទៅជាសកម្មភាពល្អ អ្វីទៅជាសកម្មភាពមិនល្អ រាល់ទម្លាប់ណាដែលមិនផ្តល់នូវការរីកចម្រើន កុំស្ទាក់ស្ទើរក្នុងការកាត់ចោល។ ភាពងាយស្រួលនៃការរកឬសគល់តាមរយៈ ការសរសេរកំណត់ហេតុ ក៏អាចជួយក្នុងការកំណត់គោលដៅ ការតាមដានផែនការសកម្មភាព និងការបន្សាំខ្លួនជាមួយទម្លាប់ដែលងាយស្រួលជាងមុន។
បង្កើតកន្លែងដែលងាយស្រួលក្នុងការទុកដាក់សម្ភារៈ ៖ ការបង្កើតភាពងាយស្រួលក្នុងការទុកដាក់សម្ភារៈ ដូចជាការព្យួរសោ ព្យួរកាបូប ឬបង្កើតកន្លែងដែលងាយស្រួលរកសម្ភារសំខាន់ៗ ក៏ជាចំណែកក្នុងការបណ្តុះទម្លាប់ឱ្យរក្សាបាននូវរបៀបរៀបរយដែលមានភាពយូរអង្វែង។ ការកែឆ្នៃកន្លែងរស់នៅឱ្យមានភាពងាយស្រួល ច្នៃប្រតិដ្ឋ ក៏ជាចំណែកក្នុងការកាត់បន្ថយភាពស្មុគស្មាញ និងបង្កើនសោភ័ណនៃបរិយាកាសនីមួយៗ មិនថាទីតាំងនោះមានទំហំបែបណានោះទេ ក្រៅពីនោះបង្ការកុំឱ្យភ្លេចភ្លាំងសម្ភារណាមួយ។
ការរក្សាភាពទៀងទាត់ ៖ ទម្រាំតែបង្កើតទម្លាប់ឱ្យក្លាយជាសកម្មភាពនីមួយៗបាន គឺជៀសមិនផុតពីការដាក់វិន័យយ៉ាងកំហិតចំពោះខ្លួនឯង ហើយដើម្បីឱ្យវិន័យមួយមានប្រសិទ្ធភាពទៅបាន គឺត្រូវការធ្វើសកម្មភាពដដែលៗ ដោយកុំផ្តោតលើលទ្ធផលពេក ប៉ុន្តែត្រូវផ្តោតលើការអនុវត្តជាប្រចាំ។ ឧទាហរណ៍ ការព្យាយាមទុកសោនៅកន្លែងដដែលឱ្យបានមួយអាទិត្យ មួយខែ ឬក្នុងរយៈពេលសមស្របណាមួយ នៃការចាប់ផ្តើម នេះហើយហៅថា ព្យាយាមរក្សាភាពជាប់លាប់៕
