ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
កំណត់ហេតុដែលសរសេរមក ដោយផ្តោតលើកសម្មភាពវិជ្ជមានប្រចាំថ្ងៃ គឺជាប្រភេទនៃការរៀបរាប់សាច់រឿងជាក់ស្តែង ដូចជាការប្រព្រឹត្តិល្អចំពោះអ្នកដទៃ ការដឹងគុណ ការពេញចិត្តចំពោះអ្វីដែលមាននៅជុំវិញខ្លួន ដែលសកម្មភាពទាំងនេះ បានអភិវឌ្ឍន៍ស្ថានភាពសុខភាពផ្លូវចិត្ត ក៏ដូចជាបង្កើតនូវអារម្មណ៍ល្អចំពោះខ្លួនឯង។
តាមរយៈគេហទំព័រ Helpguide បានប្រាប់ឱ្យដឹងថា ការសរសេរកំណត់ហេតុ ដែលមានបញ្ចូលនូវសកម្មភាពល្អៗ ដែលខ្លួនបានប្រព្រឹត្តិ ជាវិធីមួយជួយឱ្យពេញចិត្តនឹងការប្រើប្រាស់ជីវិតរបស់ខ្លួន កាត់បន្ថយស្ត្រេស កាត់បន្ថយការព្រួយបារម្ភលើសលប់ និងបានសម្រាកពីការគិតដែលមានភាពស្មុគស្មាញ ហើយក៏ជំរុញឱ្យបណ្តុះនូវផ្នត់គំនិតសុទិដ្ឋិនិយម និងបង្កើនកម្លាំងចិត្តក្នុងការបន្តទៅមុខ។
កំណត់ហេតុទៀតសោត មានច្រើនប្រភេទដូចជា ការសរសេរបែបបញ្ចេញអារម្មណ៍ក្នុងចិត្ត, ការសរសេរបែបបង្ហាញនូវសេចក្ដីអំណរ ឬផ្តោតលើភាពវិជ្ជមាន, ការបង្ហាញដោយការគូសរូប គូសគំនូរ ឬក៏សិល្បៈក្នុងការបង្ហាញពីបទពិសោធន៍ណាមួយ និងការសរសេរដើម្បី តាមដានការវិវត្តនៃអារម្មណ៍ និងការសរសេរដែលមានបង្កប់នូវភាពច្នៃប្រតិដ្ឋខ្ពស់។ ដោយឡែកចំពោះអត្ថប្រយោជន៍ជារួម ពីការសរសេររាល់កំណត់ហេតុទាំងនេះវិញ វាល្អបំផុតនៅពេលដែលឆ្លងកាត់ស្ថានការណ៍លំបាកៗ រួមទាំងជាឱកាសក្នុងការឆ្លុះបញ្ចាំង និងការរិះរកដំណោះស្រាយទៀតផង។
កំណត់ហេតុនៃការផ្តោតលើសកម្មភាពវិជ្ជមាន ៖ ការសរសេរ ដែលផ្តោតលើភាពវិជ្ជមាន គួរចាប់ផ្តើមតាមរយៈវិធីសាស្រ្តសាមញ្ញៗ ដូចជា ការរៀបរាប់រាល់អំពើល្អដែលបានប្រព្រឹត្តិទៅកាន់អ្នកដទៃក្នុងរយៈពេលពេញមួយថ្ងៃ ឬក៏អ្វីដែលខ្លួនមានសោមនស្សជាមួយ, អ្វីខ្លះដែលបង្កើតបាននូវស្នាមញញឹមនៅថ្ងៃនេះ? អ្វីខ្លះដែលជំរុញឱ្យការប្រើពេលមួយថ្ងៃកាន់តែមានប្រសិទ្ធភាព? តើជំនាញ ឬក៏សក្តានុពលបែបណាខ្លះដែលពេញចិត្ត និងចង់បាន? ចង់ឃើញរូបភាពបែបណានៅថ្ងៃបន្ទាប់? ការឆ្លើយតបទៅនឹងសំណួរទាំងនេះទៅក្នុងកំណត់ហេតុ គួរមានរៀបរាប់អំពីបុព្វហេតុ និងរបៀបនៃការដំណើរការសកម្មភាពទាំងនោះ។
ប្រសិទ្ធភាព នៃការចាប់ផ្តើមសរសេរ ៖ ការជ្រើសរើសប្រភេទកំណត់ហេតុ នៃការបង្ហាញចេញ គឺជាជម្រើសរបស់បុគ្គលម្នាក់ៗ យ៉ាងណាមិញ ការចាប់ផ្តើមសរសេរឱ្យកាន់តែមានប្រសិទ្ធភាព គួរសរសេរនៅកន្លែងស្ងាត់ល្អ គ្មានការរំខានដូចជា នៅក្នុងបន្ទប់ផ្ទាល់ខ្លួន ឬទីតាំងដែលមិនស្គាល់នរណាម្នាក់ ដើម្បីងាយស្រួលក្នុងការផ្តោត។ បន្ថែមពីនោះ គឺការជ្រើសរើសពេលវេលាដើម្បីសរសេរ កំណត់ហេតុ គួរសរសេរនៅក្នុងចន្លោះពេលដែលមិនសូវប្រញាប់ប្រញាល់ខ្លាំង ដូចជាមុនចូលគេង ក្រោយម៉ោងការងារ ឬនៅពេលដែលអាកាសធាតុចាប់ផ្តើមអំណោយផលល្អជាដើម។ ជាងនេះទៅទៀត ការកំណត់រយៈពេល នៃការសរសេរឱ្យជាក់លាក់ និងធ្វើឱ្យទៀងទាត់ ក៏មានសារៈសំខាន់ដែរ ឧទាហរណ៍ដូចជា ការកំណត់មួយថ្ងៃដប់នាទី ហើយអនុវត្តន៍ឱ្យក្លាយជាទម្លាប់ប្រចាំថ្ងៃ។ អំឡុងពេលសរសេរទៀតសោត កុំទាន់បារម្ភអំពីការប្រើប្រាស់ពាក្យខុស ឬវេយ្យាករណ៍ខុស អ្វីដែលជាតម្រូវការចាំបាច់ គឺការផ្តោតលើដំណើរនៃសកម្មភាពដែលចង់សរសេរតែប៉ុណ្ណោះ៕
