យុវជនខ្មែរ ២រូប គឺកញ្ញា សេង ជិញអឺ និស្សិតឆ្នាំទី១ ផ្នែកភាសាបារាំង នៅវិទ្យាស្ថានភាសាបរទេស នៃសាកលវិទ្យាល័យភូមិន្ទភ្នំពេញ និងលោក ឈាន ចាន់ថង ជាគ្រូបង្រៀនរូបវិទ្យា ថ្នាក់ពីរភាសាបារាំង-ខ្មែរ នៅវិទ្យាល័យព្រះសីហនុ ខេត្តកំពង់ចាម បានជាប់ជ័យលាភីលេខ១ ក្នុងការប្រកួតថ្លែងជាសាធារណៈជាភាសាបារាំង នៅមហោស្រពហ្វ្រង់កូហ្វូនី ប្រទេសបារាំង កាលពីពេលថ្មីៗនេះ។

កញ្ញា សេង ជិញអឺ បានឱ្យដឹងថា ការ​ចូលរួម​របស់នាងនៅ​ក្នុងការប្រកួតថ្លែងជាសាធារណៈជាភាសាបារាំង នៅមហោស្រពហ្វ្រង់កូហ្វូនីនេះ គឺដោយសារនាងចង់ប្រើប្រាស់ភាសាបារាំងជាប្រយោជន៍ ដើម្បីមុខមាត់ប្រទេសកម្ពុជា និងក្រុមគ្រួសារ។ ជិញអឺ បន្តថា ប្រធានបទក្នុងការប្រកួតថ្លែងជាសាធារណៈជាភាសាបារាំងនោះ គឺត្រូវប្រើប្រាស់ភាសាបារាំងដូចម្ដេចដើម្បីធ្វើឱ្យផែនដីមានភាពល្អប្រសើរ ដោយឡែកក្រុមរបស់ខ្លួនមានសមាជិកចំនួន៦នាក់ ដែលមានយុវជនមកពី៣ប្រទេសចូលរួម គឺកម្ពុជា ឡាវ និងវៀតណាម និយាយផ្ដោតលើបញ្ហាប្លាស្ទិកទាំងនៅលើគោក និងក្នុងទឹក។

និស្សិតឆ្នាំទី១ ផ្នែកភាសាបារាំង រូបនេះ បន្ថែមថា ចំពោះដំណោះស្រាយទៅលើប្រធានបទក្រុមរបស់ខ្លួន ផ្ដោតលើការកែច្នៃប្លាស្ទិកទៅជាវត្ថុមានតម្លៃអាចប្រើប្រាស់ឡើងវិញ ការខ្ចប់អាហារដោយប្រើស្លឹកចេក និងការប្រើប្រាស់ផលិតផលដែលមិនប៉ះពាល់ដល់បរិស្ថាន។

កញ្ញា សេង ជិញអឺ លើកឡើងថា រូបនាងពិតជាមានមោទនភាពដែលបានចូលរួមកម្មវិធីនេះ និងសប្បាយរីករាយដែលអាចយកជ័យលាភីលេខ១ មកជូនប្រទេសកម្ពុជា។ លើសពីនេះ ការចូលរួមកម្មវិធីរយៈពេល១សប្ដាហ៍នៅប្រទេសបារាំង បានផ្លាស់ប្ដូរគំនិតនាងឱ្យមើលពិភពលោកធំទូលំទូលាយ មើលឃើញបញ្ហាជាដំណោះស្រាយ ព្រមទាំងងាកមកចាប់អារម្មណ៍លើបរិស្ថាន។ ជាពិសេស បានស្វែងយល់បន្ថែមពីភាសាបារាំង និងសិក្សាពីការតែងនិពន្ធជាភាសាបារាំងរបស់សិល្បៈករ និងកវីផ្សេងៗទៀត។

កញ្ញា សេង ជិញអឺ សង្ឃឹមថា នៅកម្ពុជានឹងមានគម្រោង ឬការប្រកួតទាក់ទងនឹងបរិស្ថាននេះឱ្យបានច្រើនមិនថា ជាភាសាបារាំង ឬភាសាផ្សេងទៀតដើម្បីរកដំណោះស្រាយរួមគ្នា។ លើសពីនេះ កញ្ញា​ក៏​លើកទឹកចិត្តសិស្សប្អូនងាកមកចាប់អារម្មណ៍លើភាសាបារាំងដែលជាភាសាមួយដ៏សំខាន់ផងដែរ។ ដោយឡែកសម្រាប់សិស្សប្អូនដែលកំពុងសិក្សាភាសាបារាំង សូមបន្តខិតខំព្យាយាមចូលរួមគ្រប់សម្មភាពសាលា ឬកិច្ចការសង្គម ដោយមិនគ្រាន់តែមានចំណេះដឹង ប៉ុន្តែមានសកម្មភាពស្វាហាប់ ចង់ដឹង ចង់ឮ និងចង់លើកមុខមាត់ប្រទេសជាតិ។

លោក ឈាន ចាន់ថង យុវជនកម្ពុជាមួយរូបទៀត​ដែលឈ្នះជ័យលាភីក្នុងការប្រកួតថ្លែងជាសាធារណៈជាភាសាបារាំង នៅមហោស្រព​ហ្វ្រង់កូហ្វូនី មានប្រសាសន៍ថា កត្តាដែលជំរុញឱ្យលោកចូលរួមកម្មវិធីនេះ គឺដោយសារចង់សិក្សាស្រាវជ្រាវទាក់ទងនឹងបញ្ហាបរិស្ថាន និងស្វែងរកដំណោះស្រាយផ្សេងៗ ដើម្បីជួយពិភពលោកដែលកំពុងជួបប្រទះ។ លោកគិតថា បញ្ហាបរិស្ថានជារឿងសំខាន់ ហើយបច្ចុប្បន្នពិភពលោកកំពុងជួបប្រទះបញ្ហាអាកាសធាតុ ដែលត្រូវការមនុស្សគ្រប់គ្នាចូលរួមទប់ស្កាត់ និងស្វែងរកដំណោះស្រាយ។

លោក ឈាន ចាន់ថង បន្ថែមថា លោកពេញចិត្តសម្រាប់ជ័យលាភីលេខ១ ដែលក្រុមទទួលបាន គឺសាកសមជាមួយការខិតខំប្រឹងប្រែងរបស់ក្រុមក្នុងការត្រៀមទុកជាមុន ទាំងហ្វឹកហាត់និយាយភាសាបាំង និងពិភាក្សាគ្នាតាមប្រព័ន្ធអនឡាញ។ លោកបន្តថា ការប្រកួតថ្លែងជាសាធារណៈជាភាសាបារាំងនេះ មានរយៈពេលត្រឹមតែ៣នាទីប៉ុណ្ណោះ ដែលក្រុមនីមួយៗត្រូវលើកមកនិយាយអំពីបញ្ហាទាក់ទងនឹងបរិស្ថាន និងដំណោះស្រាយ។ ដូច្នេះ តម្រូវឱ្យសមាជិកក្រុមត្រូវចែកចំណុចគ្នានិយាយដោយទំនួលខុសត្រូវរៀងខ្លួន និងគោរពពេលវេលាប្រកួត។

គ្រូបង្រៀនរូបវិទ្យា ថ្នាក់ពីរភាសាបារាំង-ខ្មែរ រូបនេះ បន្ថែមថា ការចូលរួមកម្មវិធីនេះ បានជួយឱ្យរូបគាត់ សមាជិកក្រុម និងយុវជនដែលចូលរួមដទៃទៀត ទទួលបានចំណេះដឹងថ្មីៗទាក់ទងនឹងការការពារបរិស្ថាន និងមានឱកាសផ្លាស់ប្ដូរវប្បធម៌គ្នារវាងយុវជនមកពី ១៥ប្រទេសផ្សេងទៀត និងមានឱកាសចែករំលែកចំណេះដឹងអំពីដំណោះស្រាយបរិស្ថានទៅវិញទៅមក។ លោកបន្តថា ពេលខ្លះនៅកម្ពុជាមិនទាន់ជួបបញ្ហាគ្រោះរញ្ជួយដី ដូច្នេះយើងក៏អាចសិក្សាស្វែងយល់ពីប្រទេសដែលជួបបញ្ហានេះ ព្រមទាំងដឹងពីវិធានការទប់ស្កាត់ និងដំណោះស្រាយ។

លោក ឈាន ចាន់ថង បានលើកទឹកចិត្តដល់ប្រជាពលរដ្ឋ និងយុវជនទាំងអស់គ្នាសុទ្ធតែមានតួនាទីក្នុងការចូលរួមការពារបរិស្ថានបានតាមរយៈសកម្មភាពតូចៗដូចជា ការកាត់បន្ថយការប្រែប្រួលអាកាសធាតុ ដែលជាវិធីងាយៗសម្រាប់ការរស់នៅប្រចាំថ្ងៃ រួមមាន ការកាត់បន្ថយការប្រើប្រាស់ប្លាស្ទិកដោយជំនួសមកប្រើដបទឹកបរិស្ថាន ការប្រើថង់ក្រណាត់ជំនួសថង់ប្លាស្ទិក ការកុំចោលសំរាមផ្ដេសផ្ដាស ការញែកសំរាមតាមប្រភេទឱ្យបានត្រឹមត្រូវ ការដាំដើមឈើ ការប្រើប្រាស់មធ្យោបាយធ្វើដំណើររួម។

សូមជំរាបជូនថា មហោស្រពហ្វ្រង់កូហ្វូនី (Francophonie 2024) ជាព្រឹត្តិការណ៍វប្បធម៌ដ៏ធំមួយ ដែលរៀបចំឡើងនៅទីក្រុងប៉ារីស៍ ស្របទៅនឹងព្រឹត្តិការណ៍កិច្ចប្រជុំកំពូល Francophonie ដែលបានប្រព្រឹត្តទៅកាលពីថ្ងៃទី៤ និង៥ តុលា ២០២៤។ មហោស្រពឆ្នាំនេះផ្តោត​លើ​ប្រធានបទ “បង្កើត ស្ថាបនា និងធ្វើអាជីវកម្មជាភាសាបារាំង”។ នៅឆ្នាំ២០២៦ ខាងមុខ ប្រទេសកម្ពុជានឹងធ្វើជាម្ចាស់ផ្ទះ នៃកិច្ចប្រជុំហ្វ្រង់កូហ្វូនី លើកទី២០ ដោយគ្រោងនឹងរៀបចំ​ឡើងនៅខេត្តសៀមរាប៕