ស្ថិតក្នុងឱកាសទិវារត់ប្រណាំងអន្តរជាតិពាក់កណ្តាលម៉ារ៉ាតុងអង្គរវត្ត លើកទី២៩ ឆ្នាំ២០២៤ សម្ដេចធិបតី ហ៊ុន ម៉ាណែត នាយករដ្ឋមន្រ្តី នៃប្រទេសកម្ពុជា បង្ហញសេចក្ដីដឹងគុណទៅកាន់អត្តពលលិកទាំងអស់ ដែលបានរួមចំណែកធ្វើឱ្យ យុទ្ធនាការរត់ប្រណាំង រត់ដើម្បីការអប់រំ រត់ដើម្បីសុខភាពសាធារណៈ និងគាំទ្រដល់សកម្មភាពមនុស្សធម៌ ជាពិសេស ការចូលរួមដល់ជនរង់គ្រោះដោយសារគ្រាប់មីន។

សម្តេចធិបតី​បញ្ជាក់ថា ព្រឹត្តិការណ៍នេះ​ មិនត្រឹមតែបានចូលរួមចំណែកដល់សកម្មភាពមនុស្សធម៌ នៅមន្ទីរពេទ្យកុមារអង្គរ និងជួយជនរងគ្រោះដោយសារគ្រាប់មីនប៉ុណ្ណោះទេ ប៉ុន្តែ​ក៏បានបង្ហាញពីស្ថានភាពជាក់ស្ដែងរបស់កម្ពុជា ដែលជាប្រទេសមួយមានសុខសន្ដិភាព ស្ថិរភាព​ សុវត្ថិ​ភាព​ពេញបរិបូរណ៍។

“កីឡារស់ក្នុងសន្តិភាព គឺជាពាក្យស្លោក ដ៏សាកសមបំផុតសម្រាប់កម្ពុជា ក៏ដូចជាសម្រាប់ពិភពលោក នាពេលកន្លងមក និងពេលបច្ចុប្បន្ន”

សម្ដេចធិបតី ហ៊ុន ម៉ាណែត នាយករដ្ឋមន្រ្តី នៃប្រទេសកម្ពុជា

ឯកឧត្តម វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការគណៈកម្មាធិការជាតិអូឡាំពិកម្ពុជា មានប្រសាសន៍ថា ប្រសាទអង្គវត្តមានទេសភាពបៃតងស្រស់ ជំរុញឱ្យភ្ញៀវជាតិ និងអន្តរជាតិ ដែលចូលរួមដំបូង តែងតែមានអារម្មណ៍ថា ស្រស់ស្រាយ និងទទួលបានបទពិសោធន៍មួយក្នុងជីវិតរបស់គាត់ ការរត់ដោយសុវត្ថិភាព ។ ហើយអ្វីដែលយើងបានទទួលលើសពីនេះទៅទៀត មារ៉ាតុង មិនមែនត្រឹមតែការរត់ប្រណាំងនោះទេ គឺមានទាំងការជួបជុំគ្នា ក្រុមគ្រួសារដើរចេញក្រៅ និងការបង្កើនភ្ញៀវទេសចរណ៍ តាមរយៈការមកលេងនៅសៀមរាប ។

ឯកឧត្តមបញ្ជាក់ថា តាមរយៈកម្មវិធី ដែលបានធ្វើកន្លងទៅ គឺជាការពង្រឹងជំនាញផ្នែកកីឡា និងសុខភាពសាធារណៈ ព្រោះនៅក្នុង១០គីឡូនៃការរត់មានប្រជាជនខ្មែរភាគច្រើន ហើយ២១គីឡូ ភាគច្រើនជនបរទេស ដូច្នេះមានន័យថា ប្រជាជនខ្មែរមានសកត្តានុពល នៃសុខភាពល្អ កំពុងតែមានថាមពលល្អ ជាសេចក្ដីសង្ឃឹមនៃផលិតភាពសេដ្ឋកិច្ច របស់យើងផងដែរ។

គួរជម្រាបជូនថា កីឡាការរត់ប្រណាំងម៉ារ៉ាតុង ជាកីឡាមួយប្រភេទដែលមានប្រវត្តដ៏ចំណាស់មួយ ដែលកើតមានតាំងពីឆ្នាំ៤៩០ ក្រោយមកនៅឆ្នាំ១៨៩៦ កីឡាប្រភេទនេះត្រូវបានយកមកបង្ហាញជាលើកដំបូងក្នុងកីឡាអូឡាំពិក។ ដោយឡែកសម្រាប់ព្រឹត្តិការណ៍រត់ប្រណាំងអន្តរជាតិពាក់កណ្ដាលម៉ារ៉ាតុង អង្គរវត្ត លើកទី២៩ ឆ្នាំ២០២៤ ដែលបានបញ្ចប់កាលពីពេលថ្មីៗនេះ មានការចូលរួមពីអត្ដពលិកជាតិ និងអន្ដរជាតិ រហូតដល់ជិត១ម៉ឺន៤ពាន់នាក់ មកពី៨៧ ប្រទេស ដែលបានធ្វើឱ្យកម្ពុជាបំបែកកំណត់ត្រាថ្មីមួយទៀតក្នុងឆ្នាំ២០២៤ គឺមានអ្នកចូលរួមរត់ច្រើនជាងគេ៕