វិទ្យាស្ថានពហុបច្ចេកទេស​ខេត្តកំពង់ធំ (PIKT) ប្រកាស​ជ្រើសរើសសិស្ស-និស្សិតថ្នាក់អាហារូបករណ៍ សិក្សា​ជំនាញវិជ្ជាជីវៈ ចាប់ពីកម្រិតសញ្ញាបត្របច្ចេកទេស រហូត​ដល់កម្រិតសញ្ញាបត្រជាន់ខ្ពស់បច្ចេកទេស សរុបចំនួន៣២០នាក់។

ក្នុងនោះ​កម្រិតសញ្ញាបត្រជាន់ខ្ពស់បច្ចេកទេស ដែលសិក្សា​រយៈពេល​២ឆ្នាំ មានចំនួន ២៤០នាក់ ដែលមានឯកទេស ព័ត៌មានវិទ្យា, ផលិតកម្ម និងបសុព្យាបាល, ក្សេត្រសាស្រ្ត, សំណង់ស៊ីវិល, យន្តសាស្រ្តរថយន្ត, អគ្គិសនី, គណនេយ្យ និង​ហិរញ្ញវត្ថុ, និង អក្សរសាស្រ្តអង់គ្លេស។

សម្រាប់កម្រិតសញ្ញាបត្របច្ចេកទេស និង​វិជ្ជាជីវ់ៈ ១,២,៣ ដែលត្រូវសិក្សា​រយៈពេល​១ឆ្នាំ មានចំនួន៨០នាក់ ដែលមានឯកទេស សេវាកម្មកុំព្យូទ័រ, ថែទាំ និងជួសជុលរថយន្ត, ជាងកំបោរ និង​ការ​តម្លើង​បណ្តាញ​អគ្គិសនី​ក្នុងអគារ។

លក្ខខណ្ឌជ្រើសរើស សម្រាប់កម្រិតសញ្ញាបត្រជាន់ខ្ពស់បច្ចេកទេស ដែលត្រូវសិក្សា​រយៈពេល២ឆ្នាំ បេក្ខជនត្រូវបញ្ចប់ថ្នាក់ទី១២ (ជាប់សញ្ញាបត្រមធ្យមសិក្សា​ទុតិយភូមិ ឬប្រឡងធ្លាក់) សញ្ញាបត្របច្ចេកទេស និង​វិជ្ជាជីវៈ៣ ឬ​សញ្ញាបត្រមានតម្លៃស្មើ។ ដោយឡែកសម្រាប់កម្រិតសញ្ញាបត្របច្ចេកទេស និង​វិជ្ជាជីវៈ ដែលត្រូវសិក្សា​រយៈពេល១ឆ្នាំ សម្រាប់កម្រិត១ បេក្ខជនត្រូវមានសញ្ញាបត្រមធ្យមសិក្សា​បឋមភូមិ ឬលិខិតបញ្ជាក់ការសិក្សាថា បានរៀនចប់ថ្នាក់ទី៩ នៅសាលាចំណេះទូទៅ ឬវិញ្ញាបនបត្រកម្មវិធីស្ពានចម្លងបន្តជំនាញ ឬបញ្ចប់ថ្នាក់ប៊ីប (BEEP) ឬសញ្ញាបត្រមានតម្លៃស្មើ។ សម្រាប់កម្រិត ២ បេក្ខជន​ត្រូវ​មានសញ្ញាបត្របច្ចេកទេស និង​វិជ្ជាជីវៈ១ និង សម្រាប់កម្រិត៣ បេក្ខជនត្រូវមានសញ្ញាបត្របច្ចេកទេស និង​វិជ្ជាជីវៈ២។

កាលបរិច្ឆេទទទួលពាក្យ គឺចាប់ពីថ្ងៃផ្សាយដំណឹងនេះតទៅ ហើយ​កាលបរិច្ឆេទចូលរៀន លើកទី១ ថ្ងៃទី១៥ ខែមករា ឆ្នាំ​២០២៤ និង​លើកទី ថ្ងៃទី០១ ខែកុម្ភៈ ឆ្នាំ​២០២៤។

កន្លែងទទួលពាក្យ ៖ ការិយាល័យទំនាក់ទំនងទីផ្សារ​ស្រាវជ្រាវ និង​អភិវឌ្ឍ នៃវិទ្យាស្ថានពហុបច្ចេកទេស​ខេត្តកំពង់ធំ។ ចំពោះព័ត៌មានលម្អិត សូមទាក់ទង​ទៅកាន់វិទ្យាស្ថានពហុបច្ចេកទេសខេត្តកំពង់ធំ ដែលមានទីតាំង​ភូមិ​អាចារ្យ​លាក់ សង្កាត់អាចារ្យលាក់ ក្រុងស្ទឹងសែន ខេត្តកំពង់ធំ នៅទល់មុខ​វិទ្យាល័យ​កំពង់ធំ ក្រោយ​បុរីកុមារកំព្រាខេត្តកំពង់ធំ រាល់ម៉ោងធ្វើការ ឬចូលទៅកាន់គេហទំព័រហ្វេសប៊ុក facebook.com/mypikt/​ ៕