ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ខណៈកងទ័ពកម្ពុជា និងថៃ កំពុងប៉ះទង្គិចគ្នាដោយអាវុធ នៅតាមបណ្តោយព្រំដែនកម្ពុជា-ថៃ អង្គការអន្តរជាតិចំនួន២ ដែលធ្វើការងារលើការគាំពារកុមារ គឺអង្គការយូនីសេហ្វ និងអង្គការទស្សនៈពិភពលោក បានធ្វើការអំពាវនាវឱ្យមានសន្តិភាព និងជួយការពារកុមារ។
អង្គការទស្សនៈពិភពលោក នៅថ្ងៃនេះ បានឱ្យដឹងថា ក្រុមការងាររបស់ខ្លួនបានកំពុងស្ថិតនៅជំរំសុវត្ថិភាព ដើម្បីរៀបចំកន្លែងកុមារមេត្រីសម្រាប់កុមារ ដែលអាចឱ្យពួកគេលេងកម្សាន្ត រៀន និងមានអារម្មណ៍សុវត្ថិភាពក្នុងគ្រាមានវិបត្តិ។ ជាការកត់សម្គាល់របស់អង្គការទស្សនៈពិភពលោក មនុស្សរាប់ពាន់គ្រួសារបានផ្លាស់ទី ហើយកុមារត្រូវការជំនួយជាបន្ទាន់ដើម្បីទទួលបានការការពារ និងក្តីសង្ឃឹម។
ដោយឡែកអង្គការយូនីសេហ្វ នៅព្រឹកមិញនេះ ក៏បានបញ្ជាក់ដែរថា ខ្លួនបានទៅដល់ទីតាំងភៀសសឹក ២កន្លែង និងបានចាប់ផ្តើមដឹកជញ្ជូននូវសម្ភារៈជំនួយចាំបាច់រួមមាន សម្ភារៈគាំទ្រផ្នែកទឹកស្អាត អនាម័យ និងសម្ភារៈគាំទ្រផ្នែកអប់រំ និងកម្សាន្តសម្រាប់កុមារ។ សម្ភារៈទាំងនេះត្រូវបានផ្តល់ជូនដល់កុមារ និងក្រុមគ្រួសារ ដែលបានបង្ខំចិត្តជម្លៀសខ្លួន បន្ទាប់ពីជម្លោះព្រំដែនកាលពីពេលថ្មីៗនេះ។ ជាមួយគ្នានេះ យូនីសេហ្វ ក៏បានអំពាវនាវយ៉ាងទទូចឱ្យមានសន្តិភាព និងការការពារសម្រាប់កុមារគ្រប់រូប ដោយថា ក្នុងគ្រប់ស្ថានភាពជម្លោះទាំងអស់ កុមារតែងតែជាអ្នកទទួលបន្ទុកធ្ងន់បំផុត។
យោងតាមរបាយការណ៍របស់ក្រសួងការពារជាតិ គិតត្រឹមល្ងាចថ្ងៃទី១០ ខែធ្នូ ឆ្នាំ២០២៥ ពលរដ្ឋប្រមាណ១៩ម៉ឺននាក់ រាប់បញ្ចូលទាំងកុមារផង បាននិងកំពុងភៀសសឹក ពីខេត្តឧត្តរមានជ័យ ព្រះវិហារ និងបន្ទាយមានជ័យ។
ដោយឡែកយោងតាមរបាយការណ៍របស់ក្រសួងអប់រំ យុវជន និងកីឡា គិតត្រឹមព្រឹកថ្ងៃទី១១ ខែធ្នូ ឆ្នាំ២០២៥ សាលានៅខេត្តចំនួន៦ ក្នុងក្រុង-ស្រុកចំនួន២០ បានបិទទ្វារសរុប ៩០៩សាលា ដែលកំពុងប៉ះពាល់ដល់សិស្សចំនួន ២១៦១០៧នាក់៕
