ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
រាជធានីភ្នំពេញ — ក្នុងពិធីប្រកាសឱ្យអនុវត្តជាផ្លូវការផែនការជាតិប្រយុទ្ធជំងឺមហារីក ឆ្នាំ២០២៥-២០៣០ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានក្រើនរំលឹកដល់បងប្អូនប្រជាពលរដ្ឋទាំងអស់ សូមយកចិត្តទុកដាក់បង្ការជំងឺ ដោយកុំដល់ពេលឈឺ ទើបស្វែងរកការព្យាបាល និងជំរុញប្រជាពលរដ្ឋលេងកីឡា ហាត់ប្រាណ ដើម្បីលើកកម្ពស់សុខុមាលភាព។
សម្តេចធិបតីមានប្រសាសន៍ដោយលើកឡើងថា មានមូលហេតុមួយចំនួន ដែលបណ្តាលឱ្យកើតមានជំងឺមហារីក ទី១ អាហារូបត្ថម្ភ បន្លែ សាច់ ឬអាហារផ្សេងៗ, ទី២ អស់សុពលភាព ខូចកម្រិត ឬក៏គីមីច្រើន ហើយទី៣ ពាក់ព័ន្ធនឹងរឿងកីឡា។ តែយ៉ាងណាដើម្បីចូលរួមបង្ការ សម្តេចបានស្នើដល់ក្រសួងពាក់ព័ន្ធ ដូចជាក្រសួងពាណិជ្ជកម្ម ក្រសួងសុខាភិបាល ក្រសួងកសិកម្ម អគ្គនាយកដ្ឋានគយ និងរដ្ឋាករ ពិនិត្យឱ្យបានតឹងរឹងពាក់ព័ន្ធនឹងការនាំចូលបន្លែសាច់ ការប្រើប្រាស់ជាតិគីមីផ្សេងៗឱ្យបានហ្មត់ចត់ ហើយក្រសួងអប់រំ ត្រូវអប់រំនៅតាមសាលា ដើម្បីឱ្យដឹងពីវិធីបង្ការ និងជៀសវាងក្នុងការបរិភោគ ឬធ្វើសកម្មភាពណាមួយដែលនាំឱ្យកើតជំងឺមហារីក។
ជាមួយគ្នានេះ សម្តេចមហាបវរធិបតី ហ៊ុន ម៉ាណែត បានជំរុញប្រជាពលរដ្ឋលេងកីឡា ហាត់ប្រាណ ដើម្បីលើកកម្ពស់សុខុមាលភាព និងបានណែនាំអាជ្ញាធរយកចិត្តទុកដាក់បង្កើតសួនសាធារណៈឱ្យពលរដ្ឋហាត់ប្រាណឱ្យបានកាន់តែច្រើន ដើម្បីសម្រួលដល់ការហាត់ប្រាណរបស់ប្រជាពលរដ្ឋ។
“ប្រជាពលរដ្ឋដែលមានសុខភាពល្អគឺទ្រព្យរបស់គ្រួសារ និងរដ្ឋ ខណៈប្រជាពលរដ្ឋដែលមានបញ្ហាសុខភាព គឺជាបន្ទុកសម្រាប់គ្រួសារ និងរដ្ឋដូចគ្នា ដូច្នេះការយកចិត្តទុកដាក់ថែរក្សាសុខភាពរបស់ប្រជាពលរដ្ឋ ដើម្បីបង្ការជាមុន កុំឱ្យមានជំងឺគឺជាភាពចាំបាច់ដែលត្រូវមានការសហការណ៍ពីរដ្ឋ និងប្រជាពលរដ្ឋដូចគ្នា”
សម្តេចមហាបវរធិបតី ហ៊ុន ម៉ាណែត ក៏បានក្រើនរំលឹកប្រជាពលរដ្ឋយកចិត្តទុកដាក់បង្ការជំងឺ ដោយកុំចាំដល់ឈឺបានស្វែងរកការព្យាបាលផងដែរ។
បើតាមរបាយការណ៍របស់ ឯកឧត្តម ឈាង រ៉ា រដ្ឋមន្ត្រីក្រសួងសុខាភិបាល ជារៀងរាល់ឆ្នាំ ប្រទេសកម្ពុជា មានអ្នកកើតជំងឺមហារីកថ្មីប្រមាណ ២ម៉ឺនករណី ហើយជារៀងរាល់ឆ្នាំ ប្រជាពលរដ្ឋប្រមាណ ១ម៉ឺន៤ពាន់នាក់ ក៏បានបាត់បង់ជីវិតដោយសារជំងឺនេះដែរ ដែលតួលេខនេះ ត្រូវឆ្លុះបញ្ចាំងអំពីសារៈសំខាន់ និងភាពបន្ទាន់នៃការដែលត្រូវចាត់វិធានការទប់ស្កាត់៕
