កុមារគ្រប់រូបតែងមានអាកប្បកិរិយាខុសៗគ្នា ។ កុមារដែលមានឥរិយាបថខ្លាំង ឬខ្សត់ទំនាក់ទំនងនៅក្នុងគ្រួសារនឹងជះឥទ្ធិពលដល់ទំនាក់ទំនងនៅក្នុងដំណើរជីវិត ។ កុមារខ្សត់ទំនាក់ទំនងអាចកើតឡើងដោយសារកត្តាជីវសាស្ត្ររបស់កុមារ និងកត្តាគ្រួសារជាអ្នកផ្តល់ទៅកាន់ពួកគេ ។ ការសិក្សាពីចិត្តសាស្ត្រកុមាររបស់មូលនិធិក The Nemours Foundation បានបង្ហាញថា ម្តាយឪពុកជាតួអង្គសំខាន់ដែលអាចជួយឱ្យកុមារមានអាការៈខ្សោយទំនាក់ទំនង ក្លាយជាមនុស្សមានទំនាក់ទំនងល្អប្រសើរឡើងវិញ ។

១. ឪពុកម្តាយធ្វើជាគំរូល្អ ៖ វាមិនមែនជារឿងលំបាកនោះទេនៅពេលដែលម្តាយឪពុកបង្កើតទម្លាប់ធ្វើជាគំរូល្អសម្រាប់កូន ។ កុមារអាចនឹងរៀន ឬធ្វើត្រាប់តាមសកម្មភាពនៅពេលដែលពួកគេឃើញម្តាយឪពុកនិយាយគ្នា ធ្វើម្ហូបអាហារ លាងចាន រៀបចំបន្ទប់ និងចាត់ចែងសកម្មភាពការងារផ្សេងៗ ។ សកម្មភាពទាំងនេះ តម្រូវឱ្យមានវត្តមានកុមារចូលរួមដោយរីករាយ ។ ទន្ទឹមគ្នានេះ ម្តាយឪពុកត្រូវបញ្ជៀតពាក្យពេចន៍ពន្យល់ ព្រមទាំងឆ្លើយតបដោយទន់ភ្លន់ទៅកាន់កូន ។ គំរូភាពការងារនឹងជួយឱ្យកូនមានចំណង់ចំណូលចិត្តលើទំនាក់ទំនងកាន់តែខ្លាំង ។

២. ចៀសវាងរិះគន់​ធ្ងន់ៗ ៖ ពាក្យពេចន៍គំរោះគំរើយ ពាក្យបន្តុះបង្អាប់ និងពាក្យប្រៀធៀបដែលចេញពីមាត់ម្តាយឪពុក ជាពាក្យសម្តីដែលកុមារមិនចូលចិត្តឡើយ ។ កុមារអាចបាត់បង់ទំនាក់ទំនងនៅក្នុងគ្រួសារ នៅពេលដែលរូបគេលឺពាក្យពេចន៍ទាំងនេះញឹកញាប់រហូតក្លាយជាទម្លាប់ ។ ម្តាយឪពុកគួរផ្លាស់ប្តូរពីពាក្យសម្តីរិះគន់ធ្ងន់ៗទៅលើកូន ដោយប្រើប្រាស់រូបភាពលួងលោម ឬពន្យល់ហេតុផលត្រឹមត្រូវដោយវិជ្ជមានវិញ នោះប្រសិទ្ធភាពនៃទំនាក់ទំនងនឹងកើតឡើងកាន់តែប្រសើរ ។

៣. លើកទឹកចិត្តលើភាពខ្លាំងរបស់កូន ៖ សក្តានុពលរបស់កូន និងទេពកោសល្យរបស់កូន គ្មាននរណាស្គាល់ច្បាស់ជាងម្តាយឪពុកឡើយ ។ នៅពេលដែលដឹងថា កូនជាមនុស្សមានអត្តចរឹកទន់ភ្លន់ រឹងរុស ឬទន់ខ្សោយ ឬកូនមានចំណង់ចំណូលចិត្តធ្វើអ្វីមួយ វិធីដែលអាចជួយកូនដោយលឿនបំផុត គឺម្តាយឪពុកត្រូវអន្តរាគមន៍ផ្នែកអាកប្បកិរិយាកូន ។ ការអន្តរាគមន៍អាកប្បកិរិយាកូន ទាមទារឱ្យម្តាយឪពុកត្រូវបង្កើនសកម្មភាពទំនាក់ទំនងឱ្យបានច្រើនតាមអាចធ្វើទៅបាន ស្របទៅតាមចរឹកលក្ខណៈ និងភាពខ្លាំងរបស់កូន  ។ 

៤. បង្រៀនឱ្យកូនមានទំនួលខុសត្រូវ ៖ កុមារខ្សត់ទំនាក់ទំនងអាចមកពីរូបគេមិនមានសមត្ថភាពទទួលខុសត្រូវអ្វីមួយដោយខ្លួនឯង ។ កុមារដែលគ្មានទំនួលខុសលើកិច្ចការអ្វីមួយ ពួកនឹងមិនអាចក្លាយជាមនុស្សរវាសរវៃ ឬមានទំនាក់ទំនងជាមួយអ្នកដទៃឡើយ ។ ទម្លាប់ដាក់បន្ទុកបន្តិចម្តងៗដល់កូន នោះពួកគេនឹងស្វែងរកដំណោះស្រាយ បង្កើតចម្ងល់ ព្រមទាំងបង្កើតសំណួរមកកាន់ម្តាយឪពុកវិញ ។ នេះជាវិធីសាស្ត្របង្កើនទំនុកចិត្តដល់កូន និងជួយឱ្យកូនមានទំនាក់ទំនងឆាប់រហ័សនៅក្នុងគ្រួសារ ។

គួរបញ្ជាក់ថា វិបត្តិទំនាក់ទំនក់របស់កុមារនៅក្នុងគ្រួសារអាចនឹងរុញច្រានឱ្យកុមារក្លាយជាមនុស្សឯកាមិនចូលក្នុងចំណោមមិត្តភក្តិ កើតវិបត្តិផ្លូវចិត្ត និងអាចក្លាយជាមនុស្សដែលខ្សត់មនោសញ្ចេតនាជាមួយមនុស្សជុំវិញខ្លួន ។ ទំនាក់ទំនងរបស់កូននិងម្តាយឪពុកអាចបង្កើតឡើងបានតាំងពីទារកចាប់កំណើតនៅក្នុងផ្ទៃម្តាយ ហើយទម្លាប់លេងសើចជាមួយកូនជាប្រចាំ ជាគន្លឹះជោគជ័យមួយលើការបង្កើនទំនាក់ទំនងដែលម្តាយឪពុក និងកូនត្រូវធ្វើរួមគ្នា ៕