ក្រសួងអប់រំ យុវជន និងកីឡា កាលពីពេលថ្មីៗនេះ បានចេញសេចក្ដីណែនាំ កាលពីពេលកន្លងទៅថ្មីនេះ បានចេញសេចក្តីណែនាំទៅដល់គ្រប់គ្រឹះស្ថានសិក្សាសាធារណៈទាំងអស់ពង្រឹងវិន័យ និងបង្កើនប្រសិទ្ធភាព នៃការប្រើប្រាស់ឧបករណ៍អេឡិចត្រូនិចក្នុងបរិវេណគ្រឹះស្ថានសិក្សាសាធារណៈ។
សេចក្តីណែនាំដែលចុះហត្ថលេខាដោយ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា បានបញ្ជាក់ថា ក្នុងបរិបទ នៃការអប់រំឌីជីថល ឧបករណ៍អេឡិចត្រូនិច ប្រព័ន្ធអ៊ីនធឺណេត និងមាតិកាឌីជីថលមានសាសរៈសំខាន់ណាស់សម្រាប់បម្រើដល់ការបង្រៀន ការរៀន និងការស្រាវជ្រាវ តែក្នុងគោលដៅពង្រឹងវិន័យ និងបង្កើនប្រសិទ្ធភាព នៃការប្រើប្រាស់ឧបករណ៍អេឡិចត្រូនិចក្នុងបរិវេណគ្រឹះស្ថានសិក្សាសាធារណៈ ក្រសួងអប់រំ យុវជន និងកីឡា សូមណែនាំដល់គណៈគ្រប់គ្រងគ្រឹះស្ថានសិក្សាសាធារណៈ លោកគ្រូអ្នកគ្រូ និងសិក្សានុសិស្សទាំងអស់ ហាមឃាត់ការប្រើប្រាស់ទូរស័ព្ទដៃ ឬឧបករណ៍អេឡិចត្រូនិកក្នុងថ្នាក់រៀន ឬម៉ោងសិក្សា ដែលមិនបម្រើឱ្យសកម្មភាពសិក្សា ដោយគ្មានការអនុញ្ញាតពីគ្រូកំពុងបង្រៀន ជាពិសេសការលេងហ្គេម និងបណ្តាញទំនាក់ទំនងសង្គមដែលមិនពាក់ព័ន្ធនឹងសកម្មភាពសិក្សា។
លោកជំទាវបណ្ឌិត ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា សេចក្តីណែនាំរបស់ក្រសួងអប់រំនេះ គឺមានទិសដៅចង់ឱ្យសិស្សប្រើទូរស័ព្ទដៃ ឬឧបករណ៍អេឡិចត្រូនិចស្របទៅតាមទិសដៅនៃការរៀន និងបង្រៀន។ បើតាមលោកជំទាវ ឃួន វិច្ឆិកា បច្ចុប្បន្ននៅក្នុងការរៀន និងបង្រៀន លោកគ្រូ អ្នកគ្រូ អាចមានកម្មវិធីសិស្សមជ្ឈមណ្ឌលឱ្យសិស្សហ្វឹកហាត់ក្នុងការស្រាវជ្រាវ ការរកឯកសារ និងអានឯកសារផ្សេងៗក្រៅពីឯកសារដែលគ្រូមាន ដូច្នេះការប្រើទូរស័ព្ទនៅក្នុងទិសដៅរៀន និងបង្រៀន ឬស្រាវជ្រាវអំឡុងពេលរៀន គឺមិនមានបញ្ហាទេ ប៉ុន្តែលើកលែងតែសិស្សានុសិស្សគាត់ប្រើនៅក្នុងន័យផ្សេង។ ឧទាហរណ៍ លេងហ្គេម ឬធ្វើអ្វីមួយដែលខុសពីការណែនាំដោយមិនមានការអនុញ្ញាតិពីលោកគ្រូ អ្នកគ្រូ ក្នុងន័យនេះមិនត្រូវបានអនុញ្ញាតិនោះឡើយ។
អ្នកនាំពាក្យក្រសួងអប់រំ បន្ថែមថា នៅក្នុងការណែនាំរបស់ក្រសួងអប់រំ មានគោលដៅពីរ គឺទី១.ដើម្បីពង្រឹងវិន័យក្នុងការរៀន និងបង្រៀន និងក្នុងគោលដៅលើកកម្ពស់គុណភាពនៅក្នុងការរៀន ចៀសវាងគ្រូកំពុងបង្រៀន សិស្សប្រើប្រាស់ទូរស័ព្ទ ឬឧបករណ៍អេឡិចត្រូនិចផ្សេងៗដែលមិនពាក់ព័ន្ធជាមួយការរៀន មានន័យថា សិស្សមិនផ្ដោតអារម្មណ៍លើការពន្យល់របស់គ្រូ។ ទិសដៅទី២ គឺក្រសួងអប់រំ មិនបានហាមឃាត់នៅក្នុងការប្រើប្រាស់ទូរស័ព្ទដៃ ឬឧបករណ៍អេឡិចត្រូនិចដែលបម្រើឱ្យការរៀននោះទេ ដូចដែលបានដឹង ក្រសួងអប់រំ កំពុងជំរុញវិធីសាស្រ្តបង្រៀនថ្មី ដើម្បីឱ្យសិស្សហ្វឹកហាត់ទាំងចំណេះដឹងផង ទាំងបំណិនផង។ នេះមានន័យថា វិធីសាស្រ្តបង្រៀនមួយចំនួនគ្រូនឹងប្រើសម្ភារៈបង្រៀនផ្សេងៗដែលពាក់ព័ន្ធនឹងឧបករណ៍អេឡិចត្រូនិច ដូច្នេះគ្រូបង្រៀនអាចអនុញ្ញាតិឱ្យសិស្សប្រើប្រាស់ទូរស័ព្ទ ឬឧបករណ៍អេឡិចត្រូនិចទាំងនោះបាន។
“យើងសង្ឃឹមថាសិស្សានុសិស្សនឹងអាចក្លាយទៅជាពលរដ្ឋពេញលេញដែលមានទាំងចំណេះដឹង មានបំណិនក្នុងការស្រាវជ្រាវ ក៏ដូចជាការបង្កើតថ្មីជាដើម”
លោកជំទាវបណ្ឌិត ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា
លោកជំទាវបណ្ឌិត ឃួន វិច្ឆិកា មានប្រសាសន៍ថា ចំពោះឧបករណ៍អេឡិចត្រូវនិចនេះ ប្រសិនជាយើងប្រើប្រាស់ឱ្យបានត្រឹមត្រូវទៅតាមទិសដៅជាប្រយោជន៍ក្នុងការរៀន និងបង្រៀន ឬក្នុងការស្វែងយល់អ្វីមួយថ្មី លោកជំទាវជឿថា ឧបករណ៍អេឡិចត្រូនិចមានសារៈសំខាន់ណាស់ក្នុងការធ្វើឱ្យសិស្សានុសិស្សមានការរៀនសូត្របានទូលំទូលាយជាងមុន។ លោកជំទាវបណ្ឌិត បន្តថា មិនដូចជំនាន់គ្មានឧបករណ៍អេឡិចត្រូនិច ឬអ៊ីធឺណិតដែលយើងពឹងតែទៅលើសៀវភៅតែម៉្យាង ប៉ុន្តែនៅពេលមានឧបករណ៍អេឡិចត្រូនិចសិស្សអាចធ្វើការស្រាវជ្រាវ មានចំណេះដឹងទូលំទូលាយ ប៉ុន្តែការប្រើប្រើប្រាស់មិនបានត្រឹមត្រូវនឹងធ្វើឱ្យប៉ះពាល់ដល់ការសិក្សា និងអនាគតរបស់ពួកគាត់។
ក្នុងនាមក្រសួងអប់រំ យុវជន និងកីឡា លោកជំទាវបណ្ឌិត ឃួន វិច្ឆិកា ក៏អំពាវនាវដល់មាតាបិតា សហគមន៍សាលារៀន លោកគ្រូ អ្នកគ្រូ ទី១. សម្រាប់លោកគ្រូ អ្នកគ្រូ សូមចូលរួមនៅក្នុងការអនុវត្តនូវសេចក្ដីណែនាំនេះ នៅពេលប្រើប្រាស់វិធីសាស្រ្តបង្រៀនពាក់ព័ន្ធជាមួយឧបករណ៍អេឡិចត្រូវនិចត្រូវអនុញ្ញាតិឱ្យសិស្សប្រើប៉ុន្តែប្រើមិនពាក់ព័ន្ធនឹងការរៀនទេសូមចូលរួមទប់ស្កាត់នៅក្នុងថ្នាក់រៀន, ទី២. នាយកសាលា ប្រសិនជាសង្កេតឃើញថាឃើញសិស្សានុសិស្សប្រើប្រាស់ប្រព័ន្ធអេឡិចត្រូនិចក្នុងបរិវេណសាលា ឬក្នុងថ្នាក់រៀនខុសពីសេចក្ដីណែនាំត្រូវមានចំណាត់ការដែលបានចែងក្នុងក្របខណ្ឌក្រុមប្រឹក្សាវិន័យរបស់សាលានីមួយៗ ទី៣. ឪពុកម្ដាយ ឬអាណាព្យាបាលសិស្ស សូមចូលរួមពិនិត្យមើលឱ្យបានដិតដល់ក្នុងការតាមដានកូនៗនៅក្នុងការប្រើប្រាស់ប្រព័ន្ធអេឡិចត្រូនិចតាមរយៈការកំណត់កម្មវិធីទូរស័ព្ទដែលអនុញ្ញាតិឱ្យកូនប្រើប្រាស់ និងកម្មវិធីណាខ្លះដែលមិនអនុញ្ញាតិ៕