ឧស្សាហកម្មបច្ចេកវិទ្យា គឺជាប្រព័ន្ធអេកូឡូស៊ីនៃឱកាសការងារដ៏ធំនៅក្នុងពិភពលោកសម័យទំនើប។ យោងតាមការព្យាករណ៍ពីអ្នកជំនាញផ្នែកឧស្សាហកម្មជាច្រើនបានឱ្យដឹងថា ទីផ្សារបច្ចេកវិទ្យានៅលើពិភពលោក ត្រូវបានគេរំពឹងថា នឹងឈានដល់តម្លៃ ៨ទ្រីលានដុល្លារនៅឆ្នាំ២០២៤។ នេះគឺជាបដិវត្តឌីជីថលដ៏ធំ ដែលកំពុងផ្លាស់ប្ដូរពិភពលោករបស់យើង ។ ដូច្នេះ តើជំនាញបច្ចេកវិទ្យាណាខ្លះ ដែលកំពុងមានតម្រូវការខ្ពស់ នៅក្នុងបដិវត្តន៍ដ៏ធំមួយនេះ?

១. ជំនាញសរសេរកម្មវិធីកុំព្យូទ័រ (Programming Languages) ៖ ជំនាញនេះ គឺជាមូលដ្ឋានគ្រឹះដ៏សំខាន់នៅក្នុងវិស័យបច្ចេកវិទ្យា។ ខណៈដែលភាសាកុំព្យូទ័រដូចជា Python, JavaScript, Java និង C++ គឺជាភាសាដែលពេញនិយមអស់រយៈពេលជាច្រើនឆ្នាំមកហើយ។ ចំណែកភាសា Rust និង TypeScript ក៏កំពុងតែកើនឡើងនូវសន្ទុះនៃការពេញនិយមគួរឱ្យកត់សម្គាល់ផងដែរ។ នៅក្នុងការស្ទង់មតិថ្មីនេះ បានបង្ហាញថាអ្នកជំនាញផ្នែក Python ជាជំនាញដែលមានតម្រូវការខ្ពស់បំផុត ដោយមានរហូតទៅដល់ ៦៧ភាគរយ នៃភាសាកុំព្យូទ័រដទៃទៀត។

២. ជំនាញវិភាគទិន្ន័យ និងវិទ្យាសាស្ត្រទិន្នន័យ (Data Analytics and Data Science) ៖  នៅក្នុងសម័យកាលទិន្នន័យធំ (Big data) សមត្ថភាពក្នុងការទាញយក និងយល់ដឹងពីទិន្នន័យ ពិតជាមានសារៈសំខាន់ខ្លាំង។ ជំនាញក្នុងការវិភាគទិន្នន័យ និងវិទ្យាសាស្ត្រទិន្នន័យ ត្រូវបានគេរកឃើញថា កើនឡើង ២៥ភាគរយ នៅឆ្នាំ២០២២ ដោយកំណើននេះបានបង្ហាញពីសារៈសំខាន់នៃការវិភាគទិន្នន័យ មុននឹងសម្រេចចិត្តទៅលើកិច្ចការអ្វីមួយ។

៣. អ្នកជំនាញ Cloud Computing ៖ ខណៈក្រុមហ៊ុន និងស្ថាប័ននានា បានទទួលបាន Cloud Computing ដើម្បីរក្សាទុកទិន្នន័យ។ ជំនាញនេះ បានក្លាយជាជំនាញមួយ ដែលកំពុងមានតម្រូវការ និងមានការចាប់អារម្មណ៍ពីសំណាក់អ្នកសិក្សា។ ជាពិសេស គឺ Cloud Architecture និង Cloud Security គឺកំពុងមានតម្រូវការខ្ពស់។ ជំនាញ Cloud Computing ត្រូវបានគេព្យាករណ៍ថា នឹងកើនឡើងក្នុងអត្រា ១៨ភាគរយ​​រាល់ឆ្នាំ​។

៤. ជំនាញបញ្ញាសិប្បនិម្មិត និងម៉ាស៊ីនចេះរៀន (Artificial Intelligence and Machine Learning) ៖ បញ្ញាសិប្បនិម្មិត និងម៉ាស៊ីនចេះរៀន (AI & ML) កំពុងជំរុញឱ្យមានគំនិតបង្កើតថ្មី នៅគ្រប់ឧស្សាហកម្មទាំងអស់។ វិស្វករបញ្ញាសិប្បនិម្មិត និងម៉ាស៊ីនចេះរៀន ត្រូវបានគេដឹងថា ជាជំនាញដែលទទួលបានកម្រៃខ្ពស់ជាងគេ ក្នុងចំណោមអ្នកជំនាញបច្ចេកវិទ្យា។

៥. ជំនាញសុវត្ថិភាពអ៊ីនធឺណិត (Cybersecurity) ៖ ខណៈពេលដែលបច្ចេកវិទ្យាកំពុងតែរីកចម្រើន ការគំរាមកំហែងតាមប្រព័ន្ធអ៊ីនធឺណិតក៏កើនឡើងផងដែរ។ ដូច្នេះ អ្នកជំនាញសុវត្ថិភាពអ៊ីនធឺណិត គឺមានតម្រូវការខ្ពស់ ដើម្បីការពារទិន្នន័យ និងប្រព័ន្ធផ្សេងៗ។ អ្នកជំនាញសុវត្ថិភាពអ៊ីនធឺណិត ​បានកើនឡើងរហូតដល់ ៤៥ភាគរយនៅឆ្នាំមុន ហើយការកើនឡើងនេះ កំពុងបង្ហាញពីតម្រូវការបន្ទាន់នៃជំនាញក្នុងវិស័យនេះ៕