យោងតាម WE Forum បានឱ្យដឹងថា ការលេចឡើងនូវបច្ចេកវិទ្យាអស្ចារ្យជាច្រើន ដូចជា បញ្ញាសិប្បនិម្មិត (AI) គឺជាកត្តាមួយ ក្នុងចំណោមកត្តាជាច្រើន ដែលកំពុងរំខានដល់ពិភពការងារក្នុងពេលបច្ចុប្បន្ន។ កត្តាទាំងនោះមានដូចជា បញ្ហាកម្លាំងពលកម្មមានវ័យចំណាស់, ការបំពេញការងារពីចម្ងាយ និងដំណោះស្រាយបន្ទាន់ក្នុងការលុបបំបាត់គម្លាតជំនាញ។

ដំណោះស្រាយសំខាន់ ដើម្បីឈានទៅដោះស្រាយបញ្ហាដែលបានរៀបរាប់ គឺការពង្រឹងជំនាញ (Upskill) និងដឹងរបៀប ដែលយើងត្រូវពង្រឹងជំនាញជាបន្តបន្ទាប់។ ទាំងបុគ្គលិក និងនិយោជក ការពង្រឹងជំនាញ (Upskill) គឺជាមធ្យោបាយតែមួយគត់ សម្រាប់ពួកគេ ដើម្បីអាចឈរជើង និងបន្តនាំឈានមុខ ក្នុងការប្រកួតប្រជែង នៃពិភពលោក ដែលមានការវិវត្តយ៉ាងឆាប់រហ័ស។

ជំនាញដែលមានស្រាប់ កាន់តែមិនសូវពាក់ព័ន្ធនឹងរបៀបធ្វើការសម័យថ្មី។ នៅក្នុងពិភពលោកមួយ ដែលកិច្ចការជាច្រើន នឹងត្រូវជំនួសដោយស្វ័យប្រវត្តិកម្ម (Automation) និងម៉ាស៊ីន, ដូច្នេះ តើអ្វីជាជំនាញស្នូល ដែលម៉ាស៊ីនមិនអាចជំនួសមនុស្សបាន ?

ជំនាញការយល់ដោយញាណ (cognitive) និងភាពជឿជាក់លើសមត្ថភាពខ្លួនឯង (self-efficacy) គឺជាជំនាញដែលជាប់ចំណាត់ថ្នាក់កំពូល ក្នុងចំណោមជំនាញសំខាន់ទាំង១០ នៅឆ្នាំ២០២៣ នៃវេទិកាសេដ្ឋកិច្ចពិភពលោក។ ខណៈជំនាញដែលជាប់ចំណាត់ថ្នាក់បន្តបន្ទាប់មានដូចជា ការគិតបែបវិភាគ និងប្រកបដោយភាពច្នៃប្រឌិត, ភាពធន់, ភាពបត់បែន និងរហ័សរហួន, ការលើកទឹកចិត្ត និងយល់ពីខ្លួនឯង, ភាពចង់ចេះចង់ដឹង និងការៀនសូត្រពេញមួយជីវិត។

ការពង្រឹងជំនាញផ្នែកបច្ចេកវិទ្យា នឹងក្លាយជាគន្លឹះសំខាន់ សម្រាប់សម័យកាលនេះ។ ខណៈជំនាញបច្ចេកវិទ្យា ក៏ស្ថិតក្នុងជំនាញលំដាប់កំពូលទាំង ១០ដែរ ប៉ុន្តែនិយោជកបែរជា​កំពុងជួបការលំបាក ក្នុងការជ្រើសរើសបុគ្គលិកលើជំនាញនេះ។ ល្បឿនយ៉ាងលឿននៃការអភិវឌ្ឍបច្ចេកវិទ្យាបញ្ញាសិប្បនិម្មិត (AI) និងឌីជីថល គឺជាកត្តាដ៏សំខាន់ផងដែរក្នុងបញ្ហានេះ, ចំណែក ការផ្លាស់ប្ដូរបៃតង (Green transition) គឺជាហេតុផលមួយទៀត ដែលត្រូវឱ្យបុគ្គលិក និងនិយោជកត្រូវតែពង្រឹងជំនាញរបស់ខ្លួន។

និន្នាការទាំងនេះ ជាចំណែកដែលជំរុញឱ្យមានការព្យាករណ៍ថា អ្នកជំនាញចំនួន ៤៤ ភាគរយ នឹងត្រូវជួបការរំខាន ក្នុងរយៈពេល ៥ឆ្នាំខាងមុខ ហើយបុគ្គលិក ៦នាក់ ក្នុងចំណោម ១០នាក់ នឹងត្រូវ​ឱ្យមានការបណ្ដុះបណ្ដាលជំនាញបន្ថែមមុនឆ្នាំ២០២៧, នេះបើយោងតាមរបាយការណ៍ស្តីពីអនាគតការងាររបស់វេទិកាសេដ្ឋកិច្ចពិភពលោកឆ្នាំ២០២៣៕