ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រសួងការងារ និងបណ្តុះបណ្តាលវិជ្ជាជីវៈបានឱ្យដឹងថា បច្ចុប្បន្ននេះ កម្ពុជាកំពុងមានតម្រូវការកម្លាំងពលកម្មសរុបចំនួន ៤៧ ៧១៧កន្លែង សម្រាប់វិស័យចំនួន៣ គឺ វិស័យឧស្សាហកម្ម, សេវាកម្ម និងកសិកម្ម។
ឯកឧត្តម កត្តា អ៊ន អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ មានប្រសាសន៍ថា គិតត្រឹមចុងខែមេសានេះ កម្ពុជាត្រូវការកម្លាំងពលកម្មជាង ៤ម៉ឺន៧ពាន់កន្លែង ក្នុងវិស័យ៣សំខាន់ គឺឧស្សាហកម្ម ដែលមានតម្រូវការ ៣៤ ២៩២កន្លែង, វិស័យកសិកម្ម មានតម្រូវការ ៨ ៨៦៤កន្លែង និងសេវាកម្មមានតម្រូវការ ៨ ៨៦៤កន្លែង។
យោងតាមទិន្នន័យរបស់ក្រសួងការងារ និងបណ្តុះបណ្តាលវិជ្ជាជីវៈ តម្រូវការកម្លាំងពលកម្មដែលមានច្រើនជាងគេ គឺនៅរាជធានីភ្នំពេញ ដែលមានចំនួន ៩២០៣កន្លែង, ខេត្តស្វាយរៀងចំនួន ៨៦៩៦កន្លែង, កំពង់ស្ពឺ ៧៣០០កន្លែង, ខេត្តរតនគិរី ចំនួន ៤៦២១កន្លែង, ខេត្តតាកែវ ចំនួន ៤២៧៧កន្លែង, ខេត្តក្រចេះ ចំនួន ៤០០០កន្លែង, ខេត្តកណ្តាល ចំនួន ៣២៨០កន្លែង, ខេត្តកំពង់ចាម ចំនួន ២១៨៦កន្លែង, ខេត្តព្រះសីហនុ ចំនួន ១២២០កន្លែង, ខេត្តពោធិ៍សាត់ ចំនួន ៩៣៧កន្លែង និងខេត្តផ្សេងៗ ចំនួន ១៩៩៧កន្លែង។
ដោយឡែកមុខរបរទាំង១០ ដែលនិយោជកកំពុងត្រូវការរួមមាន ៖ អ្នកបញ្ជាម៉ាស៊ីនដេរ ចំនួន ១៥ ០៤២កន្លែង, កម្មករចំការដំណាំ ចំនួន ៨៨៦៣កន្លែង, អ្នកបញ្ជាម៉ាស៊ីនធ្វើស្បែកជើង ចំនួន ៧៨៧១កន្លែង, កម្មករក្នុងផលិតកម្ម ចំនួន ៥៨១៩កន្លែង, អ្នកបញ្ជាគ្រឿងចក្រ និងម៉ាស៊ីនផលិតផលគីមី ចំនួន ១១០០កន្លែង, កម្មករខ្ចប់វេចដោយដៃ ចំនួន ១០២៩កន្លែង, អ្នកបញ្ចាម៉ាស៊ីនវេចខ្ចប់ ច្រកដាក់ដប និងដាក់ផ្លាកសញ្ញា ចំនួន ៩១១កន្លែង, មន្រ្តីឥណទាន និងប្រាក់កម្ចី ចំនួន ៦៦២កន្លែង, អ្នកបោកគក និងអ្នកអ៊ុតដោយប្រើដៃ ចំនួន ៥៥៨កន្លែង, អ្នកតម្លើងបរិក្ខារអគ្គិសនី និងអេឡិចត្រូនិច ចំនួន ៤៩៨កន្លែង ព្រមទាំងមុខរបរផ្សេងៗចំនួន ៥ ៣៦៤កន្លែង។
យ៉ាងណាក៏ដោយ បើតាមប្រសាសន៍របស់ឯកឧត្តមអ្នកនាំពាក្យក្រសួងការងារ សម្រាប់យុវជនទាំងអស់ដែលមានបំណងចង់ស្វែងរកការងារទាំងនេះ សូមទាក់ទងទៅកាន់ទីភ្នាក់ងារជាតិ មុខរបរ និងការងារ នៃក្រសួងការងារ និងបណ្តុះបណ្តាលវិជ្ជាជីវៈ តាមលេខទូរស័ព្ទ 1297 ឬ 1286 ៕
