ផ្លែឈើគឺជាផ្នែកមួយដ៏សំខាន់បំផុតនៃរបបអាហារប្រចាំថ្ងៃរបស់កុមារ ព្រោះតែ​ផ្លែឈើត្រូវ​គេ​រកឃើញ​មានជាតិខ្លាញ់ និងកាឡូរីទាប ហើយផ្គត់ផ្គង់សារធាតុចិញ្ចឹមសំខាន់ៗដែលកុមារត្រូវការដើម្បីលូតលាស់ និងជួយការពារកូនរបស់អ្នកមិនងាយកើតជំងឺ និងឆ្លងជំងឺមួយចំនួនទៀតផង។

តាមការសិក្សារបស់ e American Cancer Society បានរកឃើញថា របបអាហារដែលមានសុខភាពល្អ រួមទាំងផ្លែឈើ និងបន្លែអាចកាត់បន្ថយហានិភ័យនៃជំងឺមហារីកសួត មហារីកបំពង់អាហារ មហារីកបំពង់អាហារ មហារីកក្រពះ និងមហារីកពោះវៀនធំ។ ម៉្យាងវិញទៀត មជ្ឈមណ្ឌលត្រួតពិនិត្យ និងបង្កាជំងឺឆ្លង (CDC) របស់អាមេរិក បានសន្និដ្ឋានថា របបអាហារសម្បូរបន្លែ និងផ្លែឈើអាចកាត់បន្ថយហានិភ័យនៃជំងឺរ៉ាំរ៉ៃដូចជាជំងឺទឹកនោមផ្អែមប្រភេទទី២ និងជំងឺបេះដូងជាដើម។

ក្រោមនេះជាហេតុផលមួយចំនួនដែលផ្លែឈើផ្ដល់អត្ថប្រយោជន៍ដល់កុមារ រួមមាន៖

១. ផ្លែឈើមានជាតិខ្លាញ់ និងកាឡូរីទាប ៖ បើតាមការចេញផ្សាយរបស់ SFGATE កុមារម្នាក់ក្នុងចំណោមបីនាក់មានបញ្ហាលើសទម្ងន់ ឬធាត់ ដែលភាគច្រើនដោយសារតែរបបអាហារមិនល្អសម្បូរជាតិខ្លាញ់ និងកាឡូរី និងសារធាតុចិញ្ចឹមទាប។ ការញ៉ាំផ្លែឈើច្រើន គឺជាវិធីមួយដើម្បីកាត់បន្ថយការទទួលទានកាឡូរីរបស់កូនអ្នក ជួយការពារការឡើងទម្ងន់ ឬស្រកទម្ងន់ខ្លាំង។ ការជំនួសអាហារសម្រន់ដែលមានកាឡូរីខ្ពស់ និងជាតិខ្លាញ់ខ្ពស់ ឪពុកម្ដាយអាចផ្ដល់ផ្លែឈើស្រស់បន្ថែមលើរបបអាហាររបស់កូន។

២. ផ្លែឈើមានជាតិសរសៃ (Fiber)៖ ផ្លែឈើស្រស់គឺជាប្រភពអាហារូបត្ថម្ភ នៃជាតិសរសៃ ដែលកុមារជាច្រើនមិនទទួលបានគ្រប់គ្រាន់ក្នុងរបបអាហារប្រចាំថ្ងៃរបស់ពួកគេ។ ជាតិសរសៃជួយរក្សាប្រព័ន្ធរំលាយអាហាររបស់កូនអ្នកឱ្យដំណើរការប្រក្រតី ដែលកាត់បន្ថយហានិភ័យនៃការទល់លាមករបស់ពួកគេ។ នៅពេលដែលកូនរបស់អ្នកទទួលបានជាតិសរសៃច្រើនក្នុងរបបអាហារប្រចាំថ្ងៃ ពួកគេក៏មានការថយចុះហានិភ័យ នៃជំងឺបេះដូង ជំងឺទឹកនោមផ្អែមប្រភេទទី២ និងជំងឺធាត់ផងដែរ។

៣. ផ្លែឈើមានវីតាមីន និងសារធាតុរ៉ែ ៖ ផ្លែឈើមានផ្ទុកនូវវីតាមីន និងសារធាតុរ៉ែសំខាន់ៗជាច្រើន ដែលជួយដល់ការលូតលាស់របស់កូនអ្នក និងជួយឱ្យគាត់មានសុខភាពល្អ។ ផ្លែឈើជាច្រើនជួយឱ្យកូនរបស់អ្នកទទួលបានបរិមាណប៉ូតាស្យូមគ្រប់គ្រាន់ ដែលជួយរក្សាសម្ពាធឈាមរបស់គាត់ឱ្យមានលក្ខណៈធម្មតា។ ផ្លែឈើផ្តល់វីតាមីន C ដែលជាសារធាតុចិញ្ចឹមជួយពង្រឹងប្រព័ន្ធភាពស៊ាំរបស់កូនអ្នក និងជួយការពារការឆ្លងមេរោគ។

៤. ផ្លែឈើផ្ដល់អត្ថប្រយោជន៍ចំពោះសុខភាព៖ វីតាមីន និងសារធាតុរ៉ែនៅក្នុងផ្លែឈើជួយឱ្យក្រលៀនកូនរបស់អ្នកដំណើរការប្រក្រតី ដែលកាត់បន្ថយហានិភ័យនៃការកើតគ្រួសក្នុងតម្រងនោម និងជួយឱ្យកូនរបស់អ្នកបង្កើតម៉ាសឆ្អឹង នេះបើយោងតាមគេហទំព័រ ChooseMyPlate ។ របបអាហារដែលសម្បូរទៅដោយផ្លែឈើអាចកាត់បន្ថយហានិភ័យពេញមួយជីវិតរបស់កូនអ្នកចំពោះប្រភេទមហារីកមួយចំនួនដូចជា បំពង់ក បំពង់អាហារ និងក្រពះ។ ផ្លែឈើក៏អាចកាត់បន្ថយហានិភ័យនៃជំងឺមហារីកសួត ។

៥. លទ្ធផលសិក្សាល្អ៖ របបអាហារដែលមានសុខភាពល្អ និងមានតុល្យភាពជួយដល់ការអភិវឌ្ឍន៍ខួរក្បាល ហើយការទទួលទានផ្លែឈើស្រស់ៗឱ្យបានច្រើនអាចបង្កើនសមត្ថភាពរបស់កូនអ្នកនៅក្នុងសាលារៀន។ ការសិក្សាមួយ​នៅ​ឆ្នាំ២០០៨ ដែលបានបោះពុម្ភផ្សាយនៅក្នុង “Journal of School Health” កត់សម្គាល់ថា របបអាហារដែលសំបូរទៅដោយផ្លែឈើ និងបន្លែ ធ្វើឱ្យសិស្សមានពិន្ទុតេស្តខ្ពស់ ។ របបអាហារដែលមានសុខភាពល្អដែលរួមបញ្ចូលផ្លែឈើក៏អាចបង្កើនការផ្តោតអារម្មណ៍របស់កូនអ្នកនៅក្នុងថ្នាក់រៀន ដូច្នេះគាត់អាចរៀនពីអ្វីថ្មីៗ ក៏ដូចជាចងចាំនូវអ្វីដែលពួកគេបានរៀន៕