ថ្លែងក្នុងកម្មវិធីបាឋកថាស្ដីពី “គោលនយោបាយពាក់ព័ន្ធនឹងការធ្វើកំណែទម្រង់វិស័យអប់រំ យុវជន និងកីឡា“ កាលពីថ្ងៃទី២៣​ ខែតុលា ឆ្នាំ២០២៣កន្លងទៅ ឯកឧត្តមបណ្ឌិតសភាចារ្យ  ហង់ជួន ណារ៉ុន ឧបនាយករដ្ឋមន្រ្តី រដ្ឋមន្ត្រីក្រសួងអប់រំ យុវជន និងកីឡា មានប្រសាសន៍ថា កត្តាសំខាន់ដែលជំរុញឱ្យសិស្សរៀនពូកែ ​គឺការអាន និងការសរសេរ។

ឯកឧត្តមបណ្ឌិតសភាចារ្យ  ហង់ជួន ណារ៉ុន ឧបនាយករដ្ឋមន្រ្តី រដ្ឋមន្ត្រីក្រសួងអប់រំ យុវជន និងកីឡា បញ្ជាក់បន្ថែមថា ប្រសិនបើសិស្សអាន និងសរសេរភាសាខ្មែរមិនច្បាស់នោះមុខវិជ្ចាអ្វីៗផ្សេងទៀតក៏មិនច្បាស់ដែរ។ ឯកឧត្តមបណ្ឌិតសភាចារ្យ បន្តថា សម្រាប់សិស្សដែលរៀនខ្សោយមុខវិជ្ជាគណិតវិទ្យា ហើយដោះស្រាយលំហាត់មិនចេញ ក៏ដោយសារសិស្សទាំងនោះអានភាសាខ្មែរមិនដាច់ និងអានមិនយល់។

“បើសិស្សអានមិនយល់ហើយ រៀនអ្វីក៏មិនចេះដែរ ដូច្នេះទើបបានត្រូវពង្រឹងភាសាខ្មែរ ពីថ្នាក់ក្រោមឡើងលើ”

ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្ត្រីក្រសួងអប់រំ យុវជន និងកីឡា

ឧបនាយករដ្ឋមន្រ្តី រដ្ឋមន្ត្រីក្រសួងអប់រំ បញ្ចាក់ថា ប្រសិនបើឃើញសិស្សដែលគាត់រៀនពុំបាន យើងមិនអាចបន្ទោសសិស្សទាំងនោះទេ គឺត្រូវដឹងថា មូលហេតុអ្វីបានជាគាត់រៀនមិនកើត? ម៉្យាងវិញទៀត​ប្រសិនបើសិស្សហូបមិនគ្រប់គ្រាន់ ក៏មិនអាចរៀនឈ្នះគេដែរ ប៉ុន្តែក៏មានកត្តាផ្សេងទៀតដែលពាក់ព័ន្ធនឹងខួរក្បាល ព្រោះមនុស្សមិនដូចគ្នា សិស្សគឺខុសគ្នាទាំងអស់ ហើយវិធីរៀនខុសៗគ្នា។

ឯកឧត្តមបណ្ឌិតសភាចារ្យ  ហង់ជួន ណារ៉ុន បន្ថែមថា ការរៀនពីចិត្តគរុកោសល្យសំខាន់ណាស់ ទើបការរៀន និងបង្រៀនមានប្រសិទ្ធភាព។ ទន្ទឹមគ្នានេះ គ្រូបង្រៀនសតវត្សទី២១ ត្រូវមានគឺស្វែយល់ស្ដង់ដាវិជ្ជាជីវៈគ្រូបង្រៀន, ចុះអង្កេតការបង្រៀនជាក់ស្ដែង, វិធីសាស្រ្តបង្រៀន, របៀបរបបគ្រប់គ្រងថ្នាក់រៀន, វិធីសាស្រ្តស្រាវជ្រាវ​, រដ្ឋបាលសិក្សា និងបំណិនសតវត្សទី២១ ។

គួរជម្រាបជូនថា កម្មវិធីបាឋកថាស្ដីពី “គោលនយោបាយពាក់ព័ន្ធនឹងការធ្វើកំណែទម្រង់វិស័យអប់រំ យុវជន និងកីឡា“ បានរៀបចំឡើងក្នុងគោលដៅដើម្បីផ្សព្វផ្សាយឱ្យបានទូលំទូលាយស្ដីពី គោលនយោបាយពាក់ព័ន្ធនឹងការធ្វើកំណែទម្រង់វិស័យអប់រំ សំដៅលើកកម្ពស់ការចូលរួមពីសំណាក់គ្រូបង្រៀន ក្នុងការអនុវត្តកម្មវិធីកំណែទម្រង់ប្រកបដោយប្រសិទ្ធភាព សម្រេចបានស្របតាមចក្ខុវិស័យក្រសួងអប់រំ យុវជន និងកីឡា និងចក្ខុវិស័យដែលដាក់ចេញដោយ សម្តេចមហាបវរធិបតី ដោយប្រែក្លាយសាលារៀន ក្លាយជាសាលារៀនគំរូ ប្រែក្លាយគ្រូបង្រៀនក្លាយជាគ្រូសតវត្សរ៍ទី២១៕