ការចិញ្ចឹមកូនឱ្យលូតលាស់បានល្អ និងក្លាយជាធនធានគំរូ គឺជាកិច្ចការដ៏លំបាកបំផុតរបស់ឪពុកម្ដាយ ។ មែនទែនទៅ មានវិធីរាប់មិនអស់ ដែលយើងអាចចិញ្ចឹមកូនឱ្យបានល្អ ប៉ុន្តែមានទម្លាប់សំខាន់ៗមួយចំនួន ដែលម្ដាយឪពុកអាចធ្វើជា​ប្រចាំ ដើម្បីទទួលបានភាគជោគជ័យក្នុងការចិញ្ចឹមកូន។ ខាងក្រោមនេះ គឺជា​ទម្លាប់សំខាន់ចំនួន ៣ ដែលអាចជួយឱ្យម្ដាយឪពុកបង្កើតមូលដ្ឋានគ្រឹះដ៏រឹងមាំសម្រាប់ការចិញ្ចឹម និងអភិវឌ្ឍសមត្ថភាពកូន។

១. ទំនាក់ទំនងប្រកបដោយប្រសិទ្ធភាព ៖ កិច្ចការដំបូង ដែលម្ដាយឪពុកត្រូវធ្វើ គឺការបង្កើតភាពស្និទ្ធស្នាល និងទំនាក់ទំនងប្រកបដោយប្រសិទ្ធភាពជាមួយកូនៗ។ ការប្រាស្រ័យទាក់ទង ដែលមានភាពច្បាស់លាស់ និងបើកចំហ គឺជាចំណុចសំខាន់បំផុត ក្នុងការកសាងទំនាក់ទំនងដ៏រឹងមាំរវាងម្ដាយឪពុក និងកូន។ ការធ្វើបែបនេះអាចបើកផ្លូវឱ្យម្ដាយឪពុកងាយយល់អំពីអារម្មណ៍ តម្រូវការ និងការគតិរបស់កូន។ ជាពិសេស អនុញ្ញាតឱ្យកូនៗអាចបង្ហាញអារម្មណ៍ និងតម្លៃរបស់គេ។

ដើម្បីម្ដាយទំនាក់ទំនងល្អជាមួយកូន ម្ដាយឪពុកអាចអនុវត្តសកម្មភាពមួយចំនួនដូចជា៖

• បើកចិត្តស្ដាប់នៅពេលកូននិយាយ និងធ្វើឱ្យគេមានអារម្មណ៍ថា សំឡេងរបស់គេត្រូវបានឮ និងយល់
• លើកទឹកចិត្តឱ្យមានការសន្ទនាបើកចំហ និងស្មោះត្រង់អំពី អារម្មណ៍ ការគិត និងបទពិសោធន៍
• ប្រើភាសា និងការពន្យល់ ឱ្យស្របទៅនឹងអាយុរបស់កូន និងឆ្លៀតកែតម្រូវរបៀបទំនាក់ទំនងរបស់គេ នៅពេលដែលគេលូតលាស់
• បង្កើតបរិយាកាស ដែលមានសុវត្ថិភាពសម្រាប់កូនៗ ដើម្បីឱ្យពួកអាចបង្ហាញអារម្មណ៍ និងមតិយោបល់ ដោយមិនមានអារម្មណ៍ថា គេត្រូវបានវិនិច្ឆ័យ ឬអាចនឹងត្រូវពិន័យ។

២. បង្កើតវិន័យ និងរចនាសម្ព័ន្ធគ្រួសារ ៖ ការបង្កើតឱ្យមានវិន័យ និងរចនាសម្ព័ន្ធគ្រួសារត្រឹមត្រូវ មានសារៈសំខាន់ក្នុងការធ្វើឱ្យគ្រួសារមានលំនឹង។ ម្ដាយឪពុកដែលចិញ្ចឹមកូនដោយជោគជ័យ គឺយល់ច្បាស់អំពីភាពសំខាន់នៃទម្លាប់ និងព្រំដែនរបស់កូនៗថា ពួកគេ​ត្រូវធ្វើអ្វីខ្លះ ហើយចំណុចនេះនឹងជួយឱ្យកូនៗអាចអភិវឌ្ឍសមត្ថភាព និងវិន័យលើខ្លួនឯង។

ដើម្បីបង្កើតវិន័យ និងរចនាសម្ព័ន្ធគ្រួសារបានល្អ ម្ដាយឪពុកអាចអនុវត្តសកម្មភាពមួយចំនួនដូចជា៖

• បង្កើត និងអនុវត្តទម្លាប់មួយចំនួនជាប្រចាំ ដូចជាទម្លាប់ញ៉ាំអាហារ ទម្លាប់គេង និងពេលវេលាសម្រាប់គ្រួសារឱ្យទៀងពេល
• កំណត់ការរំពឹងទុក និងលទ្ធផលច្បាស់លាស់ ដោយធានាថា កូនៗយល់ច្បាស់អំពីច្បាប់វិន័យក្នុងគ្រួសារ និងព្រំដែននៃសកម្មភាពរបស់ពួកគេ
• អនុវត្តច្បាប់ឱ្យបានល្អ នៅពេលដែលពួកគេល្មើសវិន័យ ដើម្បីឱ្យពួកគេហ្វឹកហាត់ទទួលខុសត្រូវ មានទំនួសខុសត្រូវចំពោះទង្វើខ្លួនឯង
• ការអនុវត្តច្បាប់ត្រូវមានភាពបត់បែនទៅតាមស្ថានភាពជាក់ស្ដែង ដែលផ្ដល់ភាពងាយស្រួលសម្រាប់កូនៗសម្របខ្លួន។

៣. ត្រូវបង្ហាញភាពជាគំរូ ៖ ម្ដាយឪពុក ដែលទទួលភាពជោគជ័យក្នុងការចិញ្ចឹមកូន ជាទូទៅតែងអនុវត្តនូវគម្រូល្អៗ ដើម្បីឱ្យកូនអនុវត្តតាម។ ពួកគេយល់ច្បាស់ថា សកម្មភាព និងឥរិយាបថរបស់ខ្លួន មានឥទ្ធិពលរយៈពេលវែងលើតម្លៃ និងជំនឿរបស់កូន ។ តាមរយៈការដឹកនាំ ដោយបង្ហាញភាពជាគំរូ ម្ដាយឪពុកអាចបណ្ដុះស្មារតីនៃសុចរិតភាព និងភាពធន់សម្រាប់កូន។

ដើម្បីបង្ហាញភាពគំរូល្អ ម្ដាយឪពុកអាចអនុវត្តសកម្មភាពមួយចំនួនដូចជា៖

• បង្ហាញពីតម្លៃនៃការប្រឹងប្រែធ្វើការ ការតស៊ូ និងការលះបង់ក្នុងការរស់នៅ ព្រមទាំងបំផុសគំនិតកូនយល់អំពីតម្លៃនៃការសម្រេចគោលដៅ
• បង្ហាញភាពវៃឆ្លាតក្នុងការគ្រប់គ្រងអារម្មណ៍ និងរបៀបប្រតិកម្មតបរបស់ខ្លួនក្នុងឥរិយាបថមួយដែលត្រឹមត្រូវ
• អនុវត្តនូវទម្លាប់នៃការយល់ចិត្តយល់ថ្លើម និងទឹកចិត្តមេត្តា ដោយបង្រៀនកូនៗយល់អំពីតម្លៃនៃការគោរពអារម្មណ៍ និងទស្សនៈរបស់អ្នកដទៃ
• ថែរក្សាសុខភាពផ្លូវកាយ ផ្លូវចិត្ត និងផ្លូវអារម្មណ៍ឱ្យបានល្អ ដោយគំរូបនេះធ្វើឱ្យកូនៗដឹងអំពីតម្លៃនៃសុខភាព។

យ៉ាងណាមិញ វាជារឿងសំខាន់ដែលត្រូវចងចាំថា ការចិញ្ចឹមបីបាច់កូនគឺជាកិច្ចការមួយ ដែលឪពុកម្ដាយគ្រប់រូបត្រូវរៀនសូត្រជាប្រចាំ ព្រោះបញ្ហាប្រឈម និងឧបសគ្គថ្មីៗតែងតែកើតឡើងគ្រប់ពេល។ ដូច្នេះត្រូវទទួលយកការពិត និងសម្របខ្លួនទៅនឹងស្ថានការណ៍ជាក់ស្ដែង ហើយបន្តការប្ដេជ្ញាចិត្តឱ្យបានគត់មត់ និងបណ្ដុះទម្លាប់ល្អៗឱ្យបានជាប្រចាំ។ តាមរយៈការចិញ្ចឹមកូនតាមរបៀបនេះ នឹងធ្វើឱ្យកូនអ្នកក្លាយជាមនុស្សមានទំនុកចិត្ត សមត្ថភាព និងចិត្តមេត្តា ព្រមទាំងអាចត្រៀមខ្លួនជាសម្រេច ដើម្បីដោះស្រាយបញ្ហាស្មុគស្មាញក្នុងជីវិត៕